ଲକ୍ଷ୍ନୌ,୧୯ ।୭: ସମାଜବାଦୀ ପାର୍ଟି ଏମ୍ପି ଆଜମ ଖାଁ ପୁଣି ଅସୁସ୍ଥ ହୋଇପଡିଛନ୍ତି । ତାଙ୍କୁ ସୀତାପୁର ଜେଲରୁ ଲକ୍ଷ୍ନୌର ମେଦାନ୍ତ ହସ୍ପିଟାଲରେ ଭର୍ତ୍ତି କରାଯାଇଛି । ପ୍ରାୟ ୧ ସପ୍ତାହ ପୂର୍ବେ ସେ ହସ୍ପିଟାଲରୁ ଡିସଚାର୍ଜ ହୋଇଥିବା ବେଳେ ଏବେ ପୁଣିଥରେ ଅସୁସ୍ଥ ହୋଇ ପଡିଛନ୍ତି । ସୂଚନାଯୋଗ୍ୟ, ସୋମବାର ତାଙ୍କର ଅକ୍ସିଜେନ ଲେବଲ ୯୦ ହୋଇଯାଇଥିବା ବେଳେ, ଚିନ୍ତାରେ ପଡିଯାଇଥିଲେ ଜେଲ ଅଧିକାରୀ । ଏହାପରେ ଡାକ୍ତର ଡାକି ତାଙ୍କର ସ୍ୱାସ୍ଥ୍ୟ ପରୀକ୍ଷା କରାଯିବା ପରେ ତାଙ୍କୁ ହସ୍ପିଟାଲରେ ଭର୍ତ୍ତି କରାଯିବାକୁ ସ୍ଥିର କରାଯାଇଥିଲା । ରାମପୁରର ଏମ୍ପି ତଥା ସମାଜବାଦୀ ପାର୍ଟି ନେତା ଆଜମ ଖାଁ୨୭ ଫେବୃୟାରୀ ୨୦୨୦ରୁ ସୀତାପୁର ଜେଲରେ ବନ୍ଦୀ ଜୀବନ କାଟୁଛନ୍ତି । ୩୦ ଏପ୍ରିଲ ୨୦୨୧ରେ କରୋନାର ଦ୍ୱିତୀୟ ଲହର ଚାଲିଥିବା ବେଳେ ଜେଲ ପ୍ରଶାସନ କେତେଜଣ କଏଦୀଙ୍କ ସାମ୍ପଲ ସଂଗ୍ରହ କରି ପରୀକ୍ଷା କରାଇଥିଲା । ସେମାନଙ୍କ ମଧ୍ୟରୁ ଆଜମଙ୍କ ସମେତ ୧୩ ଜଣ କରୋନାରେ ପୀଡ଼ିତ ଥିବା ମେ’ ୧ର ଆସିଥିବା ରିପୋର୍ଟରୁ ଜଣାପଡିଥିଲା । କିଛିଦିନ ଆଜମଙ୍କୁ ଜେଲରେ ଚିକିତ୍ସା କରାଯାଇଥିଲେ ବି ତାଙ୍କ ସ୍ୱାସ୍ଥ୍ୟରେ କୌଣସି ପରିବର୍ତ୍ତନ ନ ଆସିବାରୁ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା ।
