ଭୁବନେଶ୍ୱର,୧୦।୧(ବ୍ୟୁରୋ): ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏବଂ ତାଙ୍କ ମନ୍ତ୍ରିମଣ୍ଡଳର ସଦସ୍ୟମାନେ ନିଜର ସମ୍ପତ୍ତି ତାଲିକା ପ୍ରଦାନ କରିଛନ୍ତି। ନବୀନଙ୍କ ସମ୍ପତ୍ତି ଗତ ଆର୍ଥିକ ବର୍ଷ ତୁଳନାରେ ୨୦୧୯-୨୦ରେ ୭୧ ଲକ୍ଷ ଟଙ୍କା ବଢିଛି। ୨୦୨୦ ମାର୍ଚ୍ଚ ୩୧ ସୁଦ୍ଧା ନବୀନଙ୍କ ସମ୍ପତ୍ତି ମୂଲ୍ୟ ୬୪.୯୮ କୋଟି ରହିଛି। ସେଥିରେ ଅସ୍ଥାବର ସମ୍ପତ୍ତି ୧,୩୪,୦୪,୫୦୨ ଏବଂ ସ୍ଥାବର ସମ୍ପତ୍ତି ମୂଲ୍ୟ ୬୩,୬୪,୧୫,୨୬୧ ଟଙ୍କା ରହିଛି। ୨୦୧୯-୨୦ରେ ୬୪,୨୬,୮୧,୯୨୪.୯୩ରୁ ୬୪,୯୮,୧୯,୮୬୩ ଟଙ୍କାକୁ ବୃଦ୍ଧି ପାଇଥିବା ମୁଖ୍ୟମନ୍ତ୍ରୀ ଦେଇଥିବା ସମ୍ପତ୍ତି ତାଲିକାରେ ଉଲ୍ଲେଖ କରାଯାଇଛି।
ମୁଖ୍ୟମନ୍ତ୍ରୀଙ୍କର ୧୯୮୦ ମଡେଲର ଆମ୍ବାସାଡର କାର ରହିଛି ଯାହାର ମୂଲ୍ୟ ୮,୯୦୫ ଏବଂ ଅଳଙ୍କାର ମୂଲ୍ୟ ୨,୮୯,୫୮୭ ଟଙ୍କା। ନୂଆଦିଲ୍ଲୀରେ ଥିବା ଏସ୍ବିଆଇ ଶାଖାରେ ୧.୦୩ କୋଟି ଟଙ୍କା ଡିପୋଜିଟ୍ ରହିଛି। ଏଥିସହିତ ସେ ଭୁବନେଶ୍ୱର ଏସ୍ବିଆଇ ଶାଖାରେ ୧୦.୫୬ ଲକ୍ଷ ଟଙ୍କା ଡିପୋଜିଟ୍ ରଖିଛନ୍ତି। ଏହାଛଡ଼ା ଫରିଦାବାଦର ଟିକ୍ରିହେରା ଗ୍ରାମରେ ୨୨.୭ ଏକର ଫାର୍ମ ହାଉସ ରହିଛି। ୨୦୧୭ ମାର୍ଚ୍ଚରେ ହୋଇଥିବା ଆକଳନ ଅନୁଯାୟୀ ଏହାର ମୂଲ୍ୟ ୧୦,୭୫,୫୧,୦୫୧ ଟଙ୍କା । ମୁଖ୍ୟମନ୍ତ୍ରୀ ନୂଆଦିଲ୍ଲୀ ଏପିଜେ ଅବଦୁଲ କଲାମ ରୋଡ୍ରେ ଥିବା ତାଙ୍କ ପୈତୃକ ସମ୍ପତ୍ତିର ୫୦ ପ୍ରତିଶତ ଅଂଶୀଦାର ଅଟନ୍ତି। ଏହାର ମୂଲ୍ୟ ୪୩,୩୬,୧୮,୦୦୦ ଟଙ୍କା ହେବ ବୋଲି ଆକଳନ କରାଯାଇଛି। ଏଥିସହିତ ନବୀନ ନିବାସର ଦୁଇତୃତୀୟାଂଶ ଯାହାର ମୂଲ୍ୟ ୨୦୧୭ ଅଗଷ୍ଟ ୧୮ ତାରିଖରେ କରାଯାଇଥିବା ଆକଳନ ଅନୁଯାୟୀ ୯.୫୨ କୋଟି ଟଙ୍କା ହେବ। ଏଥିସହିତ ମୁଖ୍ୟମନ୍ତ୍ରୀ ତାଙ୍କ ଭଉଣୀ ଗୀତା ମେହେଟ୍ଟାଙ୍କଠାରୁ ୨୦୧୫ରେ ଆଣିଥିବା ୧୫ଲକ୍ଷ ଟଙ୍କାର ଉଧାରକୁ ଶୁଝି ଦେଇଛନ୍ତି। ତେବେ ଫରିଦାବାଦ ଫାର୍ମହାଉସ ବିକ୍ରି କରିବା ପାଇଁ ସେ ୨୦୧୯ ସେପ୍ଟେମ୍ବର ୧୮ରେ ଅଗ୍ରିମ ୧.୨୫ କୋଟି ଆଣିଥିବା ଉଲ୍ଲେଖ କରିଛନ୍ତି।
