ଭଣ୍ଡାରିପୋଖରୀ,୧୪।୩: ଭଦ୍ରକ ଜିଲା ଭଣ୍ଡାରିପୋଖରୀ ଥାନା ଅଧୀନ ଦାଣ୍ଡକୁଳ ଗ୍ରାମରେ ଅଧିକ ଯୌତୁକ ପାଇଁ ମିନତି ସେଠୀ ନାମ୍ନୀ ଜଣେ ମହିଳାଙ୍କୁ ହତ୍ୟା କରାଯାଇଥିବା ଅଭିଯୋଗ ହୋଇଛି। ଝିଅକୁ ହତ୍ୟା କରି ଶାଶୁଘର ଲୋକେ ଆତ୍ମହତ୍ୟାର ରୂପ ଦେଉଥିବା ଶନିବାର ଥାନାରେ ଅଭିଯୋଗ କରିଛନ୍ତି ମୃତା ମିନତିଙ୍କ ବାପା ଧାମନଗର ଥାନା ପାହାଡ଼ପୁର ଗ୍ରାମର ମହେଶ୍ୱର ସେଠୀ। ସେ ଏତଲାରେ ଉଲ୍ଲେଖ କରିଛନ୍ତି, ୨୦୧୭ ମେ’ ରେ ମିନତି ଦାଣ୍ଡକୁଳ ଗ୍ରାମର ଧରଣୀଧର ସେଠୀଙ୍କୁ ବିବାହ କରିଥିଲେ। ବିବାହ ପରେ ଶାଶୁଘର ଲୋକ ତାଙ୍କୁ ଏକ ବାଇକ୍ ଆଣିବା ପାଇଁ କହି ନିର୍ଯାତନା ଦେଉଥିଲେ। ବିଭିନ୍ନ ସମୟରେ ମାରଧର କରୁଥିବାରୁ ମିନତି ବାପଘରକୁ ପଳାଇ ଆସୁଥିଲେ। ଏ ନେଇ ଉଭୟ ପକ୍ଷ ମଧ୍ୟରେ ଆପୋଷ ବୁଝାମଣା ହୋଇଥିଲା। ଶୁକ୍ରବାର ହଠାତ୍ ମିନତି ପିନ୍ଧା ଲୁଗାରେ ଆତ୍ମହତ୍ୟା କରିଥିବା ଶାଶୁଘର ଲୋକ ଫୋନ କରି ଜଣାଇଥିଲେ। ମିନତିଙ୍କୁ ଶାଶୁଘର ଲୋକ ମାରିଦେଇ ଆତ୍ମହତ୍ୟା କହୁଥିବା ମହେଶ୍ୱର ଅଭିଯୋଗ କରିଛନ୍ତି। ଏ ନେଇ ଭଣ୍ଡାରିପୋଖରୀ ଥାନାରେ ଏକ ମାମଲା (ନଂ. ୮୮/୨୧) ରୁଜୁ ହୋଇଛି। ଥାନା ଅଧିକାରୀ ମୃତ୍ୟୁଞ୍ଜୟ ପ୍ରଧାନ ଘଟଣାର ତଦନ୍ତ ଚାଳିଥିବା ସୂଚନା ଦେଇଛନ୍ତି।
