କାଠମାଣ୍ଡୁ, ୧୫।୭: ମୃତ୍ୟୁମୁଖରୁ ବୋଧହୁଏ କେହି ବର୍ତ୍ତିପାରିବେ ନାହିିଁ। ଏହି କଥାକୁ ସତ ପ୍ରମାଣିତ କରି ଦେଖାଇଛି ନେପାଳର ଏକ ଭୟଙ୍କର ଜଙ୍ଗଲୀ ହାତୀ। ଯାହାର ନାଁ ‘ଧୁର୍ବେ’। ଏହି ଦନ୍ତାହାତୀ ଏକ ନିର୍ଦ୍ଦିଷ୍ଟ ପରିବାର ସହ ଏଭଳି ରକ୍ତାକ୍ତ ଶତ୍ରୁତା ରଖିଛି, ଯାହା ଶୁଣିଲେ ଆପଣଙ୍କ ଲୋମ ଟାଙ୍କୁରି ଉଠିବ। ହାତୀ ଭୟରେ ଯେଉଁ ପରିବାର ୧୪ ବର୍ଷ ତଳେ ନିଜର ଭିଟାମାଟି ଛାଡ଼ି ନଦୀ ପାର୍ ହୋଇ ଅନ୍ୟତ୍ର ଚାଲିଯାଇଥିଲେ। ସେଠାରେ ବି ମୃତ୍ୟୁ ସେମାନଙ୍କ ପିଛା ଛାଡ଼ିଲାନି। ଧୁର୍ବେ ସେହି ନୂଆ ଗ୍ରାମକୁ ଆସି ପରିବାରର ଆଉ ଦୁଇଜଣଙ୍କୁ ଦଳି ମାରିଦେଇଛି। ସୋସିଆଲ ମିଡିଆରେ ଏହି ଅଦ୍ଭୁତ ତଥା ରୋମାଞ୍ଚକର ପ୍ରତିଶୋଧର କାହାଣୀ ଏବେ ବେଶ୍ ଭାଇରାଲ ହେବାରେ ଲାଗିଛି। ୧୪ ବର୍ଷ ପୂର୍ବେ ବାପା-ମା’ଙ୍କୁ ମାରିଥିଲା, ଏବେ ବୋହୂ ଓ ନାତିକୁ ଦେଲା ଯନ୍ତ୍ରଣାଦାୟକ ମୃତ୍ୟୁ। ଏହି ହୃଦୟବିଦାରକ ଘଟଣାଟି ନେପାଳର ଚିତୱନ ଜାତୀୟ ଉଦ୍ୟାନ (Chitwan National Park) ନିକଟରେ ରହୁଥିବା ଶନିଚରା ବୋଟେଙ୍କ ପରିବାର ସହ ଘଟିଛି। ଶନିଚରାଙ୍କ ପାଇଁ ଏହି ଭୟଙ୍କର ଦୁଃସ୍ବପ୍ନ ୨୦୧୨ ଡିସେମ୍ବରରେ ଆରମ୍ଭ ହୋଇଥିଲା। ଯେତେବେଳେ ‘ଧୁର୍ବେ’ ନାମକ ଜଙ୍ଗଲୀ ହାତୀ ମାଡ଼ି ସହରରେ ତାଙ୍କ ବାପା ବୁଦ୍ଧିରାମ ଏବଂ ମା’ ଝାରଲୀଙ୍କୁ କଚାଡ଼ି ହତ୍ୟା କରିଥିଲା। ବାପା-ମା’ଙ୍କ ମୃତ୍ୟୁ ଏବଂ ହାତୀ ଆତଙ୍କରେ ଭୟଭୀତ ହୋଇ ଶନିଚରା ନିଜ ଗାଁ ଛାଡ଼ିବାକୁ ନିଷ୍ପତ୍ତି ନେଇଥିଲେ। ସେ ନିଜ ପରିବାରର ସୁରକ୍ଷା ପାଇଁ ରାପ୍ତୀ ନଦୀ ପାର୍ ହୋଇ ପ୍ରାୟ ୧୪ କିଲୋମିଟର ଦୂର ଜଗତପୁର ଅଞ୍ଚଳକୁ ଚାଲିଆସିଥିଲେ। ବର୍ଷ ବର୍ଷ ଧରି ପରିବାର ଲୋକେ ଭାବିଥିଲେ ଯେ ସେମାନେ କାଳର କରାଳ ଗ୍ରାସରୁ ବଞ୍ଚିଗଲେ। ମାତ୍ର ଚଳିତ ମାସରେ ମୃତ୍ୟୁ ପୁଣିଥରେ ସେମାନଙ୍କ ଦୁଆରମୁହଁରେ ଆସି ପହଞ୍ଚିଗଲା। ଧୁର୍ବେ ହାତୀ ନଦୀ ପାର୍ ହୋଇ ଜଗତପୁର ସ୍ଥିତ ଶନିଚରାଙ୍କ ନୂଆ ଘରେ ପଶି ତାଙ୍କ ୨୫ ବର୍ଷୀୟ ବୋହୂ ଆଶିକା ବୋଟେ ଏବଂ ୪ ବର୍ଷର ନିଷ୍ପାପ ନାତି ଭରତ ବୋଟେଙ୍କୁ ଦଳି ମାରିଦେଇଛି।
ନିଜ ଆଖିରୁ ଲୁହ ଗଡ଼ାଇ ଶନିଚରା କହିଛନ୍ତି, “ଆମେ ଭାବିଥିଲୁ ବଡ଼ ନଦୀ ପାର୍ ହୋଇଗଲେ ଆମେ ସୁରକ୍ଷିତ ରହିବୁ, ହେଲେ ସେହି ପାଗଳ ହାତୀ ଆମକୁ ଖୋଜି ବାହାର କଲା। ଏବେ ଆମ ପାଇଁ ଆଉ କେଉଁଠି ବି ଲୁଚିବାକୁ ଜାଗା ନାହିଁ। ନେପାଳ ବନ୍ୟପ୍ରାଣୀ ବିଭାଗ ଅନୁଯାୟୀ, ଏହି କୁଖ୍ୟାତ ଧୁର୍ବେ ହାତୀ ଏପର୍ଯ୍ୟନ୍ତ ପ୍ରାୟ ୨୫ ଜଣ ଲୋକଙ୍କ ଜୀବନ ନେଇସାରିଲାଣି।
ଧୁର୍ବେ କୌଣସି ସାଧାରଣ ହାତୀ ନୁହେଁ, ବରଂ ନେପାଳର ସବୁଠାରୁ ବିପଜ୍ଜନକ ‘ସିରିଏଲ କିଲର୍’ ହାତୀ ପାଲଟିଯାଇଛି। ତା’ର ଭୟ ଓ ଆତଙ୍କର ଅନ୍ଦାଜା ଏହି କଥାରୁ ଲଗାଯାଇପାରେ ଯେ ଇଣ୍ଟରନେଟ୍ରେ ’ଧୁର୍ବେ’ ନାମରେ ଏକ ସ୍ବତନ୍ତ୍ର ୱିକିପିଡିଆ ପେଜ୍ ମଧ୍ୟ ରହିଛି, ଯେଉଁଥିରେ ସେ ନେଇଥିବା ଜୀବନର କଳା ଇତିହାସ ଲିପିବଦ୍ଧ ଅଛି।
ଚିତୱନ ଜାତୀୟ ଉଦ୍ୟାନର ଅଧିକାରୀମାନଙ୍କ ସୂଚନା ଅନୁଯାୟୀ, ବର୍ଷ ୨୦୧୦ରୁ ଏପର୍ଯ୍ୟନ୍ତ ଏହି ଭୟଙ୍କର ହାତୀ ସର୍ବମୋଟ ୨୫ ଜଣ ମଣିଷଙ୍କ ଜୀବନ ନେଇସାରିଲାଣି। ଏହି ସାମ୍ପ୍ରତିକ ଆକ୍ରମଣ ପୂର୍ବରୁ ଧୁର୍ବେ ନାମରେ ୨୩ଟି ମୃତ୍ୟୁ ମାମଲା ରହିଥିଲା, କିନ୍ତୁ ଜଗତପୁରର ଏହି ଘଟଣା ପରେ ଏହି ସଂଖ୍ୟା ୨୫କୁ ବୃଦ୍ଧି ପାଇଛି।
