ଲଣ୍ଡନ/ନୂଆଦିଲ୍ଲୀ,୨୦ା୧:୨୦୦୨ ଫେବୃୟାରୀ ଓ ମାର୍ଚ୍ଚରେ ସଂଘଟିତ ଗୁଜରାଟର ସାମ୍ପ୍ରଦାୟିକ ଦଙ୍ଗାରେ ତତ୍କାଳୀନ ମୁଖ୍ୟମନ୍ତ୍ରୀ ନରେନ୍ଦ୍ର ମୋଦିଙ୍କ ଭୂମିକା ଥିବା ବିଷୟ ବ୍ରିଟିଶ୍ ବ୍ରଡ୍କାଷ୍ଟିଂ କର୍ପୋରେଶନ୍ (ବିବିସି)ରେ ମଙ୍ଗଳବାର ରାତିରେ ପ୍ରସାରିତ ହୋଇଥିଲା। ଚିଚାର୍ଡ କୁକ୍ସନ ଏବଂ ମାଇକ୍ ରାଡ୍ଫୋର୍ଡଙ୍କ ପ୍ରଯୋଜନାରେ ନିର୍ମିତ ‘ଇଣ୍ଡିଆ: ଦି ମୋଦି କ୍ୱେଶ୍ଚେନ୍’ ଶୀର୍ଷକ ଏହି ଡକ୍ୟୁମେଣ୍ଟାରିରେ ପ୍ରଧାନମନ୍ତ୍ରୀ ମୋଦି ଓ ଦେଶର ମୁସ୍ଲିମ୍ ସଂଖ୍ୟାଲଘୁଙ୍କ ମଧ୍ୟରେ ବଢ଼ୁଥିବା ଉତ୍ତେଜନାକୁ ପ୍ରଦର୍ଶିତ କରାଯାଇଛି। ୧ ହଜାରରୁ ଊର୍ଦ୍ଧ୍ୱ ଲୋକଙ୍କ ଜୀବନ ଯାଇଥିବା ଗ୍ରୋଧ୍ରା ଦଙ୍ଗା ଉପରେ ବ୍ରିଟେନ୍ ସରକାର ଏକ ତଦନ୍ତ କରାଇଥିଲେ। ଉକ୍ତ ତଦନ୍ତରୁ ଏହି ବିଷୟ ଜଣାପଡ଼ିଥିବା ବ୍ରିଟେନର ନ୍ୟାଶନାଲ ବ୍ରଡ୍କାଷ୍ଟର ବିବିସି ସିରିଜ୍ରେ ଦର୍ଶାଯାଇଛି। ଭାରତର ବହିର୍ବ୍ୟାପାର ମନ୍ତ୍ରଣାଳୟ ମୁଖପାତ୍ର ଅରିନ୍ଦମ ବାଗ୍ଚୀ ଏହାକୁ ଉପନିବେଶବାଦୀ ମାନସିକତା ବୋଲି ନିନ୍ଦା କରିଛନ୍ତି। ବ୍ରିଟେନ୍ ପ୍ରଧାନମନ୍ତ୍ରୀ ଋଷି ସୁନକ ଭାରତୀୟ ପ୍ରତିପକ୍ଷ ମୋଦିଙ୍କୁ ନେଇ ଏଭଳି ଚିତ୍ରଣ ସହ ଏକମତ ନ ଥିବା କହିଛନ୍ତି। ଏହି ପ୍ରସଙ୍ଗରେ ବିବାଦ ସୃଷ୍ଟି ହେବା ପରେ ୟୁଟ୍ୟୁବ୍ ସମେତ ଆଉ କେତେକ ଲାଇଭ୍ ଷ୍ଟ୍ରିମିଂ ଚ୍ୟାନେଲ ଭିଡିଓକୁ ହଟାଇଦେଇଛନ୍ତି।
