ଖଡ଼ିଆଳ,୨୦ା୫ (ସୁଜିତ କୁମାର ପ୍ରଧାନ): ଖଡ଼ିଆଳ ବ୍ଲକ ସାନମହେଶ୍ୱର ପଞ୍ଚାୟତର ଦେଓବାହାଲ ଓ ରଜାମୁଣ୍ଡା, ବରଗାଁ ପଞ୍ଚାୟତର ଡୁମେରବାହାଲ ଓ ବେନ୍ଦ୍ରାବାହାଲ ଆଦି ୪ ଗ୍ରାମର ଚାଷ ଜମି ତିଖାଲି ଡ୍ୟାମର ନାକ ତଳେ ଥିଲେ ମଧ୍ୟ ଜଳସେଚନରୁ ବଞ୍ଚତ୍ତ ରହୁଛି। ଏହି ପରିପ୍ରେକ୍ଷୀରେ ମଙ୍ଗଳବାର ଖଡ଼ିଆଳଠାରେ ଥିବା ପ୍ରକଳ୍ପ କାର୍ଯ୍ୟାଳୟରେ ଏକ ବୈଠକ ଅନୁଷ୍ଠିତ ହୋଇଥିଲା। ଏଥିରେ ଖଡ଼ିଆଳ ବିଧାୟକ ଅଧିରାଜ ମୋହନ ପାଣିଗ୍ରାହୀ, ତିଖାଲି ଡ୍ୟାମ ମୁଖ୍ୟ ନିର୍ମାଣ ଯନ୍ତ୍ରୀ ପ୍ରେମାନନ୍ଦ ମାଝୀ, ବ୍ଲକ ଉପାଧ୍ୟକ୍ଷ ଗୌତମ ତାଣ୍ଡି, ବରଗାଁ ପଞ୍ଚାୟତ ସରପଞ୍ଚ ଗୋବିନ୍ଦ ବିହାରୀ ବାରିକ, ଚାଷୀ ନେତା ରମେଶ କୁମାର ଠାକୁର, ସିଦ୍ଧାର୍ଥ ଶଙ୍କର ଯୋଶୀ, ଭୁବନେଶ୍ୱର ପଟେଲ, ପରମେଶ୍ବର ବାରିକ, ଦେବଦତ୍ତ ପୋଡ, ଦଶମୁ ବେହେରା ପ୍ରମୁଖ ଯୋଗଦେଇଥିଲେ। ଏହି ସମୟରେ ଉପରୋକ୍ତ ୪ ଗ୍ରାମର ଜମିକୁ ମେଗା ଯୋଜନାରେ ସାମିଲ କରି ପାଣି ଯୋଗାଇଦେବା ପାଇଁ ଚାଷୀମାନେ ଦାବି ଉପସ୍ଥାପନ କରିଥିଲେ। ସୂଚନାଥାଉ କି ଏହି ଚାରିଖଣ୍ଡ ଗ୍ରାମକୁ ଚାନ୍ଦୋପଲା ମେଗା ପ୍ରକଳ୍ପ ୨ରେ ସାମିଲ ନ କରି ମାଇକ୍ରୋ ପ୍ରକଳ୍ପରେ ସାମିଲ କରାଯାଇଛି। ଏହା ଦ୍ୱାରା କେବଳ ରବି ଚାଷ କରାଯାଇପାରିବ। ପୁଣି ୨୦୨୨ରୁ ମାଇକ୍ରୋ ପ୍ରକଳ୍ପରେ ଏହି ଚାରିଗୋଟି ଗ୍ରାମର ଜମିକୁ ଜଳ ଯୋଗାଣ ପାଇଁ ହାରାହାରି ୪୦ ପ୍ରତିଶତ ପାଇପ୍ ପୋତା ଯାଇଥିବା ବେଳେ ତିଖାଲି ଜଳସେଚନ ପ୍ରକଳ୍ପ ଅଧିକାରୀମାନେ ୮୦ ପ୍ରତିଶତ କାମ ସରିଛି ବୋଲି ବୈଠକରେ ଯୁକ୍ତି ଉପସ୍ଥାପନ କରିଥିଲେ। ଚାଷୀମାନଙ୍କ ଉପସ୍ଥିତିରେ ତଦନ୍ତ କରାଯାଇ ଆସନ୍ତା ୨୪ ତାରିଖ ସୁଦ୍ଧା ରିପୋର୍ଟ ପ୍ରଦାନ କରିବାକୁ ବିଧାୟକ ପାଣିଗ୍ରାହୀ ନିର୍ଦ୍ଦେଶ ଦେଇଥିଲେ। କିନ୍ତୁ ମାଇକ୍ରୋ ପ୍ରକଳ୍ପକୁ ବନ୍ଦ କରି ମେଗା ପ୍ରକଳ୍ପରେ ସାମିଲ କରିବା ପାଇଁ ଚାଷୀମାନେ ଅଡି ବସିଥିଲେ। ତିଖାଲି ଡ୍ୟାମ ମୁଖ୍ୟ ନିର୍ମାଣ ଯନ୍ତ୍ରୀ ପ୍ରେମାନନ୍ଦ ମାଝୀ ଏ ବିଷୟରେ ରାଜ୍ୟ ସରକାରଙ୍କ ଜଳସେଚନ ବିଭାଗ ଇଞ୍ଜିନିୟର ଇନ୍ ଚିଫଙ୍କୁ ଚିଠି ଲେଖୁଛି ବୋଲି ଚାଷୀମାନଙ୍କୁ କହିଥିଲେ। ବୈଠକରେ ତିଖାଲି ଡ୍ୟାମ ଦାୟିତ୍ୱରେ ଥିବା ସୁପରିଣ୍ଟେଣ୍ଡିଂ ଇଞ୍ଜିନିୟର ସୌମ୍ୟ କିଶୋର ଜୟପୁରିଆ, କେନାଲ ଏକ୍ଜିକ୍ୟୁଟିଭ ଇଞ୍ଜିନିୟର ହେମ କୁମାର ନାଏକ, କେନାଲ ଏସ୍ଡିଓ ସୌରଭ କୁମାର ଦାଶ, ଏସ୍ଡିଓ ଅଶତୋଷ ମହାନ୍ତି, ଓସିସି ଜେଇ ପ୍ରଦୀପ କୁମାର ଦାଶ ଉପସ୍ଥିତ ଥିଲେ।
ଫଟୋ: ବୈଠକରେ ଜନସେଚନ ସମସ୍ୟା ନେଇ ଆଲୋଚନା କରାଯାଉଛି।
