ମୁମ୍ବାଇ,୧୩।୧୨: ରାଜଧାନୀ ଦିଲ୍ଲୀ ପରେ ବର୍ତ୍ତମାନ ମୁମ୍ବାଇରେ ବାୟୁ ପ୍ରଦୂଷିତ ହୋଇଥିବା ଖବର ସାମ୍ନାକୁ ଆସିଛି। ଗତ ଏକ ମାସ ହେଲା ମୁମ୍ବାଇର ବାୟୁ ଅତ୍ୟନ୍ତ ପ୍ରଦୂଷିତ ହୋଇଛି। ଏହି ମହାନଗରର ଅବସ୍ଥା ମଧ୍ୟ ଦିଲ୍ଲୀର ଅବସ୍ଥା ଭଳି ରହିଛି। ସିଷ୍ଟମ୍ ଅଫ୍ ଏୟାର କ୍ୱାଲିଟି ଆଣ୍ଡ ଓ୍ବେଦର ଫରକାଷ୍ଟିଂ ଆଣ୍ଡ ରିସର୍ଚ୍ଚ ଅନୁଯାୟୀ, ମହାରାଷ୍ଟ୍ରର ମୁମ୍ବାଇରେ ବତ୍ତର୍ମାନ ବାୟୁର ଗୁଣବତ୍ତା ଖରାପ ଶ୍ରେଣୀରେ ଅର୍ନ୍ତଭୁକ୍ତ। ଗୁରୁବାର ସକାଳେ ଅର୍ଥାତ୍ ୮ଡିସେମ୍ବରରେ ମୁମ୍ବାଇର ବାୟୁ ଗୁଣବତ୍ତା ଦିଲ୍ଲୀଠାରୁ ଅତ୍ୟନ୍ତ ଖରାପ ରହିଥିଲା। ସେହିପରି ଶୁକ୍ରବାର ବିଳମ୍ବିତ ରାତି ଅର୍ଥାତ୍ ଡିସେମ୍ବର ୯ରେ ଦିଲ୍ଲୀର ବାୟୁ ଗୁଣବତ୍ତା ଏକ୍ୟୁଆଇ ଅନୁସାରେ ୨୪୯ ରେକର୍ଡ ହୋଇଥିବା ବେଳେ ମୁମ୍ବାଇରେ ଏହା ୩୦୯ ରହିଥିଲା। ଯାହା ଅତ୍ୟନ୍ତ ଖରାପ୍ ଶ୍ରେଣୀର ବୋଲି ସୂଚାଇଥାଏ। ଅନ୍ୟପଟେ ସୋମବାର ଅର୍ଥାତ୍ ଡିସେମ୍ବର ୧୨ରେ ମୁମ୍ବାଇରେ ଏକ୍ୟୁଆଇ ୨୨୫ ରେକର୍ଡ କରାଯାଇଛି। ଯାହା ରାଜଧାନୀ ଦିଲ୍ଲୀ ତୁଳନାରେ ଅତ୍ୟନ୍ତ ଖରାପ୍। ଦିଲ୍ଲୀର ବାୟୁ ଗୁଣବତ୍ତା ସୋମବାର ୧୫୨ ରହିଥିଲା, ଯାହା ମଧ୍ୟମ ଶ୍ରେଣୀର। ତେବେ ମୁମ୍ବାଇରେ ବାୟୁ ପ୍ରଦୂଷଣକୁ ଦୃଷ୍ଟିରେ ରଖି ସିଷ୍ଟମ୍ ଅଫ୍ ଏୟାର କ୍ୱାଲିଟି ଆଣ୍ଡ ଓ୍ବେଦର ଫରକାଷ୍ଟିଂ ଆଣ୍ଡ ରିସର୍ଚ୍ଚ କର୍ତ୍ତୃପକ୍ଷ ଲୋକଙ୍କୁ ଜନଗହଳିପୂର୍ଣ୍ଣ ସ୍ଥାନକୁ ନ ଯିବା ଏବଂ ମାସ୍କ ପିନ୍ଧିବାକୁ ପରାମର୍ଶ ଦେଇଛନ୍ତି। ବାୟୁ ପ୍ରଦୂଷଣ ଦ୍ୱାରା ମୁମ୍ବାଇରେ ଫୁସ୍ଫୁସ୍ ରୋଗୀଙ୍କ ସଂଖ୍ୟା ବଢ଼ିବାରେ ଲାଗିଛି ବୋଲି ଡକ୍ଟର ଛାୟା ୱାଜା କହିଛନ୍ତି। ଅନ୍ୟପଟେ ମୁମ୍ବାଇର ବାୟୁ ଏତେ ପ୍ରଦୂଷିତ ହେବା ଏହା ପ୍ରଥମ ଘଟଣା ନୁହେଁ। କିନ୍ତୁ ଏହାପୂର୍ବରୁ ବାୟୁ ପ୍ରଦୂଷଣ ଏହି ମହାନଗରରେ ଦିନେ କିମ୍ବା ଦୁଇ ଦିନରୁ ଅଧିକ ରୁହେ ନାହିଁ। ହେଲେ ବର୍ତ୍ତମାନ ଏକ ମାସରୁ ଊର୍ଦ୍ଧ୍ୱ ହେବ ବାୟୁ ଗୁଣବତ୍ତା ସୁଧୁରୁ ନ ଥିବା ବେଳେ ସ୍ବାସ୍ଥ୍ୟକୁ ନେଇ ଚିନ୍ତାର ବିଷୟ ପାଲଟିଛି।
