ଭୁବନେଶ୍ୱର, ୨୬।୩ (ବ୍ୟୁରୋ): ନୟାଗଡ଼ ଜିଲା ରଣପୁର ଥାନା ମଝିଆଖଣ୍ଡ ଗୋଡ଼ିପୋଖରୀ ଗ୍ରାମର କ୍ୟାମେରାମ୍ୟାନ ମାନସ ସ୍ବାଇଁ ଅପହରଣ ଓ ହତ୍ୟା ମାମଲାରେ କ୍ରାଇମବ୍ରାଞ୍ଚ ଟିମ୍ ବିଭିନ୍ନ ଦିଗକୁ ନେଇ ଖୋଳତାଡ ଚଳାଇଛି। ଗୋଟିଏ ଟିମ୍ ରାଜ୍ୟ ଭିତରେ ତଦନ୍ତ କରୁଥିବାବେଳେ ଅନ୍ୟ ଏକ ଟିମ୍ ରାଜ୍ୟ ବାହାରେ ମୁଖ୍ୟ ଅଭିଯୁକ୍ତ ଶର୍ମିଷ୍ଠା ରାଉତ ଓ ତାଙ୍କ ସହଯୋଗୀଙ୍କୁ ଖୋଜାଖୋଜି କରୁଛି। ତେବେ ଏହା ଭିତରେ ହତ୍ୟା ମାମଲାର ଆଉ ଏକ ରହସ୍ୟ ପଦାକୁ ଆସିଛି। ହତ୍ୟା ପୂର୍ବରୁ ମାନସ ମୃତ୍ୟୁର ଆଭାସ ପାଇଥିଲେ ବୋଲି ଜଣାପଡିଛି। ମାନସଙ୍କୁ ଚାନ୍ଦବାଲିରୁ ଅପହରଣ ପରେ ଭୁବନେଶ୍ୱରର ଏୟାରଫିଲ୍ଡ ଥାନା ଅଞ୍ଚଳରେ ଥିବା ଦୟାଲ ବୃଦ୍ଧାଶ୍ରମରେ ୩ଦିନ ରଖାଯାଇ ପ୍ରବଳ ମାଡ଼ ମରାଯିବା ସହ ଅକଥନୀୟ ନିର୍ଯାତନା ଦିଆଯାଇଥିଲା। ସେଠାରେ ତାଙ୍କୁ ହତ୍ୟା କରାଯାଇ ନୟାଗଡ଼ ଜିଲା ରଣପୁର ବ୍ଲକ୍ ଅନ୍ତର୍ଗତ ନରେନ୍ଦ୍ରପୁର ବୋଧିପାଟଣା ଜଙ୍ଗଲରେ ପୋତି ଦିଆଯାଇଥିଲା। ତେବେ ଦୟାଲ ଆଶ୍ରମରେ ନିର୍ଯାତନା ସମୟରେ ମାନସ ୩ ଫର୍ଦ୍ଦ ବିଶିଷ୍ଟ ଏକ ଚିଠି ଲେଖିଥିଲେ। ଆଶ୍ରମର କେୟାରଟେକର ଉକ୍ତ ଚିଠିକୁ ପାଇଥିବା ଗଣମାଧ୍ୟମ ଆଗରେ କହିବା ପରେ ଏବେ ଏହାକୁ ନେଇ ଚର୍ଚ୍ଚା ଜୋର୍ ଧରିଛି। ତାଙ୍କ କହିବା ଅନୁଯାୟୀ, ଆଶ୍ରମର ଉପର ମହଲାରେ ଝାଡୁ କରୁଥିବାବେଳେ ଏକ ଜରିରେ ଗୁଡ଼ାଯାଇଥିବା ଚିଠିକୁ ସେ ପାଇଥିଲେ। ସେଥିରେ ମାନସ ନିଜ ନାମ, ବାପା ଓ ଗାଁର ନାମ ସହ ମୋବାଇଲ ନମ୍ବର ଉଲ୍ଲେଖ କରି ଲେଖିଥିଲେ ଯେ, ମୋତେ ଅପହରଣ କରାଯାଇଛି। ଆଶ୍ରମରେ ରଖି ମାଡ଼ ମରାଯିବା ସହ ମୋଠାରୁ ମୋବାଇଲ, କ୍ୟାମେରା, ବ୍ୟାଙ୍କ ପାସବୁକ୍, ୪ ହଜାର ଟଙ୍କା ନେଇଯାଇଛନ୍ତି। ଯଦି ମୁଁ ମରିଯାଏ, ତେବେ ମୋ ଶବ ଏ ପାପୀମାନଙ୍କୁ ଦେବ ନାହିଁ, ଗାଁକୁ ପଠାଇ ଦେବ ବୋଲି ମାନସ ଚିଠିରେ ଲେଖିଥିଲେ। ସବୁ ଫର୍ଦ୍ଦରେ ସମାନ କଥା ଲେଖାଯାଇଥିଲା। ଅତ୍ୟଧିକ ଭୟ ଓ ଛାନିଆରେ ମାନସ ବାରମ୍ବାର ତାହାକୁ ଲେଖିଥିବା ଜଣାପଡୁଛି। ତେବେ ଉକ୍ତ ଚିଠିକୁ କେୟାରଟେକର ପଢ଼ିବା ପରେ ଆଶ୍ରମ ତଥା ଓ୍ବେବ୍ ପୋର୍ଟାଲ ‘ସମ୍ପୂର୍ଣ୍ଣ’ର ମାଲିକାଣୀ ଶର୍ମିଷ୍ଠାଙ୍କୁ ଦେଇଥିଲେ। ଏଥିସହ ଆଶ୍ରମକୁ ଅନେକ ବଡ଼ ବଡ଼ିଆ ଲୋକ ଆସୁଥିଲେ ବୋଲି ସେ କହିଛନ୍ତି। ଏହି ଚିଠି ଓ କେୟାର ଟେକରଙ୍କ ବୟାନ କହୁଛି ମାନସଙ୍କୁ ଶର୍ମିଷ୍ଠା ଓ ଅନ୍ୟ ଅଭିଯୁକ୍ତମାନେ କେତେ ନିଷ୍ଠୁର ଭାବେ ହତ୍ୟା କରିଛନ୍ତି। ଏବେ ଶର୍ମିଷ୍ଠା, ଉକ୍ତ ଚିଠି ଓ ଯେଉଁ ଚିପ୍ ପାଇଁ ଏସବୁ ଘଟଣା ଘଟିଛି ସେସବୁ ଏବେ କେଉଁଠି ତାହା ସବୁଠାରୁ ବଡ଼ ପ୍ରଶ୍ନ ହୋଇଛି।
