ଢେଙ୍କାନାଳ ଅଫିସ,୧୯।୪: ଢେଙ୍କାନାଳ ସହରର ତାପମାତ୍ରା ଦିନକୁ ଦିନ ବଢ଼ିବାରେ ଲାଗିଛି। ସକାଳୁ ଟାଣ ଖରା ସାଙ୍ଗକୁ ମଧ୍ୟାହ୍ନରେ ତତଲା ପବନ ଓ ଗୁଳୁଗୁଳି ଜନଜୀବନକୁ ଅସ୍ତବ୍ୟସ୍ତ କରିଦେଇଛି। ଏଥିସହ ଘନ ଘନ ବିଦ୍ୟୁତ୍ କାଟ୍ ସହରବାସୀଙ୍କ ମଧ୍ୟରେ ତୀବ୍ର ଅସନ୍ତୋଷ ସୃଷ୍ଟି କରିଛି। ମଙ୍ଗଳବାର ଢେଙ୍କାନାଳର ତାପମାତ୍ରା ୪୧ ଡିଗ୍ରୀ ଟପିଯାଇଥିବା ଜଣାପଡ଼ିଛି।
ସକାଳୁ ସହରର ତାପମାତ୍ରା ହଠାତ ବଢ଼ିଯାଉଥିବାରୁ ପୂର୍ବାହ୍ନ ୧୧ଟା ପରେ ରାସ୍ତା ଶୂନଶାନ ହୋଇପଡୁଛି। ଜରୁରୀ କାର୍ଯ୍ୟ ନ ଥିଲେ ଅଧିକାଂଶ ଲୋକ ପଦାକୁ ବାହାରୁ ନ ଥିବା ବେଳେ ବଜାରରେ ବ୍ୟବସାୟ ମଧ୍ୟ ମାନ୍ଦା ପଡ଼ିଯାଇଛି। ତେବେ ଆଖୁରସ, ପଇଡ଼, ଲସି ଦୋକାନଗୁଡ଼ିକରେ ପ୍ରବଳ ଭିଡ଼ ହେଉଥିବା ଦେଖିବାକୁ ମିଳୁଛି। କିନ୍ତୁ ତାପମାତ୍ରା ସମ୍ପର୍କରେ ପ୍ରଶାସନ ପକ୍ଷରୁ ରେକର୍ଡ କରାଯାଉ ନ ଥିବାରୁ ଜନସାଧାରଣ ଏହା ଠିକ୍ରେ ଜାଣିପାରୁ ନାହାନ୍ତି। ଏପରି ତାତିକୁ ଦେଖି ଜିଲା ପ୍ରଶାସନ ପକ୍ଷରୁ ଆବଶ୍ୟକ ପଦକ୍ଷେପ ନିଆଯାଉଥିବା ଜଣାପଡ଼ିଛି। ଅଂଶୁଘାତ ମୁକାବିଲା ପାଇଁ ଜିଲା ମୁଖ୍ୟ ଚିକିତ୍ସାଳୟ ଏବଂ ଜିଲାର ଅନ୍ୟ ସ୍ବାସ୍ଥ୍ୟକେନ୍ଦ୍ରରେ ପର୍ଯ୍ୟାପ୍ତ ବ୍ୟବସ୍ଥା କରାଯାଇଛି। ଆବଶ୍ୟକ ବେଡ୍ ସହ ଔଷଧ ମହଜୁଦ ରଖାଯାଇଛି। ତେବେ ଅତି ଆବଶ୍ୟକ ନ ପଡ଼ିଲେ ପୂର୍ବାହ୍ନ ୧୦ଟାରୁ ଅପରାହ୍ନ ୩ଟା ପର୍ଯ୍ୟନ୍ତ ଘରୁ ବାହାରକୁ ନ ଯିବା ପାଇଁ ଜନସାଧାରଣଙ୍କୁ ଜିଲା ପ୍ରଶାସନ ପକ୍ଷରୁ ସଚେତନ କରାଯାଉଛି। ଶ୍ରମିକମାନଙ୍କୁ ମଧ୍ୟ ଏହି ସମୟ ମଧ୍ୟରେ କାମ ନ କରିବାପାଇଁ କୁହାଯାଇଥିବା ଜିଲାପାଳ ସରୋଜ କୁମାର ସେଠୀ ପ୍ରକାଶ କରିଛନ୍ତି। ସେହିପରି ବନ୍ୟପ୍ରାଣୀମାନଙ୍କ ଅବସ୍ଥା ମଧ୍ୟ ଚିନ୍ତାଜନକ ହୋଇଛି। ଜିଲାର ବିଭିନ୍ନ ଜଙ୍ଗଲରେ ଥିବା ଜଳାଶୟ ଗୁଡିକ ଶୁଖି ଯାଉଥିବାରୁ ବନ୍ୟପ୍ରାଣୀମାନେ ଜନବସତି ମୁହଁା ହୋଇଛନ୍ତି। ଏ ସଂକ୍ରାନ୍ତରେ ଜିଲା ବନଖଣ୍ଡ ଅଧିକାରୀ ସୁମିତ କର କହିଛନ୍ତି, ହିନ୍ଦୋଳ ରେଞ୍ଜ ସମେତ ଜିଲାର ଅନ୍ୟ ଜଙ୍ଗଲରେ ସୋଲାର ବ୍ୟବସ୍ଥା ମାଧ୍ୟମରେ ପାଣି ପମ୍ପିଙ୍ଗ କରାଯାଇ କଂକ୍ରିଟ କୁଣ୍ଡରେ ରଖାଯିବା ବ୍ୟବସ୍ଥା ହୋଇଛି। ୱାଟର ହାରଭେଷ୍ଟିଙ୍ଗ ଯୋଜନାରେ ବହୁ ଜଙ୍ଗଲରେ ମଧ୍ୟ ଜଳ ସଂରକ୍ଷଣ କରାଯାଇଛି। ତେଣୁ ବନ୍ୟଜନ୍ତୁଙ୍କ ପିଇବା ପାଇଁ ସେପରି ଅସୁବିଧା ହେବନି ବୋଲି ଆଶା କରାଯାଉଛି। ସେହିପରି ଘନ ଘନ ବିଦ୍ୟୁତ୍ କାଟ ଅଭିଯୋଗ ସମ୍ପର୍କରେ ନିର୍ବାହୀ ଯନ୍ତ୍ରୀ ବେଣୁଧର ଦାସ କହିଛନ୍ତି, ହଠାତ ତାପମାତ୍ରା ବୃଦ୍ଧି ଯୋଗୁ ୨ ଦିନ ସମସ୍ୟା ହୋଇଥିଲା। ଏକ ବଡ଼ ଟ୍ରାନ୍ସଫର୍ମର ପୋଡିଯିବାରୁ ବିଦ୍ୟୁତ୍ କାଟ୍ ହୋଇଥିଲା। ଇତିମଧ୍ୟରେ ଟ୍ରାନ୍ସଫର୍ମରକୁ ମରାମତି କରାଯାଇଥିବା ନିର୍ବାହୀ ଯନ୍ତ୍ର ପ୍ରକାଶ କରିଛନ୍ତି।
