କୋରାପୁଟ,୧୩ା୧୨(ସ୍ବ.ପ୍ର.):ଆଜିର ଆଧୁନିକ ଯୁଗରେ ଲୋକେ ନିଜ କଳା, ସଂସ୍କୃତିକୁ ବଞ୍ଚାଇ ରଖିବାକୁ ସେତେଟା ଆଗଭର ହେଉ ନ ଥିବା ବେଳେ କୋରାପୁଟ ଜିଲା ପଟ୍ଟାଙ୍ଗି ବ୍ଲକ ପେଟୁରୁ ପଞ୍ଚାୟତର ଦିବ୍ୟାଙ୍ଗ ଦମ୍ପତି ଗଙ୍ଗାଧର ଓ ମୁକ୍ତା ଏ କ୍ଷେତ୍ରରେ ଭିନ୍ନ ପରିଚୟ ସୃଷ୍ଟି କରିଛନ୍ତି। ଡୁଡୁଙ୍ଗା ଓ ଦେଶିଆ ଗୀତ ପରିବେଷଣ କରି ଆଦିବାସୀ ସଂସ୍କୃତି ଓ ପରମ୍ପରାକୁ ସେମାନେ ବଞ୍ଚାଇ ରଖିଛନ୍ତି। ଭାଟିଗୁଡା ଗ୍ରାମ ବାସିନ୍ଦା ଗଙ୍ଗାଧର ଆଡକାଟିଆ (୫୫) ଓ ସ୍ତ୍ରୀ ମୁକ୍ତା (୪୮) ଜନ୍ମାନ୍ଧ ରୂପେ ପରିଚିତ। ଉଭୟେ ଆଦିବାସୀ ବାଦ୍ୟ ଡୁଙ୍ଗଡୁଙ୍ଗା ବଜାଇବା ଓ ଦେଶିଆ ଗୀତ ଗାଇବାରେ ରୁଚି ରଖିଛନ୍ତି। ଆଦିବାସୀଙ୍କ ପରମ୍ପରା ଓ ରୀତିନିତୀ ଉପରେ ଆଧାରିତ ବିଭିନ୍ନ ବିଷୟକୁ ନେଇ ନିଜେ ଗୀତ ଗାଉଥିବାବେଳେ ପରବର୍ତ୍ତୀ ସମୟରେ ଆଦିବାସୀ ଗୀତମରା ଓ ଦେଶିଆ ସଙ୍ଗୀତ ଗାଇ ନିଜ ଗ୍ରାମ ସହ ଆଖପାଖ ଅଞ୍ଚଳରେ ଲୋକଙ୍କ ପ୍ରିୟ ହୋଇପାରିଛନ୍ତି। ସେମାନଙ୍କ ଗୀତରେ ଖୁସି ହୋଇ ଗ୍ରାମବାସୀ ଯାହା ଦେଇଥାନ୍ତି ଉଭୟେ ଗ୍ରହଣ କରି ପରିବାର ପ୍ରତିପୋଷଣ କରିଥାନ୍ତି। କୋରାପୁଟରେ ହେଉଥିବା ଲୋକ ମହୋତ୍ସବ ପରବରେ ଗଙ୍ଗାଧର ଓ ମୁକ୍ତା ଡୁଙ୍ଗାଡୁଙ୍ଗା ବାଜା ବଜାଇ ଦେଶିଆ ଗୀତ ପରିବେଷଣ କରି ଲୋକ ଲୋଚନକୁ ଆସନ୍ତି। ଏଥିପାଇଁ ଏହି ଦମ୍ପତି ପୁରସ୍କୃତ ହୋଇଥିବା ବେଳେ ଉଭୟଙ୍କୁ ପ୍ରଶାସନ ପକ୍ଷରୁ କଳାକାର ଭତା ପ୍ରଦାନ କରାଯାଉଛି ା ୨ ପୁଅ ଓ ଗୋଟିଏ ଝିଅକୁ ନେଇ ସେମାନଙ୍କ ପରିବାର। ବଡପୁଅ ପର୍ଣ୍ଣା (୧୫), ମଝିଆଁ ପୁଅ ପାଳନ(୧୩) ହୋଇଥିବା ବେଳେ ଝିଅର ନାଁ ରହିଛି ନୟମୀ (୧୧) ା ପାଳନ ଓ ନୟମୀ କୋରାପୁଟର ଏକ ଆଶ୍ରମରେ ରହି ପାଠ ପଢୁଛନ୍ତି। ଏହି ଦିବ୍ୟାଙ୍ଗ ଦମ୍ପତଙ୍କ ସମ୍ପର୍କରେ ଅବସରପ୍ରାପ୍ତ ଶିକ୍ଷକ ସୁକୁମାର ବିଶ୍ୱାଳ କହନ୍ତି, ଦୀର୍ଘ ବର୍ଷ ହେଲା ଉଭୟେ ଡୁଙ୍ଗାଡୁଙ୍ଗା ବଜାଇ ଦେଶିଆ ଗୀତ ଗାଇ ସେମାନଙ୍କ ପରିବାର ଚଳାଇ ଆସୁଛନ୍ତି। ସେହିପରି ଜିଲା ଆଦିବାସୀ ଉନ୍ନୟନ ପରିଷଦ ଅଧ୍ୟକ୍ଷ ଚନ୍ଦ୍ରଶେଖର ମାଝି ଏହି ଦିବ୍ୟାଙ୍ଗ ଦମ୍ପତିଙ୍କ ପାଇଁ ଗୃହ ଓ ଆର୍ଥତ୍କ ସହାୟତା ଯୋଗାଇ ଦେବାକୁ ପ୍ରତିଶ୍ରୁତି ଦେଇଛନ୍ତି।
