ଜୋହାନସର୍ଗ,୨୬ ।୧୧: ଦକ୍ଷିଣ ଆଫ୍ରିକାରେ କରୋନା ଭାଇରସ ସଂକ୍ରମଣର ସବୁଠାରୁ ମାରାତ୍ମକ ଭାରିଏଣ୍ଟ ଦେଖାଦେଇଛି । ଯାହା ସାରା ଦେଶକୁ ଚିନ୍ତାରେ ପକାଇ ଦେଇଛି । ଏହାକୁ ଦେଖି ଇଂଲଣ୍ଡ ଓ ଇସ୍ରାଏଲ ଦକ୍ଷିଣ ଆଫ୍ରିକା ଉପରେ ଯାତ୍ରା ପ୍ରତିବନ୍ଧକ ଲଗାଇ ଦେଇଛନ୍ତି । ଇଂଲଣ୍ଡ ତା’ର ଟ୍ରାଭେଲ ଲିଷ୍ଟରେ ଦକ୍ଷିଣ ଆଫ୍ରିକାକୁ ରେଡ ଲିଷ୍ଟରେ ପକାଇ ଦେଇଛି । ଏହାସହ ଦକ୍ଷିଣ ଆଫ୍ରିକାର ସମସ୍ତ ବିମାନ ସେବାକୁ ବନ୍ଦ କରି ଦିଆଯାଇଛି । ଅନ୍ୟପଟେ ନିକଟରେ ଯେଉଁମାନେ ଦକ୍ଷିଣ ଆଫ୍ରିକାରୁ ଇଂଲଣ୍ଡ ଫେରିଛନ୍ତି ଯେଉଁଠି ବି.୧.୧.୧.୫୨୯ ଭାରିଏଣ୍ଟ ମିଳିଛି ସେମାନଙ୍କୁ ଖୋଜି ବାହାର କରିବା ସହ ସେମାନଙ୍କୁ କରୋନା ଟେଷ୍ଟ କରିବାକୁ କୁହାଯିବ ବୋଲି ଅନୁମାନ କରାଯାଉଛି । ବିଶେଷ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଭ୍ୟାକ୍ସିନ କାର୍ଯ୍ୟକ୍ରମରେ ଏହା ଏକ ମାରାତ୍ମକ ବିପଦ, ଏହାକୁ ଯେମିତି ବି ହେଉନା କାହିଁକି ଆମକୁ ବଞ୍ଚାଇବାକୁ ପଡିବ ।
ଏହାସହ ଗୁରୁବାରଠାରୁ ଇସ୍ରାଏଲ ମଧ୍ୟ ଦକ୍ଷିଣ ଆଫ୍ରିକା ଯାତ୍ରା ଉପରେ ପ୍ରତିବନ୍ଧକ ଲଗାଇଛି । ସେଠାରୁ ଆସୁଥିବା ବିଦେଶୀ ନାଗରିକଙ୍କୁ ମଧ୍ୟ ଇସ୍ରାଏଲ ଦେଶ ମଧ୍ୟକୁ ପ୍ରବେଶ କରାଇ ନ ଦେବାକୁ କହିଛି ।
କରୋନାର ଏହି ନୂଆ ଭାରିଏଣ୍ଟ ଖୁବ୍ଶୀଘ୍ର ବ୍ୟାପୁଥିବାରୁ ଏହାକୁ ଦେଖି ଭାରତ ବି ସଜାଗ ହୋଇଯାଇଛି । ସ୍ୱାସ୍ଥ୍ୟ ସଚିବ ରାଜେଶ ଭୂଷଣ ସମସ୍ତ ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳକୁ ଚିଠି ଲେଖି ଆଲର୍ଟ ରହିବାକୁ କହିଛନ୍ତି । ନୂଆ ଭାରିଏଣ୍ଟ ଦ୍ରୁତ ଗତିରେ ବ୍ୟାପୁଥିବାରୁ ରାଜ୍ୟ ବାହାରୁ ଆସୁଥିବା ଲୋକଙ୍କ ଉପରେ କଡା ନଜର ରଖିବାକୁ କୁହାଯାଇଛି ।
