ଭୁବନେଶ୍ୱର, ୩।୧(ବ୍ୟୁରୋ): ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ରାଷ୍ଟ୍ରୀୟ ଅଧ୍ୟକ୍ଷ ଜଗତ୍ ପ୍ରକାଶ ନଡ୍ଡାଙ୍କ ନୀତି ଆଦର୍ଶରେ ଅନୁପ୍ରାଣିତ ହୋଇ ନବରଙ୍ଗପୁର ଜିଲା ବିଜେଡି ସଂଖ୍ୟାଲଘୁ ପ୍ରକୋଷ୍ଠ ସଭାପତି ସୟଦ କାଝାମ ମାଦାନୀ ନିଜ ଶତାଧିକ ସମର୍ଥକଙ୍କୁ ନେଇ ଆନୁଷ୍ଠାନିକ ଭାବେ ଭାଜପାରେ ଯୋଗଦେଇଛନ୍ତି। ରାଜ୍ୟ କାର୍ଯ୍ୟାଳରେ ଅନୁଷ୍ଠିତ ମିଶ୍ରଣ ପର୍ବରେ ରାଜ୍ୟ ସଭାପତି ସମୀର ମହାନ୍ତି ଏବଂ କେନ୍ଦ୍ରମନ୍ତ୍ରୀ ବିଶ୍ୱେଶ୍ୱର ଟୁଡୁ ନୂତନ ଭାବେ ଯୋଗଦାନ କରିଥିବା କାଝାମଙ୍କ ସମେତ ସମସ୍ତ ସଦସ୍ୟଙ୍କୁ ଦଳୀୟ ଉତ୍ତରୀୟ ଓ ଟୋପି ପିନ୍ଧାଇ ଭାଜପାକୁ ସ୍ବାଗତ ଜଣାଇଛନ୍ତି ା ଏହି ଅବସରରେ ଉମରକୋଟ ବିଧାୟକ ତଥା ଭାଜପା ରାଜ୍ୟ ଅନୁସୂଚିତ ଜନଜାତି ମୋର୍ଚ୍ଚା ରାଜ୍ୟ ସଭାପତି ନିତ୍ୟାନନ୍ଦ ଗଣ୍ଡ, ପୂର୍ବତନ ଏମ୍ପି ବଳଭଦ୍ର ମାଝି, ଭୃଗୁ ବକ୍ସିପାତ୍ର, ବିଧାୟକ ମୁକେଶ ମହାଲିଙ୍ଗ ପ୍ରମୁଖ ଉପସ୍ଥିତ ଥିଲେ। ଆଇନଶୃଙ୍ଖଳା, ଶିକ୍ଷା, ସ୍ବାସ୍ଥ୍ୟ ଭଳି ମୌଳିକ ସୁବିଧା ସୁଯୋଗ ପାଇବାରୁ ରାଜ୍ୟବାସୀଙ୍କୁ ସରକାର ବଞ୍ଚିତ କରୁଛନ୍ତି। ଆଦିବାସୀ ଓ ପଛୁଆ ଜିଲା ଭାବେ ପରିଗଣିତ ନବରଙ୍ଗପୁରକୁ ଦେଶର ଆକାଂକ୍ଷୀ ଜିଲା ଭାବେ ଗ୍ରହଣକରି ଅଞ୍ଚଳର ସାମଗ୍ରିକ ବିକାଶ ପାଇଁ ପ୍ରୟାସ ଜାରି ରହିଛି। ହେଲେ ରାଜ୍ୟରେ ଭ୍ରଷ୍ଟାଚାରୀ ଶାସକ ବିଜେଡି ଯୋଗୁ ଅଞ୍ଚଳର ବିକାଶ କାର୍ଯ୍ୟ ସମ୍ପୂର୍ଣ୍ଣ ଠପ୍ ହୋଇଯାଇଛି। ବିଜେଡି ଗରିବ, ଆଦିବାସୀ, ପଛୁଆ ବର୍ଗଙ୍କ ବିକାଶର ବାଧକ ବୋଲି ନେତାମାନେ ମତ ଦେଇଥିଲେ। ବିକାଶଧାରାରେ ନିଜକୁ ସାମିଲକରି ନୂଆ ଓଡ଼ିଶା ଗଠନ ଲକ୍ଷ୍ୟରେ ଭାଜପାରେ ସାମିଲ ହୋଇଥିବାରୁ ସମସ୍ତ ନୂତନ ସଦସ୍ୟଙ୍କୁ ସଭାପତି ମହାନ୍ତି ସ୍ବାଗତ କରିଥିଲେ।
