କାଠମାଣ୍ଡୁ,୫।୨: ନେପାଳରେ ପ୍ରଧାନମନ୍ତ୍ରୀ ପୁଷ୍ପ କମଲ ଦହଲ ପ୍ରଚଣ୍ଡଙ୍କ ନେତୃତ୍ୱରେ ଶାସକ ମିଳିତ ମେଣ୍ଟରେ ବିବାଦ ବୃଦ୍ଧି ପାଇଛି। ରବିବାର ରାଷ୍ଟ୍ରିୟ ସ୍ବତନ୍ତ୍ର ପାର୍ଟି (ଆରଏସପି) ଶାସକ ମିଳିତ ମେଣ୍ଟରୁ ଅଲଗା ହେବା ନେଇ ଘୋଷଣା କରିଛି। ଆରଏସପି ସଭାପତି ରବି ଲାମିଛାନେଙ୍କୁ ଗୃହମନ୍ତ୍ରୀ ଭାବରେ ପୁନଃ ଅବସ୍ଥାପିତ କରିବାକୁ ପ୍ରଧାନମନ୍ତ୍ରୀ ମନା କରିଦେଇଛନ୍ତି। ଏହା ପରେ ଦଳ ମିଳିତ ସରକାରଠାରୁ ଦୂରେଇ ଯିବାକୁ ନିଷ୍ପତ୍ତି ନେଇଛି।
ଆରଏସପି କେନ୍ଦ୍ରୀୟ କମିଟି ସଦସ୍ୟ ଏବଂ ସାଂସଦଙ୍କ ମିଳିତ ବୈଠକ ପରେ ଏହି ନିଷ୍ପତ୍ତି ନିଆଯାଇଛି। ଗତ ବର୍ଷ ନଭେମ୍ବରରେ ଅନୁଷ୍ଠିତ ନିର୍ବାଚନ ସମୟରେ ୪୮ ବର୍ଷିୟ ଲାମିଛାନେ ଚିତୱାନ-୨ ନିର୍ବାଚନମଣ୍ଡଳୀରୁ ସାଂସଦ ଭାବରେ ନିର୍ବାଚିତ ହୋଇଥିଲେ। ଜାନୁଆରୀ ୨୭ରେ ନେପାଳ ସୁପ୍ରିମକୋର୍ଟଙ୍କ ନିଷ୍ପତ୍ତି ପରେ ଲାମିଛାନେଙ୍କ ସଦସ୍ୟତା ରଦ୍ଦ ହୋଇଥିଲା। ବିଧାନସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ଲାମିଛାନେ ଯେଉଁ ନାଗରିକତ୍ୱ ପ୍ରମାଣପତ୍ର ଦାଖଲ କରିଥିଲେ ତାହା ଅମାନ୍ୟ ଥିବା କୋର୍ଟ ଜାଣିବାକୁ ପାଇଥିଲେ।
ସୁପ୍ରିମକୋର୍ଟଙ୍କ ନିଷ୍ପତ୍ତି ପରେ ପ୍ରଧାନମନ୍ତ୍ରୀ ଲାମିଛାନେଙ୍କୁ କ୍ୟାବିନେଟରୁ ହଟାଇ ଦିଆଯାଇଥିଲା। ଏଥି ସହିତ ତାଙ୍କୁ ଆରଏସପି ସଭାପତି ପଦ ହରାଇବାକୁ ପଡିଲା, କାରଣ ଏହି ପଦବୀରେ ରହିବା ପାଇଁ ନେପାଳୀ ନାଗରିକ ହେବା ଆବଶ୍ୟକ। ଜାନୁୟାରୀ ୨୯ରେ ଲାମିଚାନେ ନାଗରିକତ୍ୱ ପାଇବା ପରେ ପ୍ରଧାନମନ୍ତ୍ରୀ ପ୍ରଚଣ୍ଡଙ୍କୁ ଭେଟି ତାଙ୍କୁ ମନ୍ତ୍ରୀ ଭାବରେ ପୁନଃ ଅବସ୍ଥାପିତ କରିବାକୁ ଦାବି କରିଥିଲେ। କିନ୍ତୁ ପୁନର୍ବାର ତାଙ୍କୁ କ୍ୟାବିନେଟରେ ଭର୍ତ୍ତି କରିବାକୁ ସେ ମନା କରିଦେଇଥିଲେ। ଲାମିଚାନେଙ୍କୁ ଗତ ବର୍ଷ ଡିସେମ୍ବର ୨୬ର ଉପମୁଖ୍ୟମନ୍ତ୍ରୀ ଏବଂ ଗୃହମନ୍ତ୍ରୀ ଭାବରେ ନିଯୁକ୍ତ କରାଯାଇଥିଲା।
