ଭୁବନେଶ୍ୱର,୧୬।୬(ସୂର୍ଯ୍ୟକାନ୍ତ ବେହେରା): ଟ୍ରାଫିକ ନିୟମ ଉଲ୍ଲଂଘନ ନ କରି କିମ୍ବା ଘରେ ଗାଡି ରହିଥିବାବେଳେ ବି ଅନେକ ସମୟରେ ମୋବାଇଲ୍କୁ ଚାଲାଣ କଟିବାର ମେସେଜ୍ ଆସୁଛି। ଗାଡି ନମ୍ବରକୁ ଅପବ୍ୟବହାର କରି ନିୟମ ଉଲ୍ଲଂଘନକାରୀମାନେ ରାସ୍ତାରେ ଯାତାୟତ କରୁଥିବାବେଳେ ଚାଲାଣ ବୋଝ ବୋହୁଛନ୍ତି ପ୍ରକୃତ ମାଲିକ। ଅର୍ଥାତ୍ ଗୋଟିଏ ନମ୍ବରରେ ଚାଲୁଛି ଏକାଧିକ ଗାଡ଼ି। ସଡକ ସୁରକ୍ଷା ଓ ଟ୍ରାଫିକ ନିୟମ ଉଲ୍ଲଂଘନ ପାଇଁ ଯାନବାହନ ଯାଞ୍ଚ ସହିତ ଅନ୍ଲାଇନରେ ଚାଲାଣ କଟାଯାଉଥିବାରୁ ଅମାନିଆ ଆପଣାଉଛନ୍ତି ଏପରି ନୂଆ ପନ୍ଥା। କିଏ ଫାଇନରୁ ବର୍ତ୍ତିବା ପାଇଁ ତ ପୁଣି କିଏ ଅପରାଧ କରି ଖସି ଯିବା ପାଇଁ ଅନ୍ୟ ଗାଡି ନମ୍ବରକୁ ବ୍ୟବହାର କରୁଛନ୍ତି। ସେହିପରି ଆଉ କେହି ଫାଇନାନ୍ସ କର୍ମଚାରୀଙ୍କଠାରୁ ବର୍ତ୍ତିବାକୁ ଏଭଳି ପନ୍ଥା ଆପଣାଉଥିବା ଜଣାପଡିଛି। ଗତ କିଛିଦିନ ତଳେ ନମ୍ବର ପ୍ଲେଟର କିଛି ନମ୍ବର ଲିଭାଇବା, ଚୁଇଙ୍ଗମ ଲଗାଇବା ଓ ରୁମାଲ ଭିଡି ଦ୍ରୁତ ଗତିରେ ଖସି ଯାଉଥିବାବେଳେ ପୋଲିସ ହାବୁଡ଼ରେ ପଡିଥିଲେ। ଏପରିକି ଗୋଟିଏ ନମ୍ବରରେ ଦୁଇଟି ଗାଡି ଚାଲୁଥିବା ମଧ୍ୟ ଧରାପଡିଛି। ରାଜଧାନୀ ଭୁବନେଶ୍ୱରରେ ଏଭଳି ମାଳ ମାଳ ଗାଡି ଚାଲୁଥିବା ଜଣାପଡିଛି । ଗତ ୮ ମାସ ମଧ୍ୟରେ ଏଭଳି ୨୦ଜଣ ଅମାନିଆଙ୍କୁ ଟ୍ରାଫିକ ପୋଲିସ ଧରିବାରେ ସଫଳ ହୋଇଛି। କିଏ ଅଟୋ ନମ୍ବରକୁ ବାଇକରେ ତ ପୁଣି କିଏ ବାଇକ ନମ୍ବରକୁ ସ୍କୁଟିରେ ବ୍ୟବହାର କରୁଥିବା ସୂଚନା ମିଳିଛି। ଏଭଳି ଅମାନିଆଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ସହ ଗାଡି ଜବତ କରାଯିବ ବୋଲି ଟ୍ରାଫିକ ଏସିପି ସ୍ବସ୍ତିକ ପଣ୍ଡା କହିଛନ୍ତି। ଏହାସହ ଯେଉଁ ବ୍ୟକ୍ତି ଘରୁ ବାହାରକୁ ଗାଡି ନ ନେଇ ଚାଲାଣ କଟିବାର ମେସେଜ୍ ପାଉଛନ୍ତି, ସେମାନେ ତୁରନ୍ତ ଟ୍ରାଫିକ୍ ପୋଲିସ ଅଫିସ ଆସି ଜଣାଇବାକୁ ଜନସାଧାରଣଙ୍କୁ ସେ ଅନୁରୋଧ କରିଛନ୍ତି। ଫଳରେ ଅପରାଧୀ ବା ନିୟମ ଉଲ୍ଲଂଘନକାରୀଙ୍କୁ ସହଜରେ ଧରି ହେବ ବୋଲି ପଣ୍ଡା କହିଛନ୍ତି।
ସୂଚନାଯୋଗ୍ୟ, ଆଗକୁ ହାଇ ସିକ୍ୟୁରିଟି ନମ୍ବର ପ୍ଲେଟ୍ ଯାଞ୍ଚକୁ କଡାକଡି କରାଯିବ। ଏପରିସ୍ଥଳେ ନିୟମ ଉଲ୍ଲଂଘନକାରୀମାନେ ଅଧିକ ସଂଖ୍ୟାରେ ଧରାପଡିବେ ଓ ଏପରି ନକଲି ନମ୍ବରରେ ଗାଡି ଚଳାଚଳ କମିଯିବ ବୋଲି ଆଶା କରାଯାଉଛି।
