Posted inଜାତୀୟ

‘ନଓ୍ବାବ ମଲିକଙ୍କ ଅଣ୍ଡରଓ୍ବାଲର୍‌ଡ ଲିଙ୍କ୍‌’

ମୁମ୍ବାଇ,୧୦।୧୧: ମହାରାଷ୍ଟ୍ରର ଉଦ୍ଧବ ଠାକ୍‌ରେ ସରକାରଙ୍କ କ୍ୟାବିନେଟ ମନ୍ତ୍ରୀ ନଓ୍ବାବ ମଲିକଙ୍କ ଅଣ୍ଡରଓ୍ବାଲର୍‌ଡ ଲିଙ୍କ୍‌ ରହିଛି। ସେ ଓ ତାଙ୍କ ପରିବାର ସଦସ୍ୟମାନେ ଅଣ୍ଡରଓ୍ବାଲର୍‌ଡ ସହିତ ଜଡ଼ିତ ଲୋକଙ୍କଠାରୁ ଜମି କିଣିଛନ୍ତି। ଜାତୀୟତାବାଦୀ କଂଗ୍ରେସ ପାର୍ଟି (ଏନ୍‌ସିପି)ର ପ୍ରଭାବଶାଳୀ ନେତା ନଓ୍ବାବ ମଲିକଙ୍କ ବିରୋଧରେ ମଙ୍ଗଳବାର ଏଭଳି ସାଂଘାତିକ ଅଭିଯୋଗ ଆଣିଛନ୍ତି ବିଧାନସଭାର ବିରୋଧୀ ଦଳ ନେତା ଦେବେନ୍ଦ୍ର ଫଡ୍‌ନବିସ୍‌। ଅନ୍ୟପକ୍ଷେ ଏହି ଅଭିଯୋଗକୁ ମଲିକ ଖଣ୍ଡନ କରିବା ସହ ବୁଧବାର ହାଇଡ୍ରୋଜେନ ବୋମା ଫୁଟାଇବେ ବୋଲି ଭାଜପା ନେତା ଫଡ୍‌ନବିସ୍‌ଙ୍କୁ ଚେତାବନୀ ଦେଇଛନ୍ତି।
କଥା ଯାଇ କେଉଁଠି ପହଞ୍ଚତ୍ଲାଣି। ରାଜନୀତି ପାଇଁ ସବୁକିଛିକୁ ଘାଣ୍ଟିଚକଟି ଲୋକଙ୍କ ଆଗରେ ଥୋଇବାରେ ଲାଗିଛନ୍ତି ମହାରାଷ୍ଟ୍ରର ଶାସକ ଓ ବିରୋଧୀ ନେତା। ଆର୍ୟନ ଶାହରୁଖ ଖାନ୍‌ ଡ୍ରଗ୍ସ ପାର୍ଟି ମାମଲାରେ ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ (ଏନ୍‌ସିବି)ର ମୁମ୍ବାଇ ଜୋନାଲ ଡାଇରେକ୍ଟର ସମୀର ଓ୍ବାଙ୍ଖଡେଙ୍କ ଗୋଟିଏ ପରେ ଗୋଟିଏ କାରନାମା ଉପରୁ ନଓ୍ବାବ ମଲିକ ପରଦା ହଟାଇବାରେ ଲାଗିଛନ୍ତି। ଆର୍ୟନଙ୍କୁ ଗିରଫ ନୁହେଁ, ବରଂ ଅପହରଣ ଉଦ୍ୟମ କରାଯାଇଥିଲା। ୨୫ କୋଟି ଟଙ୍କା ରାନ୍‌ସମ୍‌ ଅସୁଲ ପାଇଁ ହୋଇଥିବା ଏହି ଷଡ଼ଯନ୍ତ୍ରର ମାଷ୍ଟରମାଇଣ୍ଡ ଭାଜପା ନେତା ମୋହିତ କାମ୍ବୋଜ ହୋଇଥିବାବେଳେ ଏଥିରେ ଓ୍ବାଙ୍ଖଡେ ସାମିଲ ଥିଲେ ବୋଲି ରବିବାର ମଲିକ ଅଭିଯୋଗ ଆଣିଥିଲେ। ମଲିକ ଏହା ପୂର୍ବରୁ ଦେବେନ୍ଦ୍ର ଫଡ୍‌ନବିସ୍‌ ଏବଂ ତାଙ୍କ ସ୍ତ୍ରୀ ଅମୃତା ଫଡ୍‌ନବିସ୍‌ଙ୍କ ସହ ଜଣେ ଡ୍ରଗ୍ସ ଡିଲରଙ୍କ ଦୁଇଟି ପୃଥକ୍‌ ଫଟୋକୁ ଟ୍ୟାଗ୍‌ କରି ଟୁଇଟ୍‌ କରିଥିଲେ। ଉଦ୍ଦେଶ୍ୟ ଥିଲା, ଡ୍ରଗ୍ସ ଡିଲରଙ୍କ ସହ ଭାଜପା ନେତାଙ୍କ ସମ୍ପୃକ୍ତି ପଦାକୁ ଆଣିବା। ଏହାର ଜବାବରେ ପୂର୍ବତନ ମୁଖ୍ୟମନ୍ତ୍ରୀ ଫଡ୍‌ନବିସ୍‌ ସେତେବେଳେ କହିଥିଲେ, ମଲିକଙ୍କ ଅଣ୍ଡରଓ୍ବାଲର୍‌ଡ ଡିଲ୍‌କୁ ନେଇ ଦୀପାବଳି ପରେ ବୋମା ଫୁଟିବ। ଫଡ୍‌ନବିସ୍‌ ମଙ୍ଗଳବାର ଏକ ଖବରଦାତା ସମ୍ମିଳନୀରେ କହିଛନ୍ତି, ମଲିକ ଓ ତାଙ୍କ ପରିବାର ସଦସ୍ୟମାନେ ଏକ କମ୍ପାନୀର ଅଂଶୀଦାର ଥିଲେ। ଉକ୍ତ କମ୍ପାନୀ ଜାଲ୍‌ ଦସ୍ତାବିଜ ବଳରେ ମୁମ୍ବାଇର କୁର୍ଲା ଅଞ୍ଚଳରେ ଅତି କମ୍‌ ମୂଲ୍ୟରେ ଜମି କିଣିଛି। ଏପରି ୪ଟି ଜମି କିଣାଯାଇଛି, ଯହିଁରେ ନଓ୍ବାବ ମଲିକ ଅଣ୍ଡରଓ୍ବାଲର୍‌ଡ ସହ ଡିଲ୍‌ କରିଛନ୍ତି। ୧୯୯୩ ସିରିଏଲ୍‌ ବ୍ଲାଷ୍ଟ୍‌ ମାମଲାରେ ଦୋଷୀ ସାବ୍ୟସ୍ତ ହୋଇଥିବା ସର୍ଦ୍ଦାର ଶାହଓ୍ବାଲି ଖାନ୍‌ ଓ ସଲିମ୍‌ ଇଶାକ୍‌ ପଟେଲଙ୍କଠାରୁ ଏହି ଜମି କିଣାଯାଇଛି। ଶାହଓ୍ବାଲି ଓ ସଲିମ୍‌ ଅଣ୍ଡରଓ୍ବାଲର୍‌ଡ ଡନ୍‌ ଦାଉଦ୍‌ ଇବ୍ରାହିମ୍‌ଙ୍କ ଭଉଣୀ ହସିନା ପାର୍କରଙ୍କ ପାଇଁ କାମ କରୁଥିବାବେଳେ ମୁମ୍ବାଇବାସୀଙ୍କ ହତ୍ୟାକାରୀଙ୍କ ସହ ମଲିକ କାହିଁକି କାରବାର କରିଥିଲେ ବୋଲି ଫଡ୍‌ନବିସ୍‌ ପ୍ରଶ୍ନ କରିଛନ୍ତି। ସେ ମୁଖ୍ୟମନ୍ତ୍ରୀ ଥିବାବେଳେ ମଲିକଙ୍କ ବିଷୟରେ ଏହି ଗୋପନ କଥା ଜାଣି ନ ଥିଲେ। ଯଦି ଜାଣିଥାନ୍ତେ ତେବେ ତାକୁ ପ୍ରଘଟ କରିଥାଆନ୍ତେ। ଏବେ ସେ ଉକ୍ତ ଦସ୍ତାବିଜଗୁଡ଼ିକୁ ସିବିଆଇ, ଇଡି ଏବଂ ଏନ୍‌ଆଇଏ ଭଳି ତଦନ୍ତକାରୀ ସଂସ୍ଥାଗୁଡ଼ିକୁ ଦେବେ ବୋଲି ଚେତାବନୀ ଦେଇଛନ୍ତି। ଏନେଇ ମଲିକ ମଧ୍ୟ ପ୍ରତିକ୍ରିୟା ଦେବାରେ ବିଳମ୍ବ ନ କରି କହିଛନ୍ତି, ଅଣ୍ଡରଓ୍ବାଲର୍‌ଡ ସହ ଜଡ଼ିତ ବ୍ୟକ୍ତି କିମ୍ବା ବମ୍ବେ ବିସ୍ଫୋରଣର ଦୋଷୀଙ୍କଠାରୁ ସେ ଜମି କିଣିନାହାନ୍ତି। ଫଡ୍‌ନବିସ୍‌ ତାଙ୍କ ଛବି ମଳିନ ଲାଗି ଉଦ୍ୟମ କରୁଛନ୍ତି। ସେ ବୁଧବାର ହାଇଡ୍ରୋଜେନ ବୋମା ନିକ୍ଷେପ କରି ଭାଜପା ନେତାଙ୍କ ଅଣ୍ଡରଓ୍ବାଲର୍‌ଡ ଲିଙ୍କ୍‌ର ପର୍ଦ୍ଦାଫାଶ କରିବେ।


