ନୂଆଦିଲ୍ଲୀ, ୮।୮: ଟୋକିଓ ଅଲିମ୍ପିକ୍ସରେ ସ୍ବର୍ଣ୍ଣ ପଦକ ଜିତି ଇତିହାସ ସୃଷ୍ଟି କରିଛନ୍ତି ଜାଭେଲିନ ଥ୍ରୋୟର ନୀରଜ ଚୋପ୍ରା। ତେବେ ଏହି ସଫଳତା ପାଇଁ ତାଙ୍କୁ ଖୁବ୍ ସଂଘର୍ଷ କରିବାକୁ ପଡ଼ିଥିଲା। ୨୦୧୮ ନଭେମ୍ବରରେ ଡାହାଣ କହୁଣିରେ ଯନ୍ତ୍ରଣା ଅନୁଭବ କରିଥିଲେ। ଏହାସତ୍ତ୍ୱେ ସେ ବନ୍ଦ କରି ନ ଥିଲେ ଟ୍ରେନିଂ। ଏଥି ଯୋଗୁ ୨୦୧୯ ଅପ୍ରିଲ ବେଳକୁ ତାଙ୍କ ଆଘାତ ସମସ୍ୟା ଢ଼େର ବୃଦ୍ଧି ପାଇଥିଲା। ଏକ୍ସ-ରେ ରିପୋର୍ଟ ଆସିବା ପରେ ଜଣାପଡ଼ିଥିଲା ସମସ୍ୟାର ଗମ୍ଭିରତା। ଏଣୁ ମେ’ରେ ଅସ୍ତ୍ରୋପଚାର କରାଯାଇଥିଲା। ଅସ୍ତ୍ରୋପଚାର ପରେ ତାଙ୍କୁ ହାତରେ କୌଣସି କାର୍ଯ୍ୟ ନ କରିବାକୁ କୁହାଯାଇଥିଲା।
ପ୍ରାୟ ୮ ମାସ ପରେ ଫେରିଥିଲେ ପଡ଼ିଆକୁ। ଦୋହାରେ ଆୟୋଜିତ ବିଶ୍ୱ ଚାମ୍ପିୟନଶିପ୍ରେ ଭାଗନେବାକୁ ଖୁବ୍ ଇଚ୍ଛୁକ ଥିଲା ନୀରଜ। କିନ୍ତୁ କୋଚ୍ ଓ ଆଥ୍ଲେଟିକ୍ସ ଫେଡେରେଶନ ଅଫ୍ ଇଣ୍ଡିଆ (ଏଏଫ୍ଆଇ)ର ପରାମର୍ଶ କ୍ରମେ ତାଙ୍କୁ ଓହରିବାକୁ ପଡ଼ିଥିଲା ଇଭେଣ୍ଟରୁ। କୋଚ୍ଙ୍କ ମତରେ ନୀରଜଙ୍କ ଶରୀରକୁ ସେତେବେଳେ ଅଧିକ ବିଶ୍ରାମ ଆବଶ୍ୟକ ଥିଲା।
ଅଲିମ୍ପିକ୍ସର ଗୋଟିଏ ବର୍ଷ ପୂର୍ବରୁ ତାଙ୍କ କହୁଣିରେ ଅସ୍ତ୍ରୋପଚାର ନୀରଜଙ୍କ ଆତ୍ମବିଶ୍ୱାସକୁ ଦୋହଲାଇ ଦେଇଥିଲା। କିନ୍ତୁ କୋଭିଡ୍-୧୯ କାରଣରୁ ୨୦୨୦ ଅଲିମ୍ପିକ୍ସକୁ ଗୋଟିଏ ବର୍ଷ ପାଇଁ ସ୍ଥଗିତ ରଖାଯାଇଥିଲା। ଏହି କାରଣରୁ ଅଲିମ୍ପିକ୍ସ ପୂର୍ବରୁ ତାଙ୍କୁ ମିଳିଥିଲା ପ୍ରସ୍ତୁତି ପାଇଁ ଯଥେଷ୍ଟ ସମୟ।
