ନୂଆଦିଲ୍ଲୀ,୯।୮: ନିର୍ଦ୍ଧାରିତ ସମୟର ୪ ଦିନ ପୂର୍ବରୁ ପାର୍ଲାମେଣ୍ଟର ମୌସୁମୀ ଅଧିବେଶନ ସୋମବାର ଶେଷ ହୋଇଛି। ଅଧିବେଶନ ଜୁଲାଇ ୧୮ରେ ଆରମ୍ଭ ହୋଇଥିବାବେଳେ ଅଗଷ୍ଟ ୧୨ ତାରିଖରେ ଶେଷ ହେବା ନେଇ ଧାର୍ଯ୍ୟ ହୋଇଥିଲା। ଲୋକ ସଭା ବାଚସ୍ପତି ଓମ୍ ବିର୍ଲା ଗୃହକୁ ଅନିର୍ଦ୍ଦିଷ୍ଟ କାଳ ଲାଗି ମୁଲତବୀ ଘୋଷଣା କରିଥିବା ବେଳେ ବିଦାୟୀ ରାଜ୍ୟ ସଭା ଅଧ୍ୟକ୍ଷ ଏମ୍. ଭେଙ୍କାୟା ନାଇଡୁ ଉଚ୍ଚ ସଦନକୁ ସାଇନ୍-ଏ-ଡାଏ ମୁଲତବୀ ଘୋଷଣା କରିଛନ୍ତି। ଏହି ଅଧିବେଶନରେ ଲୋକ ସଭା ୧୬ ଦିନ ଚାଲିବା ସହ ୭ଟି ବିଲ୍ ଗୃହୀତ ହୋଇଥିବା ବାଚସ୍ପତି ସୂଚନା ଦେଇଥିଲେ। ରାଜ୍ୟ ସଭାରେ ବିଭିନ୍ନ ପ୍ରସଙ୍ଗକୁ ନେଇ ବିରୋଧୀଙ୍କ ହଟ୍ଟଗୋଳ ଯୋଗୁ ୪୭ ଘଣ୍ଟାରୁ ଊର୍ଦ୍ଧ୍ୱ ସମୟ ବରବାଦ ହୋଇଥିବା ଭେଙ୍କାୟା କହିଛନ୍ତି। ୧୬ ଦିନରେ ଗୃହକାର୍ଯ୍ୟ ୩୮ ଘଣ୍ଟାରୁ ଅଧିକ ସମୟ ଚାଲିଥିବାବେଳେ ୫ଟି ସରକାରୀ ବିଲ୍ ଉପରେ ଆଲୋଚନା ହୋଇ ଗୃହୀତ ହୋଇଥିଲା।
ଅଧିବେଶନ ଆରମ୍ଭ ଦିନରୁ ବିରୋଧୀ ଦଳଗୁଡ଼ିକ ଦରଦାମ୍ ବୃଦ୍ଧି, ବେରୋଜଗାରୀ, ଅତ୍ୟାବଶ୍ୟକ ସାମଗ୍ରୀ ଉପରେ ଜିଏସ୍ଟି ଆଦି ବିଭିନ୍ନ ପ୍ରସଙ୍ଗକୁ ନେଇ ଗୃହରେ ହଟ୍ଟଗୋଳ ଜାରି ରଖିବାରୁ କ୍ରମାଗତ ଭାବେ ଗୃହକାର୍ଯ୍ୟ ବ୍ୟାହତ ହୋଇଥିଲା ଏବଂ ଜରୁରୀ ତଥା ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଉପରେ ଆଲୋଚନା ସୁଯୋଗରୁ ସଦସ୍ୟମାନେ ବଞ୍ଚତ୍ତ ହୋଇଥିଲେ ବୋଲି ଭେଙ୍କାୟା କହିଛନ୍ତି। ବିଶୃଙ୍ଖଳିତ କାର୍ଯ୍ୟ ଯୋଗୁ ଉଚ୍ଚ ସଦନର ୨୩ ଜଣ ସଦସ୍ୟଙ୍କୁ ନିଲମ୍ବନ କରାଯାଇଥିଲା। ପ୍ରଶ୍ନୋତ୍ତର କାଳରେ ୨୩୫ଟି ତାରକା ପ୍ରଶ୍ନ କରାଯାଇଥିବାବେଳେ ସେଥିରୁ ୧୬୧ଟିର ଉତ୍ତର ଦିଆଯାଇଥିଲା। ବିରୋଧୀ ସଦସ୍ୟ ଆଣିଥିବା ୨୭ ପ୍ରାଇଭେଟ ବିଲ୍ ମଧ୍ୟରୁ କେବଳ ସ୍ବାସ୍ଥ୍ୟସେବା ଅଧିକାର ବିଲ୍ ଉପରେ ଆଲୋଚନା ହୋଇଥିଲା।
