ନୂଆଦିଲ୍ଲୀ, ୧୬ା୧୧ (ପି.ଟି.)-କ୍ରୀଡ଼ା ପାଇଁ ଉଲ୍ଲେଖନୀୟ ଅବଦାନ ଲାଗି ଭାରତୀୟ ଅଲିମ୍ପିକ ଆସୋସିଏଶନ (ଆଇଓଏ) ସଭାପତି ନରିନ୍ଦର ବାତ୍ରାଙ୍କୁ ସମ୍ମାନିତ କରାଯାଇଛି। ରବିବାର ବିଶିଷ୍ଟ ବିଚାରପତି ଜଷ୍ଟିସ କ୍ରିଷ୍ଣା ଆୟାରଙ୍କ ୧୦୬ତମ ଜନ୍ମବର୍ଷିକୀ ସ୍ମାରକୀ ଅବସରରେ ତାଙ୍କୁ କ୍ୟାପିଟାଲ ଫାଉଣ୍ଡେଶନ ନ୍ୟାଶନାଲ ପୁରସ୍କାର ପ୍ରଦାନ କରାଯାଇଛି। ବାତ୍ରା ଅନ୍ତର୍ଜାତୀୟ ହକି ମହାସଂଘ (ଏଫ୍ଆଇଏଚ୍)ର ସଭାପତି ଓ ଅନ୍ତର୍ଜାତୀୟ ଅଲିମ୍ପିକ କମିଟିର ଜଣେ ସଦସ୍ୟ ମଧ୍ୟ ଅଛନ୍ତି। ପୂର୍ବତନ ହକି ଖେଳାଳି ବାତ୍ରା ୧୯୯୭ରେ ଜମ୍ମୁ-କଶ୍ମୀର ହକି ଆସୋସିଏଶନ ସଭାପତି ହୋଇ ତାଙ୍କ ପ୍ରଶାସନିକ କ୍ୟାରିୟର ଆରମ୍ଭ କରିଥିଲେ। ଏହି ପଦବୀରେ ସେ ୨୦୧୧ ପର୍ଯ୍ୟନ୍ତ ରହିଥିଲେ। ସେ ୨୦୦୫ରୁ ୨୦୧୩ ପର୍ଯ୍ୟନ୍ତ ଦିଲ୍ଲୀ ଓ ଜିଲା କ୍ରିକେଟ ଆସୋସିଏଶନ (ଡିଡିସିଏ)ର କୋଷାଧ୍ୟକ୍ଷ ଥିଲେ। ପରେ ସେ ହକି ଇଣ୍ଡିଆର ମହାସଚିବ ଏବଂ ୨୦୧୪ରୁ ୨୦୧୬ ପର୍ଯ୍ୟନ୍ତ ଏହାର ସଭାପତି ଦାୟିତ୍ୱ ସମ୍ଭାଳିଥିଲେ। ହକି ଇଣ୍ଡିଆର ବର୍ତ୍ତମାନ ସଭାପତି ବାତ୍ରାଙ୍କୁ ପୁରସ୍କାର ବଧେଇ ଜଣାଇଛନ୍ତି। ଖେଳ ବିକାଶ କ୍ଷେତ୍ରରେ ବାତ୍ରାଙ୍କ ଅବଦାନର ସେ ଉଚ୍ଚ ପ୍ରଶଂସା କରିଛନ୍ତି।
