ନୂଆଦିଲ୍ଲୀ, ୧୩।୯: ସୋମବାର ଲୋକ ସଭା ଏବଂ ରାଜ୍ୟ ସଭାର ମୌସୁମୀ ଅଧିବେଶନ ଆରମ୍ଭ ହେବାକୁ ଯାଉଛି। ପ୍ରତି ଅଧିବେଶନ ପୂର୍ବରୁ ସର୍ବଦଳୀୟ ବୈଠକର ଆୟୋଜନ କରାଯାଇଥାଏ। ତେବେ ଚଳିତ ଥର କରୋନା ସଂକ୍ରମଣକୁ ଦୃଷ୍ଟିରେ ରଖି ଏହାକୁ ବାତିଲ କରାଯାଇଛି। ରାଜ୍ୟ ସଭାର ପୂର୍ବାହ୍ନ ୯ଟାରୁ ଅପରାହ୍ନ ୧ଟା ପର୍ଯ୍ୟନ୍ତ କାର୍ଯ୍ୟ କରିବ। ଏହାପରେ ଲୋକ ସଭା ଅପରାହ୍ନ ୩ଟାରୁ ସନ୍ଧ୍ୟା ୭ଟା ପର୍ଯ୍ୟନ୍ତ କାର୍ଯ୍ୟ କରିବ। ଚଳିତ ଥର ଶାସକ ଦଳ ଏବଂ ବିରୋଧୀ ବ୍ୟତିତ ଅନ୍ୟ କାହାକୁ ବସିବାର ସୁଯୋଗ ଦିଆଯିବ ନାହିଁ। ମୌସୁମୀ ଅଧିବେଶନରେ ବିରୋଧୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସରକାରଙ୍କୁ ଭାରତ-ଚାଇନା ସୀମା ସମସ୍ୟା, ଦେଶରେ କରୋନା ସ୍ଥିତି, ଅର୍ଥବ୍ୟବସ୍ଥା ସଙ୍କଟ, ଲକ୍ଡାଉନରେ ପ୍ରବାସୀ ଶ୍ରମିକଙ୍କ ଅବସ୍ଥା ଏବଂ ଫେସ୍ବୁକ୍ ପ୍ରସଙ୍ଗ ଆଦି ନେଇ ଘେରିବାର ଯଥେଷ୍ଟ ସମ୍ଭାବନା ରହିଛି। କଂଗ୍ରେସ ସମେତ ଅନ୍ୟ ବିରୋଧୀ ଦଳ ଏସବୁ ପ୍ରସଙ୍ଗ ନେଇ ସରକାରଙ୍କୁ ଅସୁବିଧାରେ ପକାଇବାର ଅନୁମାନ କରାଯାଉଛି। ୨୩ ମାର୍ଚ୍ଚରେ ବଜେଟ ଅଧିବେଶନ ପରେ କେନ୍ଦ୍ର ସରକାର ୧୧ଟି ଅଧ୍ୟାଦେଶକୁ ମଞ୍ଜୁରୀ ଦେଇଛନ୍ତି। ଏହାକୁ ବିଲ୍ ଭାବେ ସଂସଦରେ ମଞ୍ଜୁରୀ କରାଇବା ସରକାରଙ୍କ ପ୍ରଥମ ଲକ୍ଷ୍ୟ ହେବ ବୋଲି କୁହାଯାଉଛି। ପୂର୍ବରୁ ୮ଟି ବିଲ୍ ଲୋକ ସଭା ଏବଂ ୩ଟି ବିଲ୍ ରାଜ୍ୟ ସଭାରେ ପଡ଼ି ରହିଛି। ଏସବୁ ବିଲ୍କୁ ମଞ୍ଜୁରୀ ଦେବା ଲାଗି ମଧ୍ୟ ସରକାର ଉଦ୍ୟମ କରିବେ।
