ଭୁବନେଶ୍ୱର (ବ୍ୟୁରୋ)/ନୂଆଦିଲ୍ଲୀ,୪ା୪: ଏନ୍ସିଇଆର୍ଟି କେବଳ ଇତିହାସ ବହି ନୁହେଁ, ଅନ୍ୟ କେତେକ ପାଠ୍ୟପୁସ୍ତକରେ ମଧ୍ୟ ପରିବର୍ତ୍ତନ ଆଣି କିଛି ଅଧ୍ୟାୟକୁ ବାଦ୍ ଦେଇଛି। ଏହି ସଂଶୋଧନ ଚଳିତ ଶିକ୍ଷାବର୍ଷ ୨୦୨୩-୨୦୨୪ରୁ ଲାଗୁ ହେବ। ଏନ୍ସିଇଆର୍ଟିକୁ ଅନୁସରଣ କରୁଥିବା ସିବିଏସ୍ଇ ସମେତ ଉତ୍ତରପ୍ରଦେଶ ଓ କେତେକ ରାଜ୍ୟର ବୋର୍ଡ ଦ୍ୱାରା ପରିଚାଳିତ ସ୍କୁଲଗୁଡ଼ିକ ସଂଶୋଧିତ ପାଠ୍ୟକ୍ରମ ଅନୁଯାୟୀ ପିଲାଙ୍କୁ ପାଠ ପଢ଼ାଇବେ।
ଏନ୍ସିଇଆର୍ଟି କରିଥିବା ପରିବର୍ତ୍ତନ ଅନୁଯାୟୀ, ଦ୍ୱାଦଶ ଶ୍ରେଣୀ ଇତିହାସ ପୁସ୍ତକ ‘ଥିମ୍ ଅଫ୍ ଇଣ୍ଡିଆନ ହିଷ୍ଟ୍ରି-ପାର୍ଟ ୨’ରୁ ‘କିଙ୍ଗସ୍ ଆଣ୍ଡ କ୍ରୋନିକଲ୍ସ; ଦ ମୋଗଲ କୋର୍ଟସ୍ (ଷୋଡଶ ଏବଂ ସପ୍ତଦଶ ଶତାବ୍ଦୀ) ଅଧ୍ୟାୟକୁ ବାଦ୍ ଦିଆଯାଇଛି। ସେହିପରି ହିନ୍ଦୀ ପାଠ୍ୟପୁସ୍ତକରୁ କେତେକ କବିତା ଏବଂ ଅନୁଚ୍ଛେଦକୁ ହଟାଇ ଦିଆଯାଇଛି। ଏହାସହିତ ଏନ୍ସିଇଆର୍ଟି ଦ୍ୱାଦଶ ଶ୍ରେଣୀର ନଗରବିଜ୍ଞାନ (ସିଭିକ୍ସ) ପୁସ୍ତକରୁ ଦୁଇଟି ଅଧ୍ୟାୟ ‘ଆମେରିକାନ ହେଜିମୋନି ଇନ୍ ଓ୍ବାଲର୍ଡ ପଲିଟିକ୍ସ’ ଓ ‘ଦ କୋଲ୍ଡ ଓ୍ବାର୍ ଏରା’କୁ ବାଦ୍ ଦେଇଛି। ସେହିପରି ଦ୍ୱାଦଶ ଶ୍ରେଣୀର ‘ଇଣ୍ଡିଆନ ପଲିଟିକ୍ସ ଆପ୍ଟେର୍ ଇଣ୍ଡିପେଣ୍ଡେନ୍ସ’ରୁ ଦୁଇଟି ଅଧ୍ୟାୟ ‘ରାଇଜ୍ ଅଫ୍ ପପୁଲାର ମୁଭ୍ମେଣ୍ଟସ୍’ ଓ ‘ଏରା ଅଫ୍ ଓ୍ବାନ୍ ପାର୍ଟି ଡୋମିନାନ୍ସ’କୁ ମଧ୍ୟ ହଟାଇ ଦିଆଯାଇଛି।
