ତୁମୁଡିବନ୍ଧ,୧୧ା୩: ତୁମୁଡିବନ୍ଧ ବ୍ଲକ କାର୍ଯ୍ୟାଳୟ ସଭା ଗୃହରେ ଶୁକ୍ରବାର ୪ତମ ସମିତି ବୈଠକ ଅନୁଷ୍ଠିତ ହୋଇଯାଇଛି। ଏହି ବୈଠକକୁ ବ୍ଲକ ଅଧ୍ୟକ୍ଷା ବାସନ୍ତୀ ମାଝି ସଭାପତିତ୍ୱ କରିଥିଲେ। ବୈଠକରେ ବାଲିଗୁଡ଼ା ବିଧାୟକ ଚକ୍ରମଣି କଁହର ମୁଖ୍ୟଅତିଥି ଭାବେ ଯୋଗ ଦେଇଥିଲେ। ସଭାପତି ମାଝି ଉପସ୍ଥିତ ଜନ ପ୍ରତିନିଧିମାନଙ୍କୁ ସ୍ବାଗତ ଭାଷଣ ଦେଇଥିଲେ। ବିଧାୟକ କଁହର ତାଙ୍କ ଅଭିଭାଷଣରେ ସମସ୍ତଙ୍କୁ ସ୍ବାଗତ କରିବା ସହିତ ବିରକ୍ତ ପ୍ରକାଶ କରିଥିଲେ। କାରଣ ବିଭାଗର ଅଧିକାରୀମାନେ ବୈଠକରେ ଯୋଗ ନଦେଇ ତାଙ୍କ ପ୍ରତିନିଧିମାନେ ଯୋଗ ଦେଇଥିଲେ। ଏ ନେଇ ଗୃହରେ ଉଦବେଗ ପ୍ରକାଶ ପାଇଥିଲା। କାର୍ଯ୍ୟସୂଚୀ ପ୍ରକାରେ ୧୧ ବିଷୟରେ ଆଲୋଚନା ହୋଇଥିଲା। ପ୍ରଥମେ ଜଙ୍ଗଲ ବିଭାଗ ଉପରେ ଆଲୋଚନା କରି ଜଙ୍ଗଲକୁ ନିଆଁ ନ ଲଗାଇବା ସେଥିପ୍ରତି ଜନ ସଚେତନତା ସୃଷ୍ଟି କରିବା ସହିତ ଜନ ପ୍ରତିନିଧି ମାନଙ୍କ ସହଯୋଗ ଆବଶ୍ୟକ ବୋଲି କହିଥିଲେ ବିଭାଗୀୟ ଅଧିକାରୀ। ମୃତ୍ତିକା ସଂରକ୍ଷଣ ବିଭାଗ ସମ୍ବନ୍ଧରେ ଆଲୋଚନା ବେଳେ ଏମ୍ଜିଏନ୍ଆର୍ଇଜିଏସ୍ ଚାଲିଥିବା କୃଷି ଭିତ୍ତିକ ବନ୍ଧ ଖନନ କାର୍ଯ୍ୟ ମେଶିନରେ କରାଯାଉଥିବା ଅଭିଯୋଗ କରି ବୈଠକରେ ପ୍ରକାଶ ପାଇଥିଲା। କୃଷି ବିଭାଗ ଉପରେ ଆଲୋଚନା କରି ସରକାର ଚାଷୀଙ୍କ ପାଇଁ ବିଭିନ୍ନ ଯୋଜନା ବାବଦରେ ଜଣାଯାଇଥିଲା। ପ୍ରାଥମିକ ଶିକ୍ଷା ଓ ମଧ୍ୟାହ୍ନ ଭୋଜନ ଉପରେ ଆଲୋଚନା ବେଳେ ବିଭାଗୀୟ ଅଧିକାରୀ ଅନୁପସ୍ଥିତ ଥିବାନେଇ ରେଜୁଲେଶନ ବହିରେ ପ୍ରୋସିଡିଂ କରିବା ଗୃହରେ ନିଷ୍ପତ୍ତି ନିଆଯାଇଛି। ମହିଳା ଓ ଶିଶୁ ବିକାଶ ଯୋଜନା ଉପରେ ଆଲୋଚନା କରି ଅଧିକାଂଶ ଅଙ୍ଗନୱାଡି କେନ୍ଦ୍ର ବନ୍ଦ ରହୁଥିବା କହିଛନ୍ତି ଉପାଧ୍ୟକ୍ଷ ସନ୍ତୋଷ କୁମାର ସାହୁ। ସେହିପରି ଆଗକୁ ଖରାଦିନ ଆସୁଛି, ପାନୀୟ ଜଳ ଯୋଗାଣ ବାବଦରେ ସମସ୍ତ ପ୍ରକାର ପ୍ରସ୍ତୁତି କରି ରହିବା ପାଇଁ ମତ ପ୍ରକାଶ ପାଇଛି। ଖରା ଦିନରେ ଅଂଶୁଘାତ ପାଇଁ ସ୍ବାସ୍ଥ୍ୟସେବା ଯୋଗାଇଦେବା ପାଇଁ ସ୍ବାସ୍ଥ୍ୟ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି। ସେହିପରି ଅନ୍ୟାନ୍ୟ ବିଭାଗ ଉପରେ ଆଲୋଚନା କରାଯାଇଥିଲା। ବୈଠକରେ ଜିଲା ପରିଷଦ ସଭ୍ୟ ନବୀନ ପାତ୍ର, ଏମ୍ପି ପ୍ରତିନିଧି ପ୍ରମୋଦ କୁମାର ସାହୁ, ଉପାଧ୍ୟକ୍ଷ ସନ୍ତୋଷ କୁମାର ସାହୁ, ତୁମୁଡିବନ୍ଧ ତହସିଲଦାର ବନ ବିହାରୀ ହରପାଲ, ତୁମୁଡିବନ୍ଧ ବ୍ଲକ ବିଡିଓ ଦାୟିତ୍ୱରେ ରହିଥିବା ଏବିଡିଓ ଗୋବିନ୍ଦ ଚନ୍ଦ୍ର ଦାସ, ସମସ୍ତ ସରପଞ୍ଚ, ସମିତି ସଭ୍ୟା/ସଭ୍ୟ ଓ ସରକାରୀ ଅଧିକାରୀମାନେ ଉପସ୍ଥିତ ଥିଲେ। ଶେଷରେ ଏବିଡିଓ ଦାସ ସମସ୍ତଙ୍କୁ ଧନ୍ୟବାଦ ଦେଇ ବୈଠକ ଶେଷ କରିଥିଲେ। ଶେଷରେ ବିଧାୟକଙ୍କ ଦ୍ୱାରା ତୁମୁଡିବନ୍ଧରେ ମୁଖ୍ୟମନ୍ତ୍ରୀଙ୍କ କଳାକାର ଭତ୍ତା ବଣ୍ଟନ କରାଯାଇଥିଲା।
