ନୂଆଦିଲ୍ଲୀ,୩୦।୫ : ଆଜିକାଲି ସୋସିଆଲ ମିଡିଆ ଲୋକଙ୍କୁ ଅପମାନିତ କରିବା ପାଇଁ ଏକ ପ୍ଲାଟଫର୍ମରେ ପରିଣତ ହୋଇଛି। ଲୋକମାନେ ଏହାର ଅପବ୍ୟବହାର କରି ନ୍ୟାୟିକ ଅଧିକାରୀଙ୍କୁ ଅପମାନିତ କରିବାକୁ ଚେଷ୍ଟା କରୁଛନ୍ତି। ମଧ୍ୟପ୍ରଦେଶ ହାଇକୋର୍ଟଙ୍କର ଏକ ରାୟକୁ ସୁପ୍ରିମକୋର୍ଟ ସମର୍ଥନ କରି ସ୍ପଷ୍ଟ କରିଛନ୍ତି ସୋସିଆଲ ମିଡିଆ ବ୍ୟବହାର କରି ନ୍ୟାୟିକ ଅଧିକାରୀଙ୍କୁ ବଦନାମ କରାଯାଇପାରିବ ନାହିଁ।
ମଧ୍ୟପ୍ରଦେଶ ହାଇକୋର୍ଟ ଜଣେ ଜିଲା ଜଜଙ୍କ ବିରୋଧରେ ଦୁର୍ନୀତି ଅଭିଯୋଗ ଆଣିଥିବାରୁ ଆବେଦନ କାରୀଙ୍କୁ ୧୦ ଦିନ ଜେଲ ଦଣ୍ଡାଦେଶ ହୋଇଛି। ଏହି ଆଦେଶକୁ ଚ୍ୟାଲେଞ୍ଜ କରି ସୁପ୍ରିମକୋର୍ଟରେ ଏକ ପିଟିଶନ ଦାଖଲ କରାଯାଇଥିଲା। ମଙ୍ଗଳବାର ସୁପ୍ରିମକୋର୍ଟ ସମାନ ଆବେଦନ ଉପରେ ଶୁଣାଣି କରିଥିଲେ।
ଜଷ୍ଟିସ ବେଲା ଏମ ତ୍ରିବେଦୀ ଏବଂ ଜଷ୍ଟିସ ପ୍ରଶାନ୍ତ କୁମାର ମିଶ୍ରଙ୍କ ଏକ ଅବକାଶ ବେଞ୍ଚ କହିଛନ୍ତି ଏଥିରେ ାଶୀର୍ଷକୋର୍ଟ ହସ୍ତକ୍ଷେପ କରିବାକୁ ଚାହୁଁନାହାଁନ୍ତି। ଏହା ଅନ୍ୟମାନଙ୍କ ପାଇଁ ଏକ ଶିକ୍ଷା ହେବା ଉଚିତ। ବେଞ୍ଚ କହିଛନ୍ତି ଯଦି ଆପଣଙ୍କୁ ନିଜ ପସନ୍ଦର ନ୍ୟାୟ ମିଳେ ନାହିଁ ଆପଣ ଉଚ୍ଚକୋର୍ଟକୁ ଆସିବେ। ଏହାର ଅର୍ଥ ନୁହେଁ ଆପଣ ନ୍ୟାୟିକ ଅଧିକାରୀଙ୍କୁ ବଦନାମ କରିବେ।
ଜଷ୍ଟିସ ତ୍ରିବେଦୀ କହିଛନ୍ତି ଜଣେ ନ୍ୟାୟିକ ଅଧିକାରୀଙ୍କ ବିରୋଧରେ କୌଣସି ଅଭିଯୋଗ କରିବା ପୂର୍ବରୁ ଦୁଇଥର ଚିନ୍ତା କରିବା ଉଚିତ। ଆବେଦନକାରୀଙ୍କ ପକ୍ଷରୁ ହାଜର ହୋଇଥିବା ଆଇନଜୀବୀ ସୁପ୍ରିମକୋର୍ଟଙ୍କ ଦଣ୍ଡାଦେଶରେ କ୍ଷମା ପ୍ରାର୍ଥନା କରିଥିଲେ। ସେ କହିଛନ୍ତି ଏହା ବ୍ୟକ୍ତିଗତ ସ୍ବାଧୀନତା ସହ ଜଡିତ ଏବଂ ଆବେଦନକାରୀ ମେ ୨୭ ପୂର୍ବରୁ ଜେଲରେ ଥିଲେ। ଏହା ଉପରେ ବେଞ୍ଚ କହିଛନ୍ତି ଆମେ ଦୟା ପାଇଁ ନାହୁଁ, କିନ୍ତୁ ସଠିକ ନିଷ୍ପତ୍ତି ନେବାକୁ ଏଠାରେ ଅଛୁ।
ଉଲ୍ଲେଖଯୋଗ୍ୟ, ମଧ୍ୟପ୍ରଦେଶ ହାଇକୋର୍ଟ ଜିଲା ଜଜଙ୍କ ବିରୋଧରେ ଦୁର୍ନୀତି ଅଭିଯୋଗ ଆଣିଥିବା ତାଙ୍କ ବିରୋଧରେ ଆରମ୍ଭ ହୋଇଥିବା ଅପରାଧିକ ଅବମାନନା ମାମଲାରେ କୃଷ୍ଣ କୁମାର ରଘୁବଂଶୀଙ୍କୁ ୧୦ ଦିନ ଜେଲ ଦଣ୍ଡାଦେଶ ଶୁଣାଇଛନ୍ତି। ଏହି ଆଦେଶକୁ ଚ୍ୟାଲେଞ୍ଜ କରି ସୁପ୍ରିମକୋର୍ଟରେ ଏକ ପିଟିଶନ ଦାଖଲ କରାଯାଇଥିଲା।
ଅଦାଲତର ଅବମାନନା ଧାରା ୧୫ (୨) ଅନୁଯାୟୀ ଅତିରିକ୍ତ ଜିଲ୍ଲା ଜଜ ଏସପିଏସ ବାନ୍ଦେଲାଙ୍କ ଦ୍ୱାରା ଦିଆଯାଇଥିବା ଏକ ସୂଚନାର ଉତ୍ତରରେ ରଘୁବଂଶୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଆରମ୍ଭ ହୋଇଥିଲା। ମନ୍ଦିର ବିବାଦରେ ଅଦାଲତର ନିର୍ଦ୍ଦେଶକୁ ଅବମାନନା କରିବା ଏବଂ ହ୍ବାଟସ ଆପ ମାଧ୍ୟମରେ କୋର୍ଟର ଭାବମୂର୍ତ୍ତି ତଥା ପ୍ରତିଷ୍ଠାକୁ ବଦନାମ କରୁଥିବା ଚିଠିର ପ୍ରସାରଣ ଉପରେ ମାମଲା ଦାଖଲ କରାଯାଇଥିଲା।