Enter your email to get our daily news in your inbox.

All Right Reserved By Dharitri.Com

ଅନ୍ତିମ ପର୍ଯ୍ୟାୟ ମତଦାନ: ସନ୍ଧ୍ୟା ୫ଟା ସୁଦ୍ଧା ୟୁପିରେ ୫୪.୧୮% ଭୋଟିଂ

ଲକ୍ଷ୍ନୌ,୭।୩: ଉତ୍ତରପ୍ରଦେଶରେ ସପ୍ତମ ତଥା ଅନ୍ତିମ ପର୍ଯ୍ୟାୟ ମତଦାନ ସୋମବାର ଅନୁଷ୍ଠିତ ହୋଇଛି। ବାରାଣସୀ ସମେତ ଉତ୍ତରପ୍ରଦେଶର ୯ଟି ଜିଲାର ୫୪ଟି ବିଧାନସଭା ଆସନ ପାଇଁ...

କଥା ଦେଇ କଥା ରଖିଲେ ମୋଦି

ନୂଆଦିଲ୍ଲୀ,୧୬।୮: ଟୋକିଓ ଅଲିମ୍ପିକ୍ସ ୨୦୨୦ରେ ଅଂଶଗ୍ରହଣ କ୍‌ରିଥିବା ଭାରତୀୟ ଖେଳାଳିଙ୍କ ପାଇଁ ସୋମବାର ଏକ ଜଳଖିଆ ପାର୍ଟିର ଆୟୋଜନ ହୋଇଛି। ଏହି ପାର୍ଟିରେ ପ୍ରଧାନମନ୍ତ୍ରୀ ନରେନ୍ଦ୍ର...

