ବେଙ୍ଗାଲୁରୁ, ୧୯।୪: କର୍ନାଟକ ବିଧାନସଭା ନିର୍ବାଚନ ପାଇଁ ଭାଜପା ଷ୍ଟାର ପ୍ରଚାରକଙ୍କ ତାଲିକା ପ୍ରକାଶ କରିଛି। ଏହି ତାଲିକାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ରାଜନାଥ ସିଂ, ଯୋଗୀ ଆଦିତ୍ୟନାଥ, ସ୍ମୃତି ଇରାନୀ ଏବଂ ଅମିତ୍ ଶାହାଙ୍କ ସମେତ ୪୦ଜଣ ନେତାଙ୍କ ନାମ ରହିଛି।
ତେବେ ନିର୍ବାଚନ ପାଇଁ ପ୍ରଧାନମନ୍ତ୍ରୀ ମୋଦି ୪ମାସ ମଧ୍ୟରେ ୮ଥର କର୍ନାଟକ ଗସ୍ତ କରିଛନ୍ତି। ପ୍ରଧାନମନ୍ତ୍ରୀ ହେବା ପରଠାରୁ ଏହା ତାଙ୍କର ଗୋଟିଏ ବର୍ଷ ମଧ୍ୟରେ ସର୍ବାଧିକ କର୍ନାଟକ ଗସ୍ତ। ଆଗାମୀ ଦିନରେ ସେ କର୍ନାଟକକୁ ଆହୁରି ଅନେକଥର ଗସ୍ତରେ ଯିବେ ବୋଲି ରାଜନୈତିକ ସମୀକ୍ଷକମାନେ ମତ ଦେଇଛନ୍ତି। କର୍ନାଟକ ବିଧାନସଭା ନିର୍ବାଚନ ତାରିଖ ଘୋଷଣା ହେବା ପରେ ପ୍ରଧାନମନ୍ତ୍ରୀ ଏପ୍ରିଲ ୯ରେ ସେଠାକ୍ୁ ଗସ୍ତ କରିଥିଲେ। ନିର୍ବାଚନ ପାଇଁ ଦଳର ଷ୍ଟାର ପ୍ରଚାରକ ଭାବେ ମୋଦି ଅତି କମ୍ରେ ଆହୁରି ୨୦ଟିି ରାଲି କରିବାର କୁହାଯାଉଛି। ସୂଚନା ମୁତାବକ, ନିର୍ବାଚନ ପ୍ରଚାରର ଶେଷ ପର୍ଯ୍ୟାୟରେ କଂଗ୍ରେସ ଏବଂ ଜେଡିଏସ୍ର ଗଡ଼ ଥିବା ଜିଲାଗୁଡିକରେ ମୋଦି ୬ରୁ ୮ ତାରିଖ ଯାଏ ପ୍ରଚାର କରିପାରନ୍ତି।
ରାଜ୍ୟର ଶୀର୍ଷ ନେତାଙ୍କ କହିବାନୁସାରେ, ରାଜ୍ୟକୁ ନିର୍ବାଚନ ରାଲି ପାଇଁ ଯେଉଁ ୬ଟି କ୍ଷେତ୍ରରେ ବିଭକ୍ତ କରାଯାଇଛି ସେଠାରେ ପ୍ରଧାନମନ୍ତ୍ରୀ ୩ଟି ରାଲି କରିବାକୁ ଯୋଜନା କରିଛନ୍ତି। ତେବେ ଏଥିମଧ୍ୟରୁ ହାଇଦ୍ରାବାଦ-କର୍ନାଟକ ଅଞ୍ଚଳରେ ଯେଉଁଠାରେ ପ୍ରାୟ ୪୦ଟି ବିଧାନସଭା ସିଟ୍ ରହିଛି ସେଠାରେ ପ୍ରଧାନମନ୍ତ୍ରୀ ଅଧିକ ରାଲି କରିପାରନ୍ତି ସମ୍ଭାବନା ରହିଛି। ସୂଚନାଥାଉ କି, କଂଗ୍ରେସ ସଭାପତି ମଲ୍ଲିକାର୍ଜୁନ ଖାର୍ଗେ ଏହି ଅଞ୍ଚଳର ଲୋକପ୍ରିୟ ନେତା। ଗତ ବିଧାନସଭା ନିର୍ବାଚନରେ ଭାଜପା ମାତ୍ର ୧୫ଟି ଆସନ ଏଠାରୁ ହାତେଇ ପାରିଥିଲା।
ଏଠାରେ କହି ରଖୁଛୁ କି, ଜାନୁୟାରୀ ୨୦୧୫ଠାରୁ ପ୍ରଧାନମନ୍ତ୍ରୀ ମୋଟ ୩୨ଥର କର୍ନାଟକ ଗସ୍ତ କରିଛନ୍ତି। ପ୍ରାୟ ୨୫ ପ୍ରତିଶତ ଗସ୍ତ ନିର୍ବାଚନ ବର୍ଷରେ ହିଁ ହୋଇଛି । ଦ୍ୱିତୀୟ ସର୍ବାଧିକ ଗସ୍ତ ୨୦୧୮ରେ ହୋଇଥିଲା। ସେହି ବର୍ଷ ମଧ୍ୟ ସେଠାରେ ନିର୍ବାଚନ ଥିଲା। ସେହି ବର୍ଷ ୭ଥର ଗସ୍ତ ମଧ୍ୟରୁ ୬ଥର ଗସ୍ତ ନିର୍ବାଚନ ପୂର୍ବରୁ ହୋଇଥିଲା। ତେବେ ମୋଦି ଏହାମଧ୍ୟରେ ୫ଥର ଦଳୀୟ କାର୍ଯ୍ୟକ୍ରମରେ ଯୋଗଦେବା ଲାଗି ଗସ୍ତ କରିଥିଲେ। ରାଜ୍ୟରେ ନିର୍ବାଚନ ଆଚରଣବିଧି ଲାଗୁ ହେବା ପରେ କିମ୍ବା ଭାଜପାର ଦଳୀୟ କାର୍ଯ୍ୟକ୍ରମରେ ଯୋଗଦେବା ଲାଗି ସେ ଗସ୍ତ କରିଥିଲେ।
