ସୋନପୁର,୨୩।୬(ମୃତ୍ୟୁଞ୍ଜୟ ଶତପଥୀ): ସୁବର୍ଣ୍ଣପୁର ସହରରେ ପ୍ରାକୃତିକ ନାଳ ଓ ଜଳାଶୟଗୁଡିକ ଜବରଦଖଲ ହେବାରେ ଲାଗିଛି । ଜବରଦଖଲକାରୀଙ୍କ ବିରୋଧରେ ପ୍ରଶାସନ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନାହିଁ। ଭବିଷ୍ୟତରେ ଏହା ସହରବାସୀଙ୍କ ପାଇଁ ସମସ୍ୟା ସୃଷ୍ଟି କରିବ। ଏପରି କି ବର୍ଷାଦିନେ ସହର ଜଳମଗ୍ନ ହେବା ଆଶଙ୍କା ସୃଷ୍ଟି ହୋଇଛି । ତେଣୁ ଜିଲା ପ୍ରଶାସନ ଓ ପୌର ପ୍ରଶାସନ ପ୍ରାକୃତିକ ନାଳ ଓ ଜଳାଶୟଗୁଡିକୁ ଜବରଦଖଲ ମୁକ୍ତ କରିବାକୁ ବୁଦ୍ଧିଜୀବୀ ମହଲରେ ଦାବି ହେଉଛି ।
ସୁବର୍ଣ୍ଣପୁର ନୂତନ ଜିଲା ଘୋଷଣା ହେବା ପରେ କାମଧନ୍ଦା, ଚାକିରି ତଥା ଝିଅ ପୁଅଙ୍କୁ ପାଠ ପଢାଇବା ପାଇଁ ଗ୍ରାମାଞ୍ଚଳରୁ ଜିଲା ସଦର ମହକୁମାକୁ ଲୋକଙ୍କ ସୁଅ ଛୁଟିଲା । ଲୋକେ ବିଭିନ୍ନ ସ୍ଥାନରେ ଘର ଦ୍ୱାର ନିର୍ମାଣ କରି ରହିଲେ । ସହରର ଜନସଂଖ୍ୟା ବୃଦ୍ଧି ଓ ଲୋକଙ୍କ ଚାହିଦା ଅନୁସାରେ ବଢି ଚାଲିଲା ଜମିର ମୂଲ୍ୟ । ସରକାରଙ୍କ ଧାର୍ଯ୍ୟ ଦରଠାରୁ ଢେର ଚଢା ଦରରେ ବିକ୍ରି ହେଲା ଘର ଡିହ । ଗରିବ ଓ ମଧ୍ୟବିତ୍ତ ଶ୍ରେଣୀର ଲୋକ ଜମି କିଣି ଘର ତୋଳିବା ସ୍ବପ୍ନ । ଏଭଳି ସ୍ଥିତିରେ ଯେ ଯେଉଁଠି ପାଇଲା ସରକାରୀ ଓ ଦୋବୋତ୍ତର ଜାଗା ମାଡି ବସି ଘର ନିର୍ମାଣ କରିଦେଲା । ତାହା ପ୍ରାକୃତିକ ନାଳ ହେଉ କି ଜଳଉତ୍ସ କିମ୍ବା ପୋଖରୀ ଆଡି । ଯେଉଁଠି ସୁବିଧା ହେଲା ଲୋକେ ଘର ନିର୍ମାଣ କରି ରହିଲେ।କେତେକ ଧନୀ ଶ୍ରେଣୀର ଲୋକ ଓ ଚାକିରିଆ ମଧ୍ୟ ଏହାର ଫାଇଦା ଉଠାଇଲେ । ପ୍ରାକୃତିକ ନାଳଗୁଡିକୁ ପୋତି ଲୋକେ ଘର କଲେ। ସେହିପରି ପୁନରୁଦ୍ଧାର ହେଉ ନ ଥିବା ଜଳଉତ୍ସ ଗୁଡିକରେ ମାଟି ପକାଇ ଘର ନିର୍ମାଣ କରିବାରେ ଲାଗିଲେ । ଏହାର କୁପରିଣାମ କିଛି ବର୍ଷ ହେଲା ବର୍ଷାଋତୁରେ ସହରବାସୀଙ୍କୁ ଭୋଗିବାକୁ ପଡୁଛି । ଅପରପକ୍ଷରେ ସୁବର୍ଣ୍ଣପୁର ପୌରାଞ୍ଚଳରେ ହ୍ରାସ ପାଇଥିବା ସରକାରୀ ପୋଖରୀ ସଂଖ୍ୟା ଏବେ ସମସ୍ତଙ୍କ ପାଇଁ ଉଦବେଗର