ନୂଆଦିଲ୍ଲୀ,୧।୨: ରିଲାଏନ୍ସ କମ୍ପାନୀର ମାଲିକ ମୁକେଶ ଅମ୍ବାନୀ ପୁଣି ଥରେ ଦେଶର ସବୁଠାରୁ ଧନୀ ବ୍ୟକ୍ତି ହୋଇଛନ୍ତି। ସର୍ବାଧିକ ନେଟଓ୍ବର୍ଥ ମୂଲ୍ୟ ଦୃଷ୍ଟିରୁ ମୁକେଶ ଅମ୍ବାନୀ ଆଦାନୀ ଗ୍ରୁପର ମାଲିକ ଗୌତମ ଆଦାନୀଙ୍କୁ ପଛରେ ପକାଇଦେଇଛନ୍ତି। ଏନେଇ ବୁଧବାର ଫୋର୍ବସ୍ ପକ୍ଷରୁ ସୂଚନା ଦିଆଯାଇଛି। ଗୌତମ ଆଦାନୀଙ୍କ ଶେୟାରରେ ହ୍ରାସ ଯୋଗୁ ତାଙ୍କର ନିଟ୍ ମୂଲ୍ୟ ୮୩.୯ ବିଲିୟନ ଡଲାର ପହଞ୍ଚିଥିବା ବେଳେ ରିଲାଏନ୍ସ ମାଲିକ ମୁକେଶ ଅମ୍ବାନୀଙ୍କ ନିଟ୍ ମୂଲ୍ୟ ବର୍ତ୍ତମାନ ୮୪.୩ ବିଲିୟନ ଡଲାରରେ ପହଞ୍ଚିଛି। ଫୋର୍ବସ ଅନୁଯାୟୀ, ଆଦାନୀ ବର୍ତ୍ତମାନ ଦୁନିଆର ସବୁଠାରୁ ଧନୀ ବ୍ୟକ୍ତିଙ୍କ ତାଲିକାରେ ୧୦ନମ୍ବରରେ ରହିଥିବା ବେଳେ ଅମ୍ବାନୀ ୯ ନମ୍ବରରେ ଅଛନ୍ତି। ରିପୋର୍ଟ ଅନୁଯାୟୀ, ଗତ ୨୪ ଘଣ୍ଟା ମଧ୍ୟରେ ଆଦାନୀ ୧୦ଶହ କୋଟି ଟଙ୍କାର କ୍ଷତି ହୋଇଛି। ଅନ୍ୟପଟେ ଦୁନିଆର ସବୁଠାରୁ ଧନୀ ବ୍ୟକ୍ତିଙ୍କ ତାଲିକାର ଟପ୍-୧୦ରେ ବର୍ନାର୍ଡ ଆର୍ନଲ୍ଟ ଏକ ନମ୍ବରରେ ରହିଛନ୍ତି। ତାଙ୍କର ନିଟ୍ ମୂଲ୍ୟ ୨୧୪ବିଲିୟନ ଡଲାର ରହିଛି। ସେହିପରି ଏଲୋନ ମସ୍କ ଦ୍ୱିତୀୟ ସ୍ଥାନରେ ଥିବା ବେଳେ ତାଙ୍କର ନେଟୱାଥର୍ର୍ ୧୭୮.୩ ବିଲିୟନ ଡଲାର୍ ରହିଛି। ଏହାପରେ ଜେଫ ବେଜୋସ ୧୨୬.୩ ବିଲିୟନ ଡଲାର ସମ୍ପତ୍ତି ସହିତ ତୃତୀୟ ସ୍ଥାନରେ ଥିବା ଜଣାପଡ଼ିଛି। ଏହି ତାଲିକାର ଚତୃର୍ଥରେ ୧୧.୯ ବିଲିୟନ ଡଲାର ସହ ଲ୍ୟାରୀ ଏଲିସନ୍, ପଞ୍ଚମରେ ଓ୍ବାରେନ୍ ବଫେଟ(୧୦୮.୫ ବିଲିୟନ ଡଲାର), ଷଷ୍ଠରେ ବିଲ୍ ଗେଟ୍ସ୍ (୧୦୪.୫ ବିଲିୟନ ଡଲାର), ସପ୍ତମ ସ୍ଥାନରେ କାର୍ଲୋସ୍ ସ୍ଲିମ୍ (୯୧.୭ ବିଲିୟନ ଡଲାର), ଅଷ୍ଟମରେ ଲ୍ୟାରୀ ପେଜ୍ (୮୫.୮ବିଲିୟନ ଡଲାର), ନବମରେ ମୁକେଶ ଅମ୍ବାନୀ ଓ ଦଶମରେ ଗୌତମ ଆଦାନୀ ରହିଛନ୍ତି।
