ଭୁବନେଶ୍ୱର, ୨୦।୬ (ସୁନିତ୍ ମିଶ୍ର): ରାଜ୍ୟର ପ୍ରାୟ ୧୮ ଲକ୍ଷ ସାମାଜିକ ସୁରକ୍ଷା ପେନ୍ସନଭୋଗୀଙ୍କୁ ଗତ ୩ ମାସ ହେଲା ପେନ୍ସନ ଟଙ୍କା ମିଳିନାହିଁ। ଭତ୍ତା ଟଙ୍କା ଉପରେ ନିର୍ଭର କରୁଥିବା ସମସ୍ତଙ୍କୁ ତୁରନ୍ତ ଏହା ପ୍ରଦାନ କରିବାକୁ ବିରୋଧୀ ଦଳ ନେତା ନବୀନ ପଟ୍ଟନାୟକ ଶୁକ୍ରବାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ଚିଠି ଲେଖି ଜଣାଇଛନ୍ତି। ନବୀନ ତାଙ୍କ ଚିଠିରେ ଉଲ୍ଲେଖ କରିଛନ୍ତି, ଗତ ୩ ମାସ ଧରି ପେନ୍ସନ ବନ୍ଦ ରହିବା କାରଣରୁ ସେମାନେ ଚରମ ଅସୁବିଧା, ଅଭାବ ଏବଂ ଅନିଶ୍ଚିତତାର ସମ୍ମୁଖୀନ ହେଉଛନ୍ତି। ଏପରିକି ଗଞ୍ଜାମ ଜିଲାର ବେଗୁନିଆପଡ଼ା ଅଞ୍ଚଳର ସାବିତ୍ରୀ ଡୋରା ପେନ୍ସନ ନ ମିଳିବା କାରଣରୁ ଜୀବନ ହାରିଥିବା ଖବର ଗ୍ରହଣଯୋଗ୍ୟ ନୁହେଁ। ସଫ୍ଟଓ୍ବେରଜନିତ ତ୍ରୁଟି କାରଣରୁ ପେନ୍ସନ ଟଙ୍କା ମିଳିନାହିଁ ବୋଲି କହିବା ଆଶ୍ଚର୍ଯ୍ୟଜନକ। ଏହା ସରକାରଙ୍କ ଅବହେଳା ଓ ମୌଳିକ ଦାୟିତ୍ୱ ପାଳନରେ ବିଫଳତାକୁ ପ୍ରତିଫଳିତ କରୁଛି। ବିଜେଡି ସରକାର ସମୟରେ ପ୍ରତ୍ୟେକ ମାସର ୧୫ ତାରିଖରେ ‘ଜନସେବା ଦିବସ’ ଅବସରରେ ନିୟମିତ ଭାବେ ଲୋକମାନଙ୍କୁ ପେନ୍ସନ ଦିଆଯାଉଥିଲା। ଏହି ବ୍ୟବସ୍ଥାକୁ ସୁପ୍ରିମକୋର୍ଟ ମଧ୍ୟ ପ୍ରଶଂସା କରିଥିଲେ। ବର୍ତ୍ତମାନ ପରିସ୍ଥିତିରେ ସେହି ବ୍ୟବସ୍ଥାର ଗୁରୁତ୍ୱକୁ ପୁଣି ଥରେ ପ୍ରମାଣିତ କରିଛି। ସରକାର ତୁରନ୍ତ ନିର୍ଦ୍ଦିଷ୍ଟ ଅଧିକାରୀଙ୍କ ଜରିଆରେ ପେନ୍ସନ ହିତାଧିକାରୀଙ୍କ ପାଖରେ ପହଞ୍ଚାଉ। ଏଥିଲାଗି ଦାୟୀ ଅଧିକାରୀମାନଙ୍କୁ ବିଳମ୍ବ ହେବାକୁ ନେଇ ଜବାବ ମାଗୁ। ଭବିଷ୍ୟତରେ ଏଭଳି ଘଟଣାର ପୁନରାବୃତ୍ତି ନ ହେବା ଲାଗି ସ୍ଥାୟୀ ବ୍ୟବସ୍ଥା କରାଯାଉ ବୋଲି ନବୀନ ଅନୁରୋଧ କରିଛନ୍ତି।
ସୂଚନାଯୋଗ୍ୟ, ଭାଜପା ଏମ୍ପି ପ୍ରଦୀପ ପାଣିଗ୍ରାହୀ ତାଙ୍କ ସାମାଜିକ ଗଣମାଧ୍ୟମ ଜରିଆରେ ଭତ୍ତା ନ ମିଳିବା ବିଷୟକୁ ନେଇ ଅନେକ କଥା ଲେଖିଛନ୍ତି। ସେ ଉଲ୍ଲେଖ କରିଛନ୍ତି, ଭତ୍ତା ନ ପାଇ ବ୍ୟାଙ୍କ ଓ ପଞ୍ଚାୟତ ଅଫିସ୍ ଦୌଡ଼ି ଦୌଡ଼ି ଗଞ୍ଜାମର ୬୬ ବର୍ଷୀୟ ଅସହାୟ ମହିଳା ସାବିତ୍ରୀ ଡୋରା ବିଷ ପିଇ ଆତ୍ମହତ୍ୟା କରିବା ହୃଦୟବିଦାରକ। ସଫ୍ଟଓ୍ବେର ସମସ୍ୟା କାରଣରୁ ଗଞ୍ଜାମ ଜିଲାରୁ କେବଳ ୧.୪୯ ଲକ୍ଷରୁ ଅଧିକ ହିତାଧିକାରୀ ଭତ୍ତା ପାଇବାରୁ ବଞ୍ଚିତ ଅଛନ୍ତି। ଡିଜିଟାଲ କିମ୍ବା ଅନ୍ଲାଇନ ସଫ୍ଟଓ୍ବେର ଅପ୍ଡେଟ୍ ନାଁରେ ଅସହାୟ ଗରିବ ଲୋକଙ୍କୁ ଭୋକିଲା ରଖାଯାଇପାରିବ ନାହିଁ ବୋଲି ସେ ଉଲ୍ଲେଖ କରିଥିଲେ। ପ୍ରଦୀପଙ୍କ ଏହି ପୋଷ୍ଟପରେ ରାଜନୈତିକ ଏବଂ ପ୍ରଶାସନିକ ମହଲରେ ଅନେକ ଚର୍ଚ୍ଚା ଆରମ୍ଭ ହୋଇଛି।
