ଉଦୟପୁର, ୧୫।୫ : ରାଜସ୍ଥାନର ଉଦୟପୁରରେ ଚାଲିଥିବା କଂଗ୍ରେସର ଚିନ୍ତନ ଶିବିରର ତୃତୀୟ ଦିନରେ ରାହୁଲ ଗାନ୍ଧୀ କେନ୍ଦ୍ରର ଭାଜପା ସରକାରଙ୍କୁ ଟାର୍ଗେଟ୍ କରିଛନ୍ତି। ଭାଜପାରେ ଏସ୍ସି/ଏସ୍ଟିମାନେ ଅପମାନିତ ହୋଇଛନ୍ତି। ସେଠାରେ ତାଙ୍କ କଥା କେହି ଶୁଣନ୍ତି ନାହିଁ। କଂଗ୍ରେସ ହେଉଛି ଏକମାତ୍ର ଦଳ ଯେଉଁଠାରେ ସମସ୍ତେ ଭୟ ନକରି ନିଜର ସମସ୍ୟା କହିବାର ସୁଯୋଗ ପାଆନ୍ତି। ଦଳର ସମସ୍ତଙ୍କୁ ଏହି ଅଧିକାର ଦିଆଯାଇଛି।
ରାହୁଲ କହିଛନ୍ତି, କିଛି ଚିନ୍ତା ନକରି ଆମେ ଲୋକମାନଙ୍କ ମଧ୍ୟରେ ବସି ସେମାନଙ୍କ ସମସ୍ୟା ବୁଝିବା ଉଚିତ୍। ଜନସାଧାରଣଙ୍କ ସହ ଆମର ସଂଯୋଗ ପୁଣିଥରେ ସ୍ଥାପିତ କରିବାକୁ ପଡିବ। ଲୋକମାନେ ଜାଣନ୍ତି ଯେ କେବଳ କଂଗ୍ରେସ ଦଳ ଦେଶକୁ ଆଗକୁ ନେଇପାରିବ।
ସେ କହିଛନ୍ତି ଯେ ଅକ୍ଟୋବର ମାସରେ ସମଗ୍ର ଦଳ ଜନସାଧାରଣଙ୍କ ନିକଟକୁ ଯାଇ ଯାତ୍ରା ଆରମ୍ଭ କରିବ ବୋଲି କଂଗ୍ରେସ ନିଷ୍ପତ୍ତି ନେଇଛି। କଂଗ୍ରେସର ଜନସାଧାରଣଙ୍କ ସହ ଥିବା ସମ୍ପର୍କ ପୁଣି ଯୋଡ଼ି ହେବ। ଶର୍ଟକଟ ଦ୍ୱାରା ଏହା ଘଟିବ ନାହିଁ ଏବଂ ଏହି କାମ କେବଳ କର୍ମୀଙ୍କ ଝାଳ ବୋହିବା ଦ୍ୱାରା କରାଯାଇପାରିବ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସରକାର ଭାରତର ଯୁବବର୍ଗଙ୍କ ଭବିଷ୍ୟତକୁ ନଷ୍ଟ କରୁଛନ୍ତି।
ଗୋଟିଏ ପଟେ ବେକାରୀ ଏବଂ ଅନ୍ୟ ପଟେ ମୁଦ୍ରାସ୍ଫୀତି ବଢ଼ିଚାଲିଛି। ୟୁକ୍ରେନରେ ଏକ ଯୁଦ୍ଧ ହୋଇଛି, ଏହା ଆଗାମୀ ସମୟରେ ମୁଦ୍ରାସ୍ଫୀତି ଉପରେ ମଧ୍ୟ ପ୍ରଭାବ ପକାଇବ। ଏହାର ସମାଧାନ କରିବା ଆବଶ୍ୟକ। ରାହୁଲ କହିଛନ୍ତି ଯେ ବିମୁଦ୍ରୀକରଣ ଏବଂ ଜିଏସଟି ଆଣି କେନ୍ଦ୍ର ଦେଶର ଏକ ବଡ କ୍ଷତି କରିଛନ୍ତି। ଆଜିର ଯୁଗରେ ଦେଶରେ ଘୃଣା ଏବଂ ହିଂସା ପ୍ରଚାର କରାଯାଉଛି। ଆମର ଲଢ଼େଇ ଏହା ବିରୁଦ୍ଧରେ, ଏହା ଭାଜପାର ଚିନ୍ତାଧାରା ବିରୁଦ୍ଧରେ ବୋଲି ରାହୁଲ କହିଛନ୍ତି।
