ଭୁବନେଶ୍ୱର, ୭ା୩(ବ୍ୟୁରୋ): ଭୁବନେଶ୍ୱର ମହାନଗର ନିଗମ(ବିଏମ୍ସି) ନିର୍ବାଚନ ଲାଗି ସୋମବାର ନାମାଙ୍କନ ଦାଖଲର ଶେଷ ଦିନ। ହେଲେ ଏ ପର୍ଯ୍ୟନ୍ତ ବିଜେଡିର ଏକାଧିକ ପ୍ରାର୍ଥୀ ନାମାଙ୍କନ ଦାଖଲ କରିନାହାନ୍ତି। ଯଦିଓ ୩ ପ୍ରମୁଖ ରାଜନୈତିକ ଦଳ ବିଜେଡି, ଭାଜପା ଓ କଂଗ୍ରେସ ନିଜର ମେୟର ପ୍ରାର୍ଥୀ ଘୋଷଣା କରିସାରିଛନ୍ତି, ତଥାପି କର୍ପୋରେଟର ଟିକେଟ ବଣ୍ଟିବା ସମସ୍ତଙ୍କ ପାଇଁ ଚିନ୍ତାର ବିଷୟ ପାଲଟିଛି। କେତେ ସ୍ଥାନରେ ବିଜେଡିର ଆଶାୟୀ ପ୍ରାର୍ଥୀମାନେ ଟିକେଟ ପାଇବା ପୂର୍ବରୁ ନାମାଙ୍କନ ପତ୍ର ଦାଖଲ କରିଛନ୍ତି। ବିଜେଡିରେ ଆଶାୟୀଙ୍କ ସଂଖ୍ୟା ବହୁତ ଥିବା କାରଣରୁ ଶାସକ ଦଳ ଶେଷ ଦିନ ପର୍ଯ୍ୟନ୍ତ ଟିକେଟ ଦେଇନାହିଁ। ନାମାଙ୍କନ ଶେଷ ହେବାପରେ ବିଜେଡି ପକ୍ଷରୁ ନିର୍ବାଚନ ଅଧିକାରୀଙ୍କ ନିକଟରେ ଦଳୀୟ ପ୍ରାର୍ଥୀଙ୍କ ପାଇଁ ଟିକେଟ ଦିଆଯିବ। ଏହାଦ୍ୱାରା ଅସନ୍ତୁଷ୍ଟ ପ୍ରାର୍ଥୀମାନଙ୍କୁ ନିଜ ଦଳରେ ସାମିଲ କରି ପ୍ରାର୍ଥୀ କରିବାର ବିରୋଧୀଙ୍କ ସ୍ବପ୍ନ ଆଉ ପୂରଣ ହୋଇପାରିବ ନାହିଁ। ତେବେ ବହୁ ପୂର୍ବତନ କର୍ପୋରେଟରଙ୍କ ଟିକେଟ ଜାଣିଶୁଣି କାଟି ଦିଆଯାଉଛି ବୋଲି ଅଭିଯୋଗ ଆସିଛି। ପୂର୍ବତନ କର୍ପୋରେଟର ଦେବାଶିଷ ସିଠ ତାଙ୍କ ହଜାର ହଜାର ସମର୍ଥକଙ୍କ ସହ ଟିକେଟ କଟିବା ଅଭିଯୋଗ ନେଇ ଦଳର ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସଙ୍କ ସରକାରୀ ବାସଭବନ ଘେରି ନାରାବାଜି କରିଥିବା ଦେଖିବାକୁ ମିଳିଛି।
ଅନ୍ୟପକ୍ଷରେ ଭାଜପା ମେୟର ପ୍ରାର୍ଥତ୍ନୀ ସୁନୀତି ମୁଣ୍ଡ୍ ମଧ୍ୟ ଶେଷ ଦିନରେ ନାମାଙ୍କନ ଦାଖଲ କରିବେ। ଭୁବନେଶ୍ୱରର ୩ ବିଧାନସଭା କ୍ଷେତ୍ର ମଧ୍ୟରେ ଆସୁଥିବା କେତେଗୁଡିଏ ଆସନ ଲାଗି ପ୍ରାର୍ଥୀମାନେ ଶୋଭାଯାତ୍ରା କରି ନାମାଙ୍କନ ଦାଖଲ କରିଛନ୍ତି। ବାକି ଓ୍ବାର୍ଡଗୁଡିକ ଲାଗି ଆଶାୟୀ ଥିବା ପ୍ରାର୍ଥୀମାନେ ଶେଷଦିନକୁ ଅପେକ୍ଷା କରିଛନ୍ତି। ରବିବାର ସୁଦ୍ଧା ବହୁ ପ୍ରାର୍ଥୀଙ୍କୁ ଭାଜପା ତା’ର ଟିକେଟ ବାଣ୍ଟି ସାରିଥିବା ବେଳେ ବାକି ସ୍ଥାନଗୁଡିକ ପାଇଁ ସୋମବାର ଦେବାକୁ ସ୍ଥିର କରିଛି। ତେବେ ଭାଜପାରେ ମଧ୍ୟ ଆଶାୟୀଙ୍କ ସଂଖ୍ୟା କିଛି କମ୍ ନାହିଁ। ସେହିପରି କଂଗ୍ରେସ ମଧ୍ୟ ୩୦ଟି ଆସନ ଲାଗି ପ୍ରାର୍ଥୀ ତାଲିକା ପ୍ରକାଶ କରିଥିବା ବେଳେ ବାକି ଆସନଗୁଡିକ ଲାଗି ଏ ପର୍ଯ୍ୟନ୍ତ ତାଲିକା ପ୍ରକାଶ କରିନାହିଁ। ଦଳ ଭିତରେ ବହୁ ଓ୍ବାର୍ଡ ଲାଗି ସହମତି ପ୍ରକାଶ ପାଇପାରୁ ନାହିଁ। ମୁଖ୍ୟତଃ ପ୍ରତି ଓ୍ବାର୍ଡରେ ମାତ୍ରାଧିକ ଅସନ୍ତୋଷ ଦଳ ଲାଗି ସମସ୍ୟା ପାଲଟିଥିବା ବେଳେ ଆଉ କିଛିଟା ଓ୍ବାର୍ଡରେ କେହି ପ୍ରାର୍ଥୀ ମିଳୁ ନ ଥିବା ଜଣେ ବରିଷ୍ଠ ନେତା କହିଛନ୍ତି। ତେବେ ଶେଷ ଦିନରେ ମାଳମାଳ ପ୍ରାର୍ଥୀ ନାମାଙ୍କନ କରିବେ।
