ଭୁବନେଶ୍ୱର,୧୪।୧୨(ବ୍ୟୁରୋ): ଓଡ଼ିଆ ଚଳଚ୍ଚିତ୍ରକୁ ନେଇ ଜାତୀୟ ସ୍ତରରେ ଆଲୋଚନା ଆରମ୍ଭ ହୋଇଛି। ଏହାର ଏକ ଭିଡିଓ ମଙ୍ଗଳବାର ସୋସିଆଲ ମିଡିଆରେ ଭାଇରାଲ ହୋଇଥିବା ଦେଖିବାକୁ ମିଳିଛି। ଉକ୍ତ ଭିଡିଓଟି ସିନେ ସମୀକ୍ଷକ ଅନୁପମା ଚୋପ୍ରାଙ୍କ ଦ୍ୱାରା ଆୟୋଜିତ ପ୍ରଥମ ‘ପ୍ୟାନ୍ ଇଣ୍ଡିଆ ଫିଲ୍ମ ମେକର୍ସ ଆଡ୍ଡା’ ସମୟର ବୋଲି ଜଣାପଡୁଛି। ସେଥିରେ ମାଲାୟାଲମ ସିନେମାର ଅଭିନେତା, ନିର୍ଦ୍ଦେଶକ ତଥା ନିର୍ମାତା ପୃଥ୍ବୀରାଜ ସୁକୁମାରନ କହିଛନ୍ତି, ଓଡିଶାର ଏକ ନୂଆ ଚଳଚ୍ଚିତ୍ର ବିଷୟରେ ସମସ୍ତେ ଆଲୋଚନା କରୁଛନ୍ତି। ଫିଲ୍ମ ନାଁ ଟି କ’ଣ ମୁଁ ଭୁଲି ଯାଉଛି। ମୁଁ ଏପର୍ଯ୍ୟନ୍ତ ତାହା ଦେଖି ନାହିଁ। କିନ୍ତୁ ପ୍ରଶାନ୍ତ ନୀଲ ମୋତେ ଉକ୍ତ ଫିଲ୍ମ ବିଷୟରେ କହୁଥିଲେ। ସେ ଆହୁରି କହିଛନ୍ତି, ଆମେ ଏଠାରେ ବସି ହିନ୍ଦୀ, ତେଲୁଗୁ, ତାମିଲ ଏବଂ ମାଲାୟାଲମ୍ ବିଷୟରେ କଥାବାର୍ତ୍ତା କରୁଛୁ। ଯାହା ଜଣାପଡୁଛି, ଆଗାମୀ ଦିନରେ ୫୦୦ କୋଟିର ଚଳଚ୍ଚିତ୍ର ଓଡ଼ିଶା କିମ୍ବା ଆସାମରୁ ବି ଆସିପାରେ ବୋଲି ସୁକୁମାରନ ଆଶାବ୍ୟକ୍ତ କରିଛନ୍ତି। ତେବେ ସେଠାରେ ଉପସ୍ଥିତ ଥିବା ପ୍ରଯୋଜକ ତଥା ଅଭିନେତା କମଲ ହାସନ ମଧ୍ୟ ସେମାନେ ସକ୍ଷମ ବୋଲି କହିଛନ୍ତି। ଏହି ଶୋ’ ବା ଆଲୋଚନାର ନିର୍ଦ୍ଦେଶିକା ସ୍ବପ୍ନା ଦତ୍ତ, ଲୋକେଶ କାନାଗୁରଜ, ଏସ୍.ଏସ୍.ରାଜାମୌଲି, ଗୌତମ ବାସୁଦେବ ମେନନ ପ୍ରମୁଖ ଉପସ୍ଥିତ ଥିଲେ। ଉଲ୍ଲେଖଯୋଗ୍ୟ, ୨୦୨୨ରେ ଦମନ, ପ୍ରତୀକ୍ଷା, ଆଦିୟୁ ଗୋଦାର୍ଡ ଭଳି କେତେକ ଓଡ଼ିଆ ଚଳଚ୍ଚିତ୍ର ଜାତୀୟ ତଥା ଅନ୍ତର୍ଜାତୀୟ ସ୍ତରରେ ମଧ୍ୟ ପ୍ରଶଂସା ଓ ସମ୍ମାନ ଲାଭ କରିଛି। ଓଡ଼ିଶା ଚଳଚ୍ଚିତ୍ରକୁ ନୂଆ ଦିଶା ଦେଖାଇଥିବା ଏସବୁ ଲୋକପ୍ରିୟ ଚଳଚ୍ଚିତ୍ର ଉପରେ ସେମାନଙ୍କ ଆଲୋଚନା ପର୍ଯ୍ୟବସିତ ଥିବା ଜଣାପଡୁଛି।
