ସାଲେପୁର,୨୯।୧୧(ଡି.ଏନ୍.ଏ.): ଜଣେ ବୋହୂ ଶାଶୁଘର ସମ୍ମୁଖରେ ଧାରଣାରେ ବସିବା ଓ ସମ୍ପୃକ୍ତ ବୋହୂକୁ ସମର୍ଥନ କରି ଉକ୍ତ ଗ୍ରାମର ଏସ୍ଏଚ୍ଜି ମହିଳା ଧାରଣାରେ ବସିବା ଚର୍ଚ୍ଚାର ବିଷୟ ହୋଇଛି। ପ୍ରକାଶ ଯେ, ସାଲେପୁର ଥାନା ଅନ୍ତର୍ଗତ ବାଲିସାହି ଗ୍ରାମର ସନାତନ ମହାରଣାଙ୍କ ପୁଅ ସୁସେନ୍ ମହାରଣା ୨୦୨୦ ଜୁଲାଇ ୧୩ରେ ଢ଼େଙ୍କାନାଳ ଥାନା ଅନ୍ତର୍ଗତ ରାଧାକୃଷ୍ଣ ବଜାରର ସତ୍ୟନାରାୟଣ ମହାରଣାଙ୍କ ଝିଅ ସସ୍ମିତା ମହାରଣାଙ୍କୁ ବୈଦିକ ରୀତିରେ ବିବାହ କରିଥିଲେ। ବିବାହର ୩ମାସ ପର୍ଯ୍ୟନ୍ତ ସସ୍ମିତା ଶ୍ୱଶୁର ଘରେ ରହିଥିବାବେଳେ ୩ମାସ ପରେ ଶ୍ୱଶୁର ଓ ସ୍ବାମୀ କୌଶଳ କ୍ରମେ ସସ୍ମିତାକୁ ତାଙ୍କ ବାପଘରକୁ ପଠାଇ ଦେଇ ଆଉ ଘରକୁ ଆଣିନଥିଲେ। ସସ୍ମିତା ବାରମ୍ବାର ଶ୍ୱଶୁର ଘରକୁ ଆସିଥିଲେ ମଧ୍ୟ ଶ୍ୱଶୁର ଘର ଲୋକେ ତାଙ୍କୁ ଘରେ ପୂରାଇ ନ ଦେବା ସହ ତାଲା ପକାଇଦେଇଥିଲେ। କୌଣସି ଉପାୟ ନପାଇ ସସ୍ମିତା ସ୍ତ୍ରୀର ମର୍ଯ୍ୟାଦା ଦାବି କରି ସୋମବାର ଶ୍ୱଶୁର ଘର ସମ୍ମୁଖରେ ଧାରଣା ଦେଇଛନ୍ତି। ସସ୍ମିତାଙ୍କୁ ସମର୍ଥନ କରି ଉକ୍ତ ଗ୍ରାମର ବହୁ ମହିଳା ଏହି ଧାରଣାରେ ସାମିଲ ହେବା ସହ ତାଙ୍କୁ ନ୍ୟାୟ ନମିଳିବା ପର୍ଯ୍ୟନ୍ତ ଧାରଣା ଜାହିରହିବ ବୋଲି କହିଛନ୍ତି। ଅପରପକ୍ଷରେ ଶ୍ୱଶୁର ଘର ପରିବାର ସଦସ୍ୟ ଘରେ ତାଲା ପକାଇ କେଉଁଆଡ଼େ ପଳାଇଛନ୍ତି। ଆଇନଶୃଙ୍ଖଳାକୁ ଆଖିଆଗରେ ରଖି ସାଲେପୁର ପୋଲିସ ପକ୍ଷରୁ ନବବଧୂକୁ ବୁଝାଶୁଝା କରାଯାଉଥିଲେ ମଧ୍ୟ ନବବଧୂ ନିଜ ଜିଦ୍ରେ ଅଟଳ ରହିବା ସହ ନ ଖାଇ ନ ପିଇ ଧାରଣାରେ ବସିଛନ୍ତି।
