ଧାମନଗର,୨୬।୬ (କାଳନ୍ଦି ବେହେରା): ଚାନ୍ଦବାଲି ବ୍ଲକ ଅଧୀନ ଓଳଗ ପଞ୍ଚାୟତର ଷାଠିବାଙ୍କୁଡା ଗାଁରେ ଜଣେ ଯୁବକଙ୍କୁ ଘରୁ ଡାକି ନେଇ ହତ୍ୟା କରାଯାଇଥିବା ନେଇ ପରିବାର ଓ ଗ୍ରାମବାସୀ ଗୁରୁତର ଅଭିଯୋଗ ଆଣିଛନ୍ତି। ଏହି ଘଟଣାର ନିରପେକ୍ଷ ତଦନ୍ତ ଓ ଦୋଷୀଙ୍କ ଗିରଫ ଦାବିରେ ଗୁରୁବାର ୨ଶହରୁ ଊର୍ଦ୍ଧ୍ୱ ମହିଳା ଓ ପୁରୁଷ ଆରଡି ଫାଣ୍ଡି ସମ୍ମୁଖରେ ଧାରଣା ଦେଇ ଘେରାଉ କରିଥିଲେ। ମୃତ ଯୁବକ ହେଲେ ଷାଠିବାଙ୍କୁଡା ଗାଁର ସ୍ବର୍ଗତ ସୁବଳ ମହାକୁଡ଼ଙ୍କ ପୁଅ ହାପି ମହାକୁଡ଼। ପରିବାରର ଅଭିଯୋଗ ଅନୁସାରେ, ଗତ ୧୭ ତାରିଖ ମଧ୍ୟାହ୍ନ ପ୍ରାୟ ୧ଟା ସମୟରେ ଗାଁର ମୁନା ପଲାଇ ଓ ତାଙ୍କ ପୁଅ ସ୍ବୟମ ପଲାଇ ଏକ ଜରୁରୀ କଥା ରହିଛି କହି ହାପିଙ୍କୁ ଘରୁ ଡାକି ନେଇଥିଲେ। କିଛି ସମୟ ପରେ ହାପି ମୁନା ପଲାଇଙ୍କ ବାଡ଼ିରେ ଥିବା ଏକ ଗଛରେ ଫାଶି ଲଗାଇଥିବା ଖବର ପରିବାର ଲୋକଙ୍କ ପାଖକୁ ପହଞ୍ଚିଥିଲା।
ଗ୍ରାମବାସୀଙ୍କ ସହଯୋଗରେ ହାପିଙ୍କୁ ଉଦ୍ଧାର କରାଯାଇଥିଲେ ମଧ୍ୟ ପରେ ଶବ ବ୍ୟବଚ୍ଛେଦ ନକରାଇ ଶତ୍କାର କରାଯାଇଥିବା କୁହାଯାଇଛି। ତେବେ ମୃତକଙ୍କ ମୋବାଇଲରୁ କିଛି ଧମକପୂର୍ଣ୍ଣ ମେସେଜ ଓ କଲ ସମ୍ପର୍କିତ ସୂଚନା ମିଳିବା ପରେ ଘଟଣାକୁ ନେଇ ସନ୍ଦେହ ଘନୀଭୂତ ହୋଇଥିବା ପରିବାର ପକ୍ଷରୁ କୁହାଯାଇଛି। ହାପି ମୁନା ପଲାଇଙ୍କ ଝିଅଙ୍କୁ ଭଲ ପାଉଥିବାରୁ ସ୍ବୟମ ପଲାଇ ତାଙ୍କୁ ବାରମ୍ବାର ଫୋନ ଓ ହୱାଟସଆପ ମାଧ୍ୟମରେ ଧମକ ଦେଉଥିବା ମୃତକଙ୍କ ଭାଇ ଅଭିଯୋଗ କରିଛନ୍ତି। ପରିବାର ଲୋକଙ୍କ ଆହୁରି ଅଭିଯୋଗ ଯେ, ଘଟଣା ସମ୍ପର୍କରେ ପୋଲିସକୁ ଜଣାଇଲେ ମୃତକଙ୍କ ଭାଇଙ୍କୁ ମଧ୍ୟ ହତ୍ୟା କରିବାକୁ ଧମକ ଦିଆଯାଇଥିଲା। ଅଭିଯୁକ୍ତମାନେ ଶାସକ ଦଳ ସହ ଜଡ଼ିତ ଥିବା ଦାବି କରି ପରିବାର ଲୋକ ଘଟଣାକୁ ଚାପି ଦେବାକୁ ଉଦ୍ୟମ ହେଉଥିବା ଅଭିଯୋଗ କରିଛନ୍ତି।
ଆରଡି ଫାଣ୍ଡିରେ ଅଭିଯୋଗ ଦେବାକୁ ଯାଇଥିବା ବେଳେ ଏତଲା ଗ୍ରହଣ କରାଯାଇନଥିବା ସହ ଅଭିଯୋଗକାରୀଙ୍କୁ ଆଇନଗତ କାର୍ଯ୍ୟାନୁଷ୍ଠାନର ଧମକ ଦିଆଯାଇଥିବା ନେଇ ମଧ୍ୟ ଗ୍ରାମବାସୀ ଅଭିଯୋଗ କରିଛନ୍ତି। ଏହାକୁ ପ୍ରତିବାଦ କରି ଗାଁର ୨ଶହରୁ ଊର୍ଦ୍ଧ୍ୱ ମହିଳା ଓ ପୁରୁଷ ଫାଣ୍ଡି ସମ୍ମୁଖରେ ବସି ନ୍ୟାୟ ଦାବି କରିଥିଲେ।
ଅନ୍ୟପକ୍ଷରେ, ଅଭିଯୋଗ ଉଠିବା ପରେ ମୁନା ପଲାଇ ଓ ତାଙ୍କ ପରିବାର ଗାଁ ଛାଡ଼ି ଅନ୍ୟତ୍ର ଚାଲିଯାଇଥିବା ନେଇ ସ୍ଥାନୀୟ ସୂତ୍ରରୁ ସୂଚନା ମିଳିଛି। ଘଟଣାର ସତ୍ୟାସତ୍ୟ ତଦନ୍ତ ପରେ ସ୍ପଷ୍ଟ ହେବ ବୋଲି ଗ୍ରାମବାସୀ କହିଛନ୍ତି।
