ନୂଆଦିଲ୍ଲୀ,୧।୯ (ପି.ଟି.): କେନ୍ଦ୍ର ସରକାର ମେଧାବୀ କ୍ରୀଡ଼ାବିତ୍ମାନଙ୍କ ପାଇଁ ଚାକିରି କ୍ଷେତ୍ରରେ ସିଧା ନିଯୁକ୍ତି ନିମନ୍ତେ ତାଲିକାରେ ଅଧିକ ସଂଖ୍ୟକ କ୍ରୀଡ଼ାବର୍ଗକୁ ସାମିଲ କରିଛନ୍ତି। ଏହି କ୍ରମରେ କେନ୍ଦ୍ର ସରକାର ଅଧିକ ୨୦ଟି କ୍ରୀଡ଼ାବର୍ଗକୁ ତାଲିକାରେ ସାମିଲ କରିଥିବା ଜଣାଯାଇଛି। ସିଧାସଳଖ ନିଯୁକ୍ତି ପାଇଁ ସରକାର ଟଗ୍- ଅଫ୍- ଓ୍ବାର, ମାଲ୍ଲାଖମ୍ବ ଓ ପାରା- ସ୍ପୋଟର୍ସ ସହିତ ଅନ୍ୟ କ୍ରୀଡ଼ାକୁ ଗ୍ରୁପ୍ ସି’ ସ୍ତରର ଚାକିରି ପାଇଁ ବିଚାରକୁ ନେଇଛନ୍ତି। ଏ ସଂକ୍ରାନ୍ତରେ ମଙ୍ଗଳବାର ପର୍ସନାଲ ମିନିଷ୍ଟ୍ରି ତରଫରୁ ସୂଚନା ଦିଆଯାଇଛି। ଭାରତ ସରକାରଙ୍କ ମନ୍ତ୍ରଣାଳୟ ଓ ବିଭାଗରେ କ୍ରୀଡ଼ାବିତ୍ମାନଙ୍କୁ ଗ୍ରୁପ୍ ସି’ ପଦରେ ନିଯୁକ୍ତି ଦେବାକୁ କ୍ରୀଡ଼ା ବିଭାଗ ତରଫରୁ ଏ ନେଇ ୬୩ଟି କ୍ରୀଡ଼ାକୁ ସାମିଲ କରିବାକୁ ପ୍ରସ୍ତାବ ଦିଆଯାଇଥିଲା। ବର୍ତ୍ତମାନ ଏହି ପ୍ରସ୍ତାବକୁ ଗ୍ରହଣ କରାଯାଇଛି। ପୂର୍ବରୁ ୪୩ଟି ବର୍ଗ କ୍ରୀଡ଼ା ପାଇଁ ନିଯୁକ୍ତି ମିଳୁଥିଲା। ଏବେ ଆଉ ୨୦ଟି ବର୍ଗ ପାଇଁ କ୍ରୀଡ଼ାବିତ୍ମାନଙ୍କୁ ଚାକିରି କରିବାର ସୁଯୋଗ ମିଳିବ। ଏଗୁଡିକ ହେଲେ ବେସ୍ବଲ୍, ରଗ୍ବୀ, ବାସ୍କେଟବଲ, ଡିଫ୍ ସ୍ପୋଟର୍ସ, ଟଗ୍- ଅଫ୍- ଓ୍ବାର, ମାଲଖମ୍ବ ଓ ପାରା ସ୍ପୋଟର୍ସ। ପାରା ଅଲିମ୍ପିକ୍ସ ଓ ପାରା ଏସିଆ ଗେମ୍ସରେ ଭଲ ପ୍ରଦର୍ଶନ କରିଥିବା ଖେଳାଳିମାନେ ଏହି ତାଲିକାରେ ସାମିଲ ହୋଇପାରିବେ।
