କାଠମାଣ୍ଡୁ,୨ା୯: ନେପାଳରେ ଭୟଙ୍କର ବନ୍ୟା ପରେ ଭାରତ ପକ୍ଷରୁ ମିଳୁଥିବା ଲଗାତାର ସହାୟତାକୁ ନେଇ ଭାରତ ଓ ଚାଇନାକୁ ଧନ୍ୟବାଦ ଜଣାଇଛନ୍ତି ନେପାଳ ପ୍ରଧାନମନ୍ତ୍ରୀ ବାଲେନ ଶାହା। ବୁଧବାର, ସଂସଦରେ ଉଦ୍ବୋଧନ ଦେଇ ସେ କହିଛନ୍ତି ଯେ, ଏଭଳି ବଡ଼ ବିପର୍ଯ୍ୟୟ ସମୟରେ ଅନ୍ତର୍ଜାତୀୟ ସହଯୋଗ ନେବାରେ କୌଣସି ଦ୍ୱିଧା ରହିବା ଉଚିତ ନୁହେଁ।
ପ୍ରଧାନମନ୍ତ୍ରୀ ଶାହା କହିଛନ୍ତି, ବିପର୍ଯ୍ୟୟର ପ୍ରଥମ ଦିନରୁ ହିଁ ନେପାଳ ସରକାର ଡିଜାଷ୍ଟର ମ୍ୟାନେଜମେଣ୍ଟ ପାଇଁ ଅନ୍ତର୍ଜାତୀୟ ସହଯୋଗ ନେଉଛି। ବିଦେଶୀ ସହାୟତା ନେବାରେ ସରକାର ହେଜିଟେସନ୍ କରୁଥିବା ନେଇ ପ୍ରଶ୍ନ ଉଠିବା ପରେ ସେ କହିଛନ୍ତି, “ଏତେ ବଡ଼ ବିପର୍ଯ୍ୟୟରେ ଅନ୍ତର୍ଜାତୀୟ ସହଯୋଗ ନନେବାର ପ୍ରଶ୍ନ ହିଁ ଉଠୁନାହିଁ।” ଅଗଷ୍ଟ ୨୬ ତାରିଖରେ ନେପାଳରେ ହଠାତ୍ ଆସିଥିବା ଭୟଙ୍କର ବନ୍ୟା ପରେ ଏବେ ବି ୪ ହଜାରରୁ ଅଧିକ ଲୋକ ନିଖୋଜ ଅଛନ୍ତି। ଏପର୍ଯ୍ୟନ୍ତ ୧,୧୨୭ ଜଣଙ୍କ ମୃତ୍ୟୁ ନିଶ୍ଚିତ ହୋଇଥିବା ଜଣାପଡ଼ିଛି। ବନ୍ୟା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନେପାଳ ପ୍ରଧାନମନ୍ତ୍ରୀ ବାଲେନ୍ ଶାହାଙ୍କ ସହ ଫୋନ୍ରେ କଥା ହୋଇଥିଲେ ଏବଂ ଭାରତ ପକ୍ଷରୁ ସମସ୍ତ ପ୍ରକାର ସହଯୋଗର ଆଶ୍ୱାସନ ଦେଇଥିଲେ।
ଏହାପରେ ଭାରତ ପକ୍ଷରୁ ଲଗାତାର ନେପାଳକୁ ରିଲିଫ୍ ସାମଗ୍ରୀ ପଠାଯାଉଛି। ଏଥିରେ ଖାଦ୍ୟ, ଔଷଧ, ବ୍ରିଜ୍ ନିର୍ମାଣ ସାମଗ୍ରୀ ସହ ଡିଏନ୍ଏ ବିଶେଷଜ୍ଞଙ୍କ ଟିମ୍ ମଧ୍ୟ ସାମିଲ ଅଛି। ବିପର୍ଯ୍ୟୟ ସମୟରେ ଲୋକଙ୍କୁ ଠିକ୍ ସମୟରେ ସୂଚନା ଦିଆଯାଇନଥିବା ଅଭିଯୋଗ ଉପରେ ମଧ୍ୟ ପ୍ରଧାନମନ୍ତ୍ରୀ ଶାହା ମୁହଁ ଖୋଲିଛନ୍ତି ।
ସେ କହିଛନ୍ତି ଯେ, ସରକାର ପକ୍ଷରୁ ପ୍ରାୟ ୧୧ ଲକ୍ଷ SMS ପଠାଇ ନାଗରିକଙ୍କୁ ବିପର୍ଯ୍ୟୟ ସମ୍ପର୍କରେ ସୂଚନା ଦିଆଯାଇଥିଲା। ତାଙ୍କ କହିବା ଅନୁସାରେ, ଏହି ବିପର୍ଯ୍ୟୟ ଆଶା କରାଯାଇଥିବା ସ୍ତରଠାରୁ ବହୁତ ବଡ଼ ଥିଲା। ସରକାର ଘଟଣା ସମ୍ପର୍କରେ ଜାଣିବା ମାତ୍ରେ ୧୧ ଲକ୍ଷ ଲୋକଙ୍କୁ SMS ଜରିଆରେ ସୂଚନା ପଠାଯାଇଥିବା ସେ କହିଛନ୍ତି। ରାଜ୍ୟ ଓ ସ୍ଥାନୀୟ ସ୍ତରରେ ସରକାର ମଧ୍ୟରେ ସମନ୍ୱୟର ଅଭାବ ଥିବା ଅଭିଯୋଗ ଉପରେ ମଧ୍ୟ ଶାହା ଜବାବ ରଖିଛନ୍ତି। ସେ କହିଛନ୍ତି ଯେ, ରାଜ୍ୟ ଓ ସ୍ଥାନୀୟ ସ୍ତରର ଅଧିକାରୀଙ୍କ ସହ ଲଗାତାର ଆଲୋଚନା ଚାଲିଛି। ସମନ୍ୱୟ ମାଧ୍ୟମରେ ରିଲିଫ୍ ଓ ରେସ୍କ୍ୟୁ କାର୍ଯ୍ୟ ଜାରି ରହିଥିବା ସେ ଦାବି କରିଛନ୍ତି।
