ଭୁବନେଶ୍ୱର, ୧୬।୯ (କ୍ରୀଡ଼ା ପ୍ରତିନିଧି):ଓଡ଼ିଶାର ତାରକା ଅନ୍ତର୍ଜାତୀୟ ମିଡ୍ଫିଲ୍ଡର ନମିତା ଟପ୍ପୋ ଗୁରୁବାର ହକିକୁ ଅଲ୍ବିଦା ଜଣାଇଛନ୍ତି। ଆହତ ସମସ୍ୟା ଲାଗି ରହିବା ଯୋଗୁ ମାତ୍ର ୨୭ ବର୍ଷ ବୟସରେ ତାଙ୍କୁ ଏହି କଠିନ ନିଷ୍ପତ୍ତି ନେବାକୁ ପଡ଼ିଛି। ପାଦରେ ଆଘାତଜନିତ ସମସ୍ୟା ଲାଗି ରହିଲା। ଦୀର୍ଘଦିନ ହେବ ଖେଳି ନ ପାରିବାରୁ ମୁଁ ଅବସର ନିଷ୍ପତ୍ତି ନେଲି ବୋଲି ଅଲିମ୍ପିଆନ ନମିତା ପ୍ରକାଶ କରିଛନ୍ତି।
ରାଉରକେଲା ପାନପୋଷ କ୍ରୀଡ଼ା ଛାତ୍ରାବାସର ଅନ୍ୟତମ ଶ୍ରେଷ୍ଠ ସୃଷ୍ଟି ହେଉଛନ୍ତି ନମିତା। ୨୦୦୭ରେ ସେ ରାଜ୍ୟ ଦଳ ପକ୍ଷରୁ ଖେଳିବା ଆରମ୍ଭ କରିଥିଲେ। ଘରୋଇ ପ୍ରତିଯୋଗିତାରେ ପ୍ରଭାବୀ ପ୍ରଦର୍ଶନ ଯୋଗୁ ତାଙ୍କୁ ୨୦୧୧ରେ ବ୍ୟାଙ୍କ୍କରେ ଅନୁଷ୍ଠିତ ୧୮ ବର୍ଷରୁ କମ୍ ଭାରତୀୟ ବାଳିକା ଦଳରେ ସାମିଲ କରାଯାଇଥିଲା। ସେଠାରେ ଭାରତ ବ୍ରୋଞ୍ଜ ପଦକ ହାସଲ କରିଥିଲା। କଠିନ ମନୋଭାବ ଏବଂ ଉତ୍ସର୍ଗିକୃତ ମନୋଭାବ କେବେହେଲେ ବେକାର ଯାଏନାହିଁ। ଏହା ପ୍ରମାଣ କରିଥିଲେ ନମିତା। ଜାତୀୟ କ୍ୟାମ୍ପ ହେଉ କିମ୍ବା ଘରୋଇ ସର୍କିଟରେ ସ୍ଥିର ପ୍ରଦର୍ଶନ ଦେବାରୁ ତାଙ୍କୁ ୨୦୧୨ରେ ସିନିୟର ଦଳରେ ସ୍ଥାନ ମିଳିଥିଲା। ଏହିବର୍ଷ ଡବଲିନରେ ଅନୁଷ୍ଠିତ ଏଫ୍ଆଇଏଚ୍ ଚାମ୍ପିୟନ୍ସ ଚ୍ୟାଲେଞ୍ଜ୍ରେ ସେ ଭାରତ ପକ୍ଷରୁ ପ୍ରଥମଥର ପାଇଁ ପ୍ରତିନିଧିତ୍ୱ କରିଥିଲେ। ଏହା ପରବର୍ଷ ସେ ଜର୍ମାନୀର ମନଚେନ୍ଗ୍ଲାଡ୍ବ୍ୟାକ୍ରେ ଅନୁଷ୍ଠିତ ଏଫ୍ଆଇଏଚ୍ ଜୁନିୟର ମହିଳା ହକି ବିଶ୍ୱକପ ପାଇଁ ଭାରତୀୟ ଦଳରେ ସାମିଲ ହୋଇଥିଲେ। ଏହି ପ୍ରତିଯୋଗିତାରେ ଭାରତୀୟ ଦଳ ବ୍ରୋଞ୍ଜ ପଦକ ହାସଲ କରିଥିଲା। ଏହାପରେ ଆଉ ପଛକୁ ଫେରି ଚାହିଁ ନ ଥିଲେ ନମିତା। ୨୦୧୩ରେ ଏଫ୍ଆଇଏଚ୍ ମହିଳା ଓ୍ବାଲର୍ଡ ଲିଗ୍ ରାଉଣ୍ଡ-୨ରେ ସ୍ବର୍ଣ୍ଣ ଏବଂ ସେହିବର୍ଷ ମହିଳା ଏସିଆନ ଚାମ୍ପିୟନ୍ସ ଟ୍ରଫିରେ ରୌପ୍ୟ ପଦକ ବିଜୟୀ ଭାରତୀୟ ଦଳର ସେ ସଦସ୍ୟା ଥିଲେ। ୨୦୧୩ରେ ମହିଳା ଏସିଆ କପ୍, ୨୦୧୪ରେ ରାଜ୍ୟଗୋଷ୍ଠୀ କ୍ରୀଡ଼ାରେ ମଧ୍ୟ ସେ ଖେଳିଥିଲେ। ୨୦୧୪ ଏସିଆନ ଗେମ୍ସରେ ବ୍ରୋଞ୍ଜ ପଦକ ବିଜୟୀ ଭାରତୀୟ ଦଳ ପକ୍ଷରୁ ସେ ପ୍ରତିନିଧିତ୍ୱ କରିଥିଲେ। ୨୦୧୬ ରିଓ ଅଲିମ୍ପିକ୍ସ ଖେଳି ଅଭିଜ୍ଞତା ଆହରଣ କରିଥିଲେ ଏହି ତାରକା ମିଡ୍ଫିଲ୍ଡର। ୨୦୧୭ରେ ମହିଳା ଏସିଆ କପ୍ରେ ରୌପ୍ୟ ଏବଂ ୨୦୧୮ରେ ଏସିଆନ ଗେମ୍ସରେ ରୌପ୍ୟ ପଦକ ବିଜୟୀ ଭାରତୀୟ ଦଳର ମଧ୍ୟ ସେ ସଦସ୍ୟା ଥିଲେ।
