ନୂଆଦିଲ୍ଲୀ, ୨୯।୮ : ଦେଶରେ ୨୦୨୧ରେ ଘଟିଥିବା ଆତ୍ମହତ୍ୟା ନେଇ ପରିସଂଖ୍ୟାନ ପ୍ରକାଶିତ ହୋଇଛି। ଏନସିଆରବିର ନୂତନ ରେକର୍ଡ ଅନୁଯାୟୀ, ୨୦୨୧ ମସିହାରେ ପ୍ରତି ୧୦ ଲକ୍ଷ ଲୋକଙ୍କ ମଧ୍ୟରୁ ୧୨୦ ଜଣ ଆତ୍ମହତ୍ୟା କରିଛନ୍ତି। ଯାହା ପୂର୍ବ ବର୍ଷ ତୁଳନାରେ ୬.୧ ପ୍ରତିଶତ ବୃଦ୍ଧି ପାଇଛି। ପୂର୍ବ ବର୍ଷ ତୁଳନାରେ ଏହି ମୃତ୍ୟୁ ସଂଖ୍ୟା ସର୍ବାଧିକ। ରିପୋର୍ଟରେ ଛାତ୍ରୀଛାତ୍ର ଏବଂ କ୍ଷୁଦ୍ର ଉଦ୍ୟୋଗୀମାନଙ୍କ ମଧ୍ୟରେ ଆତ୍ମହତ୍ୟା ବୃଦ୍ଧି ପାଉଥିବା ଜଣାପଡିଛି।
୨୦୨୦ ରିପୋର୍ଟରେ ମଧ୍ୟ ଛାତ୍ରୀଛାତ୍ର ଏବଂ କ୍ଷୁଦ୍ର ଉଦ୍ୟୋଗୀମାନଙ୍କ ମଧ୍ୟରେ ଆତ୍ମହତ୍ୟା ବଢ଼ିଥିଲା। ପରିସଂଖ୍ୟାନ ତଥ୍ୟ ଦର୍ଶାଉଛି ଯେ ୨୦୨୧ରେ ଆତ୍ମହତ୍ୟା ଯୋଗୁ ୧୬୪,୦୩୩ ଜଣଙ୍କର ମୃତ୍ୟୁ ଘଟିଛି ଯାହା ୨୦୨୦ ତୁଳନାରେ ୭.୨ ପ୍ରତିଶତ ଅଧିକ। ୨୦୨୦ ମସିହାରେ ୧୫୩,୦୫୨ ଜଣ ଅତ୍ମହତ୍ୟା କରିଥିଲେ। ୨୦୧୯ରେ ଏହି ସଂଖ୍ୟା ପ୍ରାୟ ୧୩୯,୦୦୦ ଥିଲା।
୨୦୨୧ ଏବଂ ୧୯୬୭ରେ ଆତ୍ମହତ୍ୟା ମୃତ୍ୟୁ ହାର ମଧ୍ୟ ସର୍ବାଧିକ ଥିଲା ବୋଲି ପରିସଂଖ୍ୟାନ ରିପୋର୍ଟରୁ ଜଣାପଡୀଛି। ଦେଶରେ ଆତ୍ମହତ୍ୟାର ଦ୍ୱିତୀୟ ସର୍ବାଧିକ ହାର ୨୦୧୦ ମସିହାରେ ହୋଇଥିଲା, ଯେତେବେଳେ ପ୍ରତି ୧୦ ଲକ୍ଷ ଜନସଂଖ୍ୟାରେ ୧୧୩ ଜଣଙ୍କ ମୃତ୍ୟୁ ଏହା ଯୋଗୁ ଘଟିଥିଲା। ପରିସଂଖ୍ୟାନ ତଥ୍ୟ ଏହା ମଧ୍ୟ ଦର୍ଶାଉଛି ଯେ ସର୍ବନିମ୍ନ ଆୟକାରୀ ଗୋଷ୍ଠୀ ବର୍ଷକୁ ୧ ଲକ୍ଷରୁ କମ ରୋଜଗାର କରୁଥିବା ବ୍ୟକ୍ତିଙ୍କ ମଧ୍ୟରେ ଆତ୍ମହତ୍ୟା ଘଟଣାର ପ୍ରାୟ ଦୁଇ ତୃତୀୟାଂଶ ଏବଂ ସର୍ବାଧିକ ରହିଛି।