ରାଜ୍ୟ ସରକାର ଶନିବାର ମୁଖ୍ୟମନ୍ତ୍ରୀଙ୍କ ସମେତ ୨୦ ଜଣ ମନ୍ତ୍ରୀଙ୍କ ଓ୍ବେବ୍ସାଇଟରେ ସମ୍ପତ୍ତି ତାଲିକା ଅପଲୋଡ କରିଛନ୍ତି। ପଞ୍ଚାୟତିରାଜ ମନ୍ତ୍ରୀ ପ୍ରତାପ ଜେନାଙ୍କ ସମ୍ପତ୍ତି ବର୍ଷକରେ ୪୨ ଲକ୍ଷ ଟଙ୍କା ବଢିଛି। ଜେନାଙ୍କ ସମୁଦାୟ ସମ୍ପତ୍ତି ୧୦.୩୫ କୋଟି ହୋଇଥିବାବେଳେ ୨୦୧୯-୨୦ରେ ୩୦ ଲକ୍ଷ ଟଙ୍କା ଋଣ କରିଥିବା ସମ୍ପତ୍ତି ତାଲିକାରେ ଉଲ୍ଲେଖ କରିଛନ୍ତି। ସେହିପରି ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ମନ୍ତ୍ରୀ ନବ କିଶୋର ଦାସଙ୍କର ଦୁଇଟି ରିଭଲଭର ଓ ଗୋଟିଏ ରାଇଫଲ ରହିଛି। ଏଥିସହିତ ତାଙ୍କର ୮୦ଟି ବ୍ୟବସାୟିକ ଗାଡ଼ି ରହିଛି।
ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ବିଭାଗ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁଙ୍କ ଅସ୍ଥାବର ସମ୍ପତ୍ତିର ମୂଲ୍ୟ ୪୩.୨୫ ଲକ୍ଷ ଟଙ୍କା। ତାଙ୍କ ସ୍ତ୍ରୀଙ୍କ ନାମରେ ୧.୦୯ କୋଟି ଟଙ୍କା ମୂଲ୍ୟର ଅସ୍ଥାବର ସମ୍ପତ୍ତି ରହିଛି। ସ୍ବାଇଁଙ୍କ ସ୍ଥାବର ସମ୍ପତ୍ତି ମୂଲ୍ୟ ୧.୬୦ କୋଟି ଟଙ୍କା ରହିଥିବା ବେଳେ ତାଙ୍କ ସ୍ତ୍ରୀଙ୍କ ନାମରେ ସମ୍ପତ୍ତିର ସଂହ ଭାଗ ରହିଛି। ସ୍ବାଇଁଙ୍କ ନାମରେ ୨୦.୩୨ ଲକ୍ଷ ଟଙ୍କାର ଋଣ ରହିଛି।
ସେହିପରି ୨୦୨୦ ମାର୍ଚ୍ଚ ସୁଦ୍ଧା ଅର୍ଥମନ୍ତ୍ରୀ ନିରଞ୍ଜନ ପୂଜାରୀଙ୍କର ୪.୨୪ କୋଟି ଟଙ୍କାର ସମ୍ପତ୍ତି ରହିଛି। ଗୃହ ରାଷ୍ଟ୍ର ମନ୍ତ୍ରୀ ଦିବ୍ୟ ଶଙ୍କର ମିଶ୍ରଙ୍କର ସମ୍ପତ୍ତି ଗତ ମାର୍ଚ୍ଚ ୩୧ ସୁଦ୍ଧା ୭.୩୧ କୋଟି ଟଙ୍କା ଥିବା ବେଳେ କ୍ରୀଡାମନ୍ତ୍ରୀ ତୁଷାରକାନ୍ତି ବେହେରାଙ୍କର ସମ୍ପତ୍ତିର ମୂଲ୍ୟ ୩୨ ଲକ୍ଷ। ସେଥିରେ ଭୁବନେଶ୍ୱର ଚନ୍ଦକାଠାରେ ୪୮୩୦ ବର୍ଗଫୁଟ୍ର ଏକ ପ୍ଲଟ ରହିଛି। ଏଥିସହିତ ତାଙ୍କର ୫ ଲକ୍ଷ ଟଙ୍କା ମୂଲ୍ୟର ଗୋଟିଏ କାର୍ ରହିଥିବାବେଳେ ୧୪୦ ଗ୍ରାମ୍ ସୁନା ଥିବା ସମ୍ପତ୍ତି ତାଲିକାରେ ଉଲ୍ଲେଖ ରହିଛି।
