ଭୁବନେଶ୍ୱର,୧୬।୧୦(ବ୍ୟୁରୋ): ରାଜ୍ୟର ବିତ୍ତୀୟ ପରିଚାଳନା ଠିକ୍ ଢଙ୍ଗରେ ହେଉ ନାହିଁ। ପୂର୍ଣ୍ଣାଙ୍ଗ ଏବଂ ଅତିରିକ୍ତ ବଜେଟ ପ୍ରସ୍ତୁତି ବେଳେ ଖର୍ଚ୍ଚ ଉପରେ ଧ୍ୟାନ ଦିଆଯାଉ ନାହିଁ। ବିଭାଗଗୁଡିକୁ ଯୋଗାଇ ଦିଆଯାଉଥିବା ଅର୍ଥ ମଧ୍ୟ ଖର୍ଚ୍ଚ ହେଉ ନାହିଁ। ଶେଷ ୩ ମାସରେ ୧୦୦ ପ୍ରତିଶତ ଖର୍ଚ୍ଚ କରାଯାଉଥିବା ବେଳେ ଅନ୍ୟ ସମୟରେ ଖର୍ଚ୍ଚ ଅତ୍ୟନ୍ତ ଧିମା ରହୁଛି। ବିଭାଗଗୁଡ଼ିକ ଖର୍ଚ୍ଚର ହିସାବ ୧୦ ବର୍ଷରୁ ଊର୍ଦ୍ଧ୍ୱ ସମୟ ଧରି ଦେଉ ନାହାନ୍ତି। ଏପରି ସ୍ଥଳେ ଅତିରିକ୍ତ ବଜେଟରେ ସେହି ବିଭାଗଗୁଡିକୁ କୋଟି କୋଟି ଟଙ୍କା ଦିଆଯାଉଛି। ସେହି ଅର୍ଥ ଦୀର୍ଘଦିନ ଧରି ଖର୍ଚ୍ଚ ନ ହୋଇ ପଡିରହୁଛି। ବିଭାଗ ନିକଟରେ ଟଙ୍କା ପଡିରହୁଥିବା ବେଳେ ବିଭିନ୍ନ ଯୋଜନା ଖର୍ଚ୍ଚ ତୁଲାଇବାକୁ ସରକାରଙ୍କୁ ଖୋଲା ବଜାରରୁ ଋଣ କରିବାକୁ ପଡୁଛି। ନୂଆ ବଜେଟ ପ୍ରସ୍ତୁତି ପୂର୍ବରୁ ବିଭାଗଗୁଡ଼ିକ ସେହି ଅର୍ଥ ଫେରାଉଛନ୍ତି। ରାଜ୍ୟ ସରକାରଙ୍କ ବଜେଟ ପ୍ରସ୍ତୁତି ଓ ପରିଚାଳନାକୁ ନେଇ କମ୍ପଟ୍ରୋଲର ଆଣ୍ଡ ଅଡିଟର ଜେନେରାଲ(ସିଏଜି) ଉଦ୍ବେଗ ପ୍ରକାଶ କରିଛନ୍ତି। ବିଭାଗୀୟ ଅଧିକାରୀମାନଙ୍କ ଖାମଖିଆଲ ମନୋଭାବ ଯୋଗୁ ସରକାରଙ୍କୁ ଅଯଥା ଆର୍ଥିବ ବୋଝ ବୋହିବାକୁ ପଡୁଥିବା ରିପୋର୍ଟରେ କହିଛନ୍ତି।
ସିଏଜି ତାଙ୍କ ରିପୋର୍ଟରେ ଦର୍ଶାଇଛନ୍ତି ଯେ, ବିଭାଗଗୁଡିକ ପକ୍ଷରୁ ବଜେଟରେ ଅଯାଚିତ ଭାବେ ବ୍ୟୟ ବରାଦ କରାଯାଉଥିବାରୁ ତାହା ଖର୍ଚ୍ଚ ନ ହୋଇ ଦୀର୍ଘବର୍ଷ ପଡିରହୁଛି। ଏପରି କି ବିଭାଗଗୁଡିକ କେଉଁ ବାବଦରେ କେତେ ଅର୍ଥ ଖର୍ଚ୍ଚ କରୁଛନ୍ତି ତାହା ମଧ୍ୟ ଜଣାଉ ନାହାନ୍ତି। ୧୯ଟି ବିଭାଗ ୨୦୧୯ ମାର୍ଚ୍ଚ ୩୧ ଯାଏ ଗତ ୧୦ ବର୍ଷ ଧରି ୧୨୩୪.