କେନ୍ଦୁଝର,୧୯।୪(ସ୍ବ.ପ୍ର.) କେନ୍ଦୁଝର ପୌରାଞ୍ଚଳରେ ଗତ କିଛି ଦିନ ଧରି ପୌରପ୍ରଶାସନ ପକ୍ଷରୁ ସରକାରୀ ଜମି ଜବରଦଖଲ ଚିହ୍ନଟ ନେଇ ନିଆଯାଇଥିବା ପଦକ୍ଷେପ ପରେ ମଙ୍ଗଳବାର ଜବରଦଖଲକାରୀଙ୍କୁ ନୋଟିସ ଦିଆଯାଇଛି। ସମୁଦାୟ ୯୦ ଜଣଙ୍କୁ ଏଭଳି ନୋଟିସ ଦିଆଯାଇଛି। ବିଶେଷ କରି ସରକାରୀ ଜମିରେ ବ୍ୟବସାୟିକ ପ୍ରତିଷ୍ଠାନ, ଫୁଟପାଥ ଅବରୋଧ ଏବଂ ପ୍ଲାନ ଉଲ୍ଲଙ୍ଘନ କରି ବ୍ୟବସାୟିକ ଗୃହ ନିର୍ମାଣ ବାବଦରେ ଏହି ନୋଟିସ ଦିଆଯାଇଛି। ନିର୍ବାହୀଅଧିକାରୀ ଦାୟିତ୍ୱରେ ଥିବା ଧିମନ ଚକମା(ଆଇଏଏସ୍)ଙ୍କ ତତ୍ତ୍ୱାବଧାନରେ ଏଭଳି କାର୍ଯ୍ୟନୁଷ୍ଠାନ ଆରମ୍ଭ ହୋଇଛି। ଏଭଳି କାର୍ଯ୍ୟନୁଷ୍ଠାନକୁ ସହରବାସୀ ସ୍ବାଗତ କରିଥିବାବେଳେ ଜବଦଖଲକାରୀଙ୍କ ମଧ୍ୟରେ ଆତଙ୍କ ଖେଳିଯାଇଛି।
ଗତ କିଛି ବର୍ଷ ହେବ କେନ୍ଦୁଝର ପୌରାଞ୍ଚଳରେ ସରକାରୀ ଜମି ଜବରଦଖଲ କରି ବ୍ୟବସାୟିକ ଘର ନିର୍ମାଣ ହୋଇ ଆସୁଥିବା ଅଭିଯୋଗ ହୋଇଆସୁଥିଲା। କାର୍ଯ୍ୟାନୁଷ୍ଠାନ ନିଆଯାଉ ନ ଥିବାରୁ ସହରରେ ଟ୍ରାଫିକ୍ ସମସ୍ୟା ଉକତ୍ଟ ରୂପ ନେଇଛି। ବିଶେଷ କରି ସିରାଜୁଦ୍ଦିନ ଛକଠାରୁ ଧରଣୀଭୂୟଁା ଛକ, ଗାନ୍ଧୀ ଛକଠାରୁ ମହିଳା ମହାବିଦ୍ୟାଳୟ ଏବଂ ଲାବଣ୍ୟ ଛକଠାରୁ ଓଡ଼ିଶା ଖଣି ଯାନ୍ତ୍ରୀକ ବିଦ୍ୟାଳୟ ପର୍ଯ୍ୟନ୍ତ ରାସ୍ତାକୁ ଲାଗି ବହୁ ସଂଖ୍ୟାରେ ବ୍ୟବସାୟିକ କୋଠା ଘର ନିର୍ମାଣ ହୋଇଛି। ଫଳରେ ଉକ୍ତ ଦୋକାନ ବଜାରକୁ ଆସୁଥିବା ଗ୍ରାହକମାନେ ରାସ୍ତା ଉପରେ ୨ ଚକିଆ ଏବଂ ୪ ଚକିଆ ଗାଡ଼ି ରଖୁଛନ୍ତି। ଶତାଧିକ ଗାଡ଼ି ରାସ୍ତାରେ ରହୁଥିବାରୁ ରାସ୍ତା ସଙ୍କୁଚିତ ହୋଇ ଦୈନନ୍ଦିନ ଯାତାୟତରେ ସମସ୍ୟା ଦେଖାଦେଉଛି। ପାର୍କିଂ ବ୍ୟବସ୍ଥା ନ ଥାଇ ରାସ୍ତାକୁ ଲାଗି ବ୍ୟବସାୟିକ ଘର ଅବାଧରେ ନିର୍ମାଣ ହେଉଛି। ପୂର୍ବରୁ ପୌରପାଳିକାର କେତେଜଣ ଅସାଧୁ କର୍ମଚାରୀ ଏଭଳି କାର୍ଯ୍ୟକୁ ପ୍ରୋସତ୍ାହନ ଦେଇ ଆସୁଥିଲେ। ଏହି ନୋଟିସ ପାଇବାର ୩ ଦିନ ମଧ୍ୟରେ ସନ୍ତୋଷ ଜନକ ଉତ୍ତର ନ ମିଳିଲେ ପୌରପାଳିକା ପକ୍ଷରୁ ପୌର ଆଇନ ଅନୁଯାୟୀ କାର୍ଯ୍ୟନୁଷ୍ଠାନ ଗ୍ରହଣ କରାଯିବ ବୋଲି ଜଣାପଡ଼ିଛି। ପୂର୍ବରୁ ବେଆଇନ କାମକୁ ପ୍ରୋତ୍ସାହିତ କରିଥିବା କର୍ମଚାରୀଙ୍କ ବିରୋଧରେ ମଧ୍ୟ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଗଲେ ଆଗାମୀ ଦିନରେ ଏଭଳି ସମସ୍ୟା ଉପୁଜିବ ନାହିଁ ବୋଲି ପୂର୍ବତନ ବିଧାୟକ ସୁବର୍ଣ୍ଣ ନାୟକ କହିଛନ୍ତି ା