ଦଶମ ଏବଂ ଏକାଦଶ ଶ୍ରେଣୀର କେତେକ ପୁସ୍ତକରେ ମଧ୍ୟ ଏନ୍ସିଇଆର୍ଟି ପରିବର୍ତ୍ତନ କରିଛି। ତଦନୁଯାୟୀ, ଦଶମ ଶ୍ରେଣୀର ‘ଡେମୋକ୍ରାଟିକ୍ ପଲିଟିକ୍ସ-୨’ ବହିରୁ ୩ଟି ଅଧ୍ୟାୟ ଯଥା ‘ଡେମୋକ୍ରାସି ଆଣ୍ଡ୍ ଡାଇଭର୍ସିଟି’, ‘ପପୁଲାର ଷ୍ଟ୍ରଗଲ୍ସ ଆଣ୍ଡ୍ ମୁଭ୍ମେଣ୍ଟ୍ସ’ ଓ ‘ଚ୍ୟାଲେଞ୍ଜସ୍ ଅଫ୍ ଡେମୋକ୍ରାସି’କୁ ବାଦ୍ ଦିଆଯାଇଛି। ସେହିପରି ଏକାଦଶ ଶ୍ରେଣୀର ପାଠ୍ୟପୁସ୍ତକ ‘ଥିମ୍ସ ଇନ୍ ଓ୍ବାଲର୍ଡ ହିଷ୍ଟ୍ରି’ରୁ ‘ସେଣ୍ଟ୍ରାଲ୍ ଇସ୍ଲାମିକ୍ ଲ୍ୟାଣ୍ଡ୍ସ’, ‘କ୍ଲାଶ୍ ଅଫ୍ କଲ୍ଚର୍ସ’ ଏବଂ ‘ଇଣ୍ଡଷ୍ଟ୍ରିଆଲ୍ ରିଭୋଲ୍ୟୁଶନ’ ଆଦି ଅଧ୍ୟାୟକୁ ବାଦ୍ ଦିଆଯାଇଛି।
ମୋଗଲ ସାମ୍ରାଜ୍ୟ ଅଧ୍ୟାୟକୁ ବାଦ୍ ଦିଆଯିବା ଉଚିତ୍ ନୁହେଁ ବୋଲି କହିଛନ୍ତି ବିଜେବି ଜୁନିୟର କଲେଜର ପୂର୍ବତନ ପ୍ରିନ୍ସିପାଲ ରଘୁନାଥ ପଣ୍ଡା। ସେ କହିଛନ୍ତି ଯେ, ପୂର୍ବ ତଥ୍ୟରୁ ଭବିଷ୍ୟତକୁ ଗଢ଼ିବା ପାଇଁ ବର୍ତ୍ତମାନ ଚିନ୍ତା କରିବାର ଅର୍ଥ ହେଉଛି ଇତିହାସ। ଇତିହାସରୁ ଆମକୁ ବହୁତ କିଛି ଶିଖିବାକୁ
ମିଳେ। ତେଣୁ ପାଠ୍ୟପୁସ୍ତକରେ ମୋଗଲ ସାମ୍ରାଜ୍ୟର ଯେଉଁ ଇତିହାସ ରହିଛି ତାହାକୁ ବାଦ୍ ଦିଆଯିବା ଉଚିତ୍ ନୁହେଁ। ମୋଗଲ ସମ୍ରାଟ ଆକବରଙ୍କ ଯେଉଁଭଳି ଶାସନ ପ୍ରଣାଳୀ ଏବଂ ଜନହିତକର କାର୍ଯ୍ୟ ଥିଲା ତାହାକୁ ସରକାର ଆଦୃତ କଲେ ସମାଜରୁ ବହୁ ପ୍ରକାର ସମସ୍ୟାର ସମାଧାନ ହୋଇପାରିବ। ସରକାର ସର୍ବଦା ଭାଇଚାରାକୁ ପ୍ରାଧାନ୍ୟ ଦେଉଥିବା ନେଇ ଡିଣ୍ଡିମ ପିଟୁଥିବାବେଳେ ପାଠ୍ୟପୁସ୍ତକରୁ ମୋଗଲ ସାମ୍ରାଜ୍ୟକୁ ବାଦ୍ ଦେବା ଯଥାର୍ଥ ନୁହେଁ। ଅନ୍ୟପକ୍ଷରେ ମଣିଷ ଉପଦେଶରୁ କମ୍ ଶିଖେ, ମାତ୍ର ଭୁଲ୍କୁ ଦେଖି ସେଥିରୁ ଅଧିକ ଶିଖେ ବୋଲି ପଣ୍ଡା କହିଛନ୍ତି।