ମାସେ ପାରୋଲରେ ଯିବେ ରାମ ରହିମ

ସିରସା,୧୭।୬: ହରିଆଣାର ପଞ୍ଚକୁଲା ବଳାତ୍କାର ମାମଲାରେ ଜେଲ୍‌ରେ ଥିବା ଡେରା ସଚ୍ଚା ସୌଦା ମୁଖ୍ୟ ଗୁରୁମିତ ରାମ ରହିମ ସିଂଙ୍କୁ ଆଶ୍ୱସ୍ତି ମିଳିଛି। ଶୁକ୍ରବାର ରାମ...

କର୍ଣ୍ଣନଙ୍କୁ କରୋନା

ଚେନ୍ନାଇ, ୧୦ା୧୨: ମହିଳା ବିଚାରପତି ଓ ବିଚାରପତିଙ୍କ ସ୍ତ୍ରୀଙ୍କ ଉଦ୍ଦେଶ୍ୟରେ ଆପତ୍ତିଜନକ ମନ୍ତବ୍ୟ ଦେଇ ଗିରଫ ହୋଇଥିବା ମାଡ୍ରାସ ଓ କୋଲକତା ହାଇକୋର୍ଟର ପୂର୍ବତନ ବିଚାରପତି...

ପୁଣି ଚର୍ଚ୍ଚାରେ କୁନି କେଜ୍‌ରିଓ୍ବାଲ୍‌

ଚଣ୍ଡିଗଡ,୧୦।୩: ଆମ ଆଦମୀ ପାର୍ଟି ପଞ୍ଜାବରେ ଇତିହାସ ସୃଷ୍ଟି କରିଛି। ଦଳ ୯୨ ଆସନ ସହ ରାଜ୍ୟରେ ସରକାର ଗଢିବାକୁ ଯାଉଛି। ଦଳର ବିୟରେ କର୍ମୀମାନେ...

ବିଶ୍ୱର ଶହେ ପ୍ରଭାବଶାଳୀ ବ୍ୟକ୍ତିଙ୍କ ମଧ୍ୟରେ ମୋଦି,ମମତା, ପୁନାୱାଲା

ନୂଆଦିଲ୍ଲୀ,୧୬ ।୯: ଟାଇମ୍ ମାଗାଜିନର ୨୦୨୧ ବର୍ଷ ପାଇଁ ପ୍ରକାଶ ପାଇଥିବା ବିଶ୍ୱର ୧୦୦ ପ୍ରଭାବଶାଳୀ ବ୍ୟକ୍ତିଙ୍କ ମଧ୍ୟରେ ପ୍ରଧାନମନ୍ତ୍ରୀ ନରେନ୍ଦ ମୋଦି, ପଶ୍ଚିମବଙ୍ଗ ମୁଖ୍ୟମନ୍ତ୍ରୀ...

ବାବା ଆମ୍‌ତେଙ୍କ ନାତୁଣୀଙ୍କ ଆତ୍ମହତ୍ୟା

ଚନ୍ଦ୍ରପୁର(ମହାରାଷ୍ଟ୍ର), ୩୦।୧୧-ବାବା ଆମ୍‌ତେଙ୍କ ନାତୁଣୀ ତଥା ଜଣାଶୁଣା ସାମାଜିକ କର୍ମୀ ଡ. ଶୀତଲ ଆମ୍‌ତେ-କରାଜ୍‌ଗୀ ସୋମବାର ସକାଳେ ସ୍ଥାନୀୟ ଆନନ୍ଦବନ ଆଶ୍ରମରେ ଆତ୍ମହତ୍ୟା କରିଛନ୍ତି। ସେ...

୨ ଦିନିଆ ଭୁଟାନ ଗସ୍ତରେ ମୋଦି

ନୂଆଦିଲ୍ଲୀ, ୧୭।୮: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶନିବାର ୨ ଦିନିଆ ଭୁଟାନ ଗସ୍ତରେ ଯାଇଛନ୍ତି। ଗସ୍ତକାଳରେ ମୋଦି ବିଭିନ୍ନ କାର୍ଯ୍ୟକ୍ରମରେ ଯୋଗଦେବେ ବୋଲି କୁହାଯାଉଛି। ଏହାସହିତ...

Advertisement
Archives

Model This Week