ମୋହାଲି,୧୧ା୯: ପଞ୍ଜାବୀ ଗାୟକ ସିଦ୍ଧୁ ମୁସଓ୍ବୋଲା ହତ୍ୟା ମାମଲାରେ ସମ୍ପୃକ୍ତ ଲରେନ୍ସ ବିଷ୍ଣୋଇ ଗ୍ୟାଙ୍ଗ୍ର ଜଣେ ସଦସ୍ୟଙ୍କୁ ଗିରଫ କରାଯାଇଛି। ତାଙ୍କଠାରୁ ୧୧ଟି ଆଗ୍ନେୟାସ୍ତ୍ର ଜବତ ହୋଇଛି। ମୁସଓ୍ବୋଲା ହତ୍ୟାକାଣ୍ଡରେ ସମ୍ପୃକ୍ତ ୬ ଶୁଟରଙ୍କ ମଧ୍ୟରୁ ପୂର୍ବରୁ ଦିଲ୍ଲୀ ପୋଲିସ ୩ଜଣଙ୍କୁ ଓ ପଞ୍ଜାବ ପୋଲିସ ୨ ଜଣଙ୍କୁ ଗିରଫ କରିଥିଲା। ଅନ୍ୟତମ ଶୁଟର ଦୀପକ ଓରଫ ମୁଣ୍ଡିଙ୍କୁ ତାଙ୍କର ଦୁଇ ସହଯୋଗୀ କପିଲ ପଣ୍ଡିତ ଏବଂ ରାଜିନ୍ଦରଙ୍କ ସହ ପଶ୍ଚିମବଙ୍ଗ-ନେପାଳ ସୀମାରୁ ଗିରଫ କରାଯାଇଥିବା ପଞ୍ଜାବ ପୋଲିସ ଡିଜି ଗୌରବ ଯାଦବ ସୂଚନା ଦେଇଛନ୍ତି। ପଞ୍ଜାବୀ ଗାୟକ ତଥା କଂଗ୍ରେସ ନେତା ମୁସଓ୍ବୋଲାଙ୍କୁ ଗତ ମେ’ ୨୯ରେ ମନସା ଜିଲାରେ ଗୁଳିକରି ହତ୍ୟା କରାଯାଇଥିଲା। ଭିଆଇପି ସଂସ୍କୃତି ଉଚ୍ଛେଦ ନାମରେ ପଞ୍ଜାବର ଏଏପି ସରକାର ମୁସଓ୍ବୋଲାଙ୍କ ସମେତ ପ୍ରାୟ ୪୦୦ ଜଣଙ୍କ ସୁରକ୍ଷା କମାଇଦେଇଥିଲେ। ଏହାର ଦିନକ ପରେ ମୁସଓ୍ବୋଲାଙ୍କୁ ହତ୍ୟା କରାଯାଇଥିଲା।