ବିଷୟ ହୋଇଛି । ରାଜାରାଜୁଡା ସମୟରେ ସୁବର୍ଣ୍ଣପୁର ସହରରେ ପ୍ରାୟ ୮୫ ଏକର ପରିମିତ ଜମିରେ ଛୋଟ ବଡ ୯୫ଟି ପାରମ୍ପରିକ ଜଳଉତ୍ସ ଥିଲା । ଏହାର ରକ୍ଷଣାବେକ୍ଷଣ ଦିଗରେ ପୌର ପ୍ରଶାସନ ପକ୍ଷରୁ ଦୃଷ୍ଟି ଦିଆଗଲାନି । ଏବେ ଅଧିକାଂଶ ପୋଖରୀ ପୋତି ହୋଇଗଲାଣି । ଆଉ କିଛି ଜବରଦଖଲକାରୀଙ୍କ କବ୍ଜାକୁ ଚାଲିଗଲାଣି। ଧିରେ ଧିରେ ସହରର ଜଳଉତ୍ସଗୁଡିକ ନିଶ୍ଚିହ୍ନ ହେବାକୁ ବସିଛି । ସହର ମଧ୍ୟରୁ ବର୍ଷା ଜଳ ନିଷ୍କାସନ ପାଇଁ ରାଜାରାଜୁଡା ସମୟରୁ ସୁବନ୍ଦୋବସ୍ତ ହୋଇଥିଲା । ବର୍ଷା ଜଳ ବିଭିନ୍ନ ନାଳ ଦେଇ ମହାନଦୀ ଓ ତେଲନଦୀକୁ ନିଷ୍କାସନ ହେଉଥିଲା । ତେଣୁ ପୂର୍ବରୁ କେବେ ବର୍ଷା ଦିନରେ ସହରରେ କୃତ୍ରିମ ବନ୍ୟା କିମ୍ବା ଜଳମଗ୍ନ ଭଳି ପରିସ୍ଥିତି ସୃଷ୍ଟି ହେଉ ନ ଥିଲା। ଭଲ ଅସରାଏ ବର୍ଷା ହେଲେ ଏବେ ବଡବଜାର, ରାଜାବଗିଚା, ଆମ୍ବେଡକର ଛକ, ଗୋକର୍ଣ୍ଣେଶ୍ୱରପଡା ଓ ଜୟଗୁରୁ ମାର୍କେଟ୍ କମ୍ପ୍ଲେକ୍ସ ମୁଖ୍ୟ ରାସ୍ତାରେ ଜଳସ୍ରୋତ ପ୍ରବାହିତ ହେଉଛି । ମହାରାଜା ହାଇସ୍କୁଲ ଓ ବ୍ଲକ ଶିକ୍ଷା ଅଧିକାରୀଙ୍କ କାର୍ଯ୍ୟାଳୟ ମଝିରେ ଯାଇଥିବା ମୁଖ୍ୟ ନାଳ ଉଭୟ ପାର୍ଶ୍ୱରେ ଲୋକେ ମାଟି ପକାଇ ଘର କଲେଣି । ଏହି ନାଳ ଏବେ ସଙ୍କୁଚିତ ହୋଇ ଛୋଟ ଡ୍ରେନ୍ ଭଳି ଦେଖାଗଲାଣି । ସେହିପରି ଜଳ ନିଷ୍କାସନ ପାଇଁ ସମଲେଇ ମନ୍ଦିର ନିକଟରେ ଥିବା ଖାଇ ଏବେ ନିଶ୍ଚିହ୍ନ ପ୍ରାୟ। ଆମ୍ବେଡକର ଛକ ନିକଟରେ ଥିବା ନାଳ, ଜଳାଶୟ, ଜୟଗୁରୁ ମାର୍କେଟ୍ ସମ୍ମୁଖରେ ଥିବା ଷଣ୍ଢ୍ୟା ବନ୍ଧ ଏବେ ଜବରଦଖଲକାରୀଙ୍କ କବ୍ଜାକୁ ଚାଲିଗଲାଣି। ପୂର୍ବରୁ ଜଳାଶୟକୁ ପୋତି ବସଷ୍ଟାଣ୍ଡ ଓ କଲ୍ୟାଣ ମଣ୍ଡପ ନିର୍ମାଣ ହୋଇଛି । ନାଳକୁ ପୋତି ମାର୍କେଟ୍ କମ୍ପ୍ଲେକ୍ସ ନିର୍ମାଣ ହୋଇଛି। ଜବରଦଖଲକାରୀଙ୍କ ବେପରୁଆ ମନୋଭାବ ଯୋଗୁ ଭବିଷ୍ୟତରେ ସହରବାସୀ ଅସୁବିଧା ଭୋଗିବେ । ତେଣୁ ପ୍ରାକୃତିକ ନାଳ ଓ ଜଳାଶୟଗୁଡିକୁ ପ୍ରଶାସନ ପକ୍ଷରୁ ଜବରଦଖଲ ମୁକ୍ତ କରିବାକୁ ସାଧାରଣରେ ଦାବି ହେଉଛି ।