ଅନ୍ୟପକ୍ଷରେ ରାଜ୍ୟ ସରକାର ମଧ୍ୟ ଏନ୍ସିଇଆର୍ଟି ଦ୍ୱାରା କରାଯାଇଥିବା ପରିବର୍ତ୍ତନକୁ ଆପଣାଇବା ଆବଶ୍ୟକ ବୋଲି କହିଛନ୍ତି ଉଚ୍ଚ ମାଧ୍ୟମିକ ଶିକ୍ଷା ପରିଷଦ (ସିଏଚ୍ଏସ୍ଇ)ର ପ୍ରାକ୍ତନ ଅଧ୍ୟକ୍ଷ ବାସୁଦେବ ଛାଟୋଇ। ତାଙ୍କ କହିବାନୁଯାୟୀ, ଆମକୁ ଯିଏ ଆକ୍ରମଣ କରିଥିଲା, ତାକୁ ଗୌରବାନ୍ବିତ କରିବା ଇତିହାସ ଆମେ ପଢ଼ିବା ଉଚିତ ନୁହେଁ। କାରଣ ତାହାକୁ ପଢ଼ିବା ଦ୍ୱାରା ଆମ ସ୍ବାଭିମାନକୁ କୁଠାରାଘାତ ହେବ। ବରଂ ଆମର ସ୍ବାଭିମାନକୁ ଅକ୍ଷୁଣ୍ଣ ରଖିଥିବା ବ୍ୟକ୍ତିଙ୍କ ଇତିହାସ ଜାଣିବା ଦରକାର। ତେଣୁ ଏନ୍ସିଇଆର୍ଟି ପକ୍ଷରୁ ଇତିହାସ ପାଠ୍ୟପୁସ୍ତକରୁ ମୋଗଲ ସାମ୍ରାଜ୍ୟ ଅଧ୍ୟାୟକୁ ବାଦ୍ ଦିଆଯିବା ସ୍ବାଗତଯୋଗ୍ୟ ପଦକ୍ଷେପ ବୋଲି ଛାଟୋଇ କହିଛନ୍ତି।
ଐତିହାସିକ ପ୍ରଫେସର ନୀହାର ରଞ୍ଜନ ପଟ୍ଟନାୟକ କହିଛନ୍ତି, ଇତିହାସ ହେଉଛି ସତ୍ୟର ପ୍ରତିଫଳନ। ତେଣୁ ଯାହା ଘଟିଛି ତାହାକୁ ଆମେ ସ୍ବୀକାର କରିବା ଆବଶ୍ୟକ। ନିଜକୁ ସୁହାଇବା ଭଳି ତଥ୍ୟକୁ ରଖି ଅନ୍ୟକୁ ବାଦ୍ ଦେବା ଠିକ୍ ନୁହେଁ। ମୋଗଲ ସମ୍ରାଟ ଆକବର ଜଣେ ଭଲ ଶାସକ ଥିଲେ। ତାଙ୍କର ଧର୍ମନୀତି ସବୁ ଧର୍ମକୁ ସୁହାଉଥିଲା। ତାଙ୍କଦ୍ୱାରା ପ୍ରଣୀତ ‘ଦିନ୍-ଇ-ଇଲାହୀ’ ସମସ୍ତଙ୍କ ଦ୍ୱାରା ଆଦୃତ ହୋଇଥିଲା। କିଛି ସୁଲତାନ ହିନ୍ଦୁ ବିରୋଧୀ ଥିଲେ। ମାତ୍ର ତାହାର ଅର୍ଥ ନୁହେଁ, ସବୁ ମୋଗଲ ସମ୍ରାଟ ଭଲ ନୁହେଁ। ସେହିପରି ଇତିହାସ ଏକ ଚେନ୍ ସଦୃଶ। ଏଥିରୁ ଗୋଟିଏ ବିଷୟ ବି ବାଦ୍ ଦେଲେ ତାହାର ଲିଙ୍କ୍ କଟିଯିବ। ତେଣୁ ଇତିହାସ ଯାହା ରହିଛି ତାହାକୁ ପଢ଼ିବା ଦରକାର। ଭଲ ଓ ଖରାପ ଉଭୟ ବିଷୟ ସମ୍ପର୍କରେ ପିଲାମାନେ ଜାଣିବା ଆବଶ୍ୟକ ବୋଲି ପଟ୍ଟନାୟକ କହିଛନ୍ତି।
