ରାଜନଗର,୨୭।୯(ଭାସ୍କର ରାଉତରାୟ): ଯୁଗେ ଯୁଗେ ସନ୍ତାନ ଯେତେବେଳେ ବିପଦରେ ପଡେ ସେଇଠି ମାନବ ହେଉ ବା ବନ୍ୟପ୍ରାଣୀ ସନ୍ତାନକୁ ବିପଦ ମୁହଁରୁ ରକ୍ଷା ପାଇଁ ଜୀବନକୁ ବାଜିରେ ଲଗାଇବାକୁ ପଛାଇ ନଥାଏ । ଏମିତି ଏକ ଦୃଶ୍ୟ ଦେଖିବାକୁ ମିଳିଛି ଭିତରକନିକା ରାଜ୍ୟର ପ୍ରଥମ ଜାତୀୟ ଉଦ୍ୟାନ ଭିତରେ । ବଉଳା କୁମ୍ଭୀରମାନଙ୍କ ଭୂସ୍ବର୍ଗ ଜାତୀୟ ଉଦ୍ୟାନ ସଂଲଗ୍ନ କାଳି ଭଂଜଡ଼ିଆ ଦୀପରେ ଏକ ହରିଣ ଛୁଆ ଭାସିଯାଇଥିଲା ।
ତିନିମାସର ଛୁଆ ସହିତ ନଦୀ କୂଳରେ ଖାଦ୍ୟ ସଂଗ୍ରହ ସମୟରେ ହରିଣ ଶାବକଟି ନଦୀ ସ୍ରୋତରେ ଭାସି ଯିବାରୁ ମା ହରିଣୀ ନିଜ କୁନି ଶାବକକୁ ଉଦ୍ଧାର କରିବା ପାଇଁ ପାଣିକୁ ଡ଼େଇଁପଡିଥିଲା । ଏହି ଦୃଶ୍ୟ ଦେଖଣାହାରିଙ୍କୁ ଆଶ୍ଚର୍ଯ୍ୟ କରିଦେଇଛି ।
ପରେ ଜାତୀୟ ଉଦ୍ୟାନ ବନପାଳ ପ୍ରଶାନ୍ତ ସିଂ ତାଙ୍କ ଟିମ ସହ ବୋଟ ମାଧ୍ୟମରେ ଭରା ନଈରୁ ହରିଣ ଏବଂ ତାର ଶାବକକୁ ଉଦ୍ଧାର କରି ଉଦ୍ୟାନ ଭିତରେ ଛାଡିଦେଇଛନ୍ତି । ମା’ର ତ୍ୟାଗ ନିକଟରେ ସବୁ ବିପଦ ଉଭେଇ ଯାଏ ଯାହା ଏହି ଘଟଣା ପ୍ରମାଣ କରୁଛି ।