୪୬ କୋଟି ଟଙ୍କାର ବିନିଯୋଗ ପ୍ରମାଣ ପତ୍ର (ୟୁସି) ଦେଇନାହାନ୍ତି। ସମବାୟ ବିଭାଗ ୨୦୦୭ରୁ ୟୁସି ଦେଇ ନ ଥିବା ବେଳେ ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତି ବିଭାଗ ୨୦୦୩ରୁ ୨୦୦୯, ସାଧାରଣ ପ୍ରଶାସନ ୨୦୦୩ରୁ ୨୦୦୯ , ପର୍ଯ୍ୟଟନ ୨୦୦୩ରୁ ୨୦୦୯, ଜଳ ସମ୍ପଦ ୨୦୦୩ରୁ ୨୦୦୯, ବିଜ୍ଞାନ ଓ କାରିଗରି ୨୦୦୩ରୁ ୨୦୦୭, ଅଣୁ, କ୍ଷୁଦ୍ର ଓ ମଧ୍ୟମ ଉଦ୍ୟୋଗ ୨୦୦୫ରୁ ୨୦୦୯, ପଞ୍ଚାୟତିରାଜ ୨୦୦୩ରୁ ୨୦୦୯, ଆଇନ ୨୦୦୩ରୁ ୨୦୦୯, ଯୋଜନା ଓ ସଂଯୋଜନା ୨୦୦୩ରୁ ୨୦୦୯, ରାଜସ୍ବ ବିଭାଗ ୨୦୦୩ରୁ ୨୦୦୯, ସ୍କୁଲ ଓ ଗଣଶିକ୍ଷା ୨୦୦୩ରୁ ୨୦୦୯, ଉଚ୍ଚଶିକ୍ଷା ୨୦୦୩ରୁ ୨୦୦୯, ଦକ୍ଷତା ବିକାଶ ଓ ବୈଷୟିକ ଶିକ୍ଷା ୨୦୦୩ରୁ ୨୦୦୭, ଅନୁସୂଚିତ ଜାତି ଓ ଜନଜାତି ବିକାଶ ୨୦୦୬ରୁ ୨୦୦୯, ମତ୍ସ୍ୟ ଓ ପ୍ରାଣୀ ସମ୍ପଦ ୨୦୦୩ରୁ ୨୦୦୯, ଗୃହ ଓ ନଗର ଉନ୍ନୟନ ବିଭାଗ ୨୦୦୩ରୁ ୨୦୦୯ ଯାଏ ୟୁସି ଦେଇନାହାନ୍ତି। କେବଳ ସେତିକି ନୁହେଁ ୩୭ଟି ବିଭାଗ ମଧ୍ୟ ୟୁସି ଦେବାରେ ବହୁ ବିଳମ୍ବ କରୁଛନ୍ତି। ସମସ୍ତ ବିଭାଗ ୪୫,୩୪୦.୮୯ କୋଟି ଟଙ୍କାର ୨୯,୧୩୮ ୟୁସି ଦେଇନାହନ୍ତି। ସେହିପରି ବିଭନ୍ନ ସରକାରୀ କାର୍ଯ୍ୟାଳୟରେ କ୍ୟାଶ ବୁକ୍ ଏବଂ ବ୍ୟାଙ୍କ ପାସ୍ ବୁକ୍ ମଧ୍ୟରେ ତାଳମେଳ ନାହିଁ। ସରକାରଙ୍କ ୧୭ଟି ବିଭିନ୍ନ ବିଭାଗରେ ବ୍ୟାଙ୍କ ପାସ୍ ବୁକ୍ରେ ୨୩୭.୩୦ କୋଟି ଟଙ୍କା ଥିବା ବେଳେ କ୍ୟାଶ ବୁକ୍ରେ ୨୧୫.୯୮କୋଟି ରହିଛି। ୨୧.୩୨ କୋଟି ଟଙ୍କାର କୌଣସି ହିସାବ ମିଳୁ ନାହିଁ। ଖାଲି ସେତିକି ନୁହେଁ ୨୭ଟି ବିଭାଗ ୧୦ କୋଟିରୁ ଊର୍ଦ୍ଧ୍ୱ ଟଙ୍କା ହିସାବରେ ୨୦୧୯-୨୦ ଆର୍ଥିକ ବର୍ଷ ବଜେଟ ପୂର୍ବରୁ ୧,୩୦୪.୧୭ କୋଟି ଫେରାଇ ଦେଇଥିବା ସିଏଜି ତାଙ୍କ ରିପୋର୍ଟରେ ଦର୍ଶାଇଛନ୍ତି। ଆହୁରି ମଧ୍ୟ ଆବଶ୍ୟକ ନ ଥିବା ୧୮ଟି ବିଭାଗକୁ ୨୦୧୮-୧୯ ଅତିରିକ୍ତ ବଜେଟରେ ୧ କୋଟିରୁ ଊର୍ଦ୍ଧ୍ୱ ହିସାବରେ ୧,୫୯୮.୬୫ କୋଟି ଟଙ୍କା ପ୍ରଦାନ କରାଯାଇଛି। ରାଜ୍ୟର ବଜେଟ ପରିଚାଳନା ଓ ପ୍ରସ୍ତୁତିକୁ ନେଇ ସିଏଜି ପ୍ରଶ୍ନ ଉଠାଇଛନ୍ତି।
