ମେଲବୋର୍ନ,୨୧।୨: ଅଷ୍ଟ୍ରେଲିଆନ ଓପନ ମିକ୍ସଡ ଡବଲ୍ସ ଇଭେଣ୍ଟରେ ଏଥର ଚେକ୍ ଗଣରାଜ୍ୟର ବାରବୋରା କ୍ରେଜ୍ସିକୋଭା ଓ ଆମେରିକାର ରାଜୀବ ରାମ ଚାମ୍ପିୟନ ହୋଇଛନ୍ତି। ଶନିବାର ଅନୁଷ୍ଠିତ ଫାଇନାଲ ମ୍ୟାଚ୍ରେ ଷଷ୍ଠ ସିଡ୍ ଏହି ଯୋଡି ୬-୧, ୬-୪ ସେଟ୍ରେ ଅତି ସହଜରେ ସ୍ଥାନୀୟ ଓ୍ବାଇଲ୍ଡ କାର୍ଡ ଯୋଡି ସାମନ୍ଥା ଷ୍ଟୋସୁର ଓ ମାଥ୍ୟୁ ଏବେଡେନଙ୍କୁ ହରାଇ ଟାଇଟଲ ହାସଲ କରିଛନ୍ତି। ଷ୍ଟୋସୁର ପୂର୍ବରୁ ୨୦୧୧ରେ ୟୁଏସ୍ ଓପନ ସିଙ୍ଗଲ୍ସ ଟାଇଟଲ ହାସଲ କରିଥିଲେ। ଫାଇନାଲ ମ୍ୟାଚ୍ରେ ସମ୍ପୂର୍ଣ୍ଣ ରୂପେ ପ୍ରଭାବ ବିସ୍ତାର କରି ଏହି ଚେକ୍ ଓ ଆମେରିକା ଯୋଡି ମାତ୍ର ୫୯ ମିନିଟ୍ରେ ମ୍ୟାଚ୍ ହାତେଇ ନେଇଥିଲେ। ଏଥି ସହିତ କ୍ରେଜସିକୋଭା ମେଲବୋର୍ନରେ କ୍ରମାଗତ ତୃତୀୟ ମିକ୍ସଡ ଡବଲ୍ସ ଟାଇଟଲ ହାସଲ କରିଛନ୍ତି। ସେ ୨୦୧୯ରେ ରାଜୀବ ଓ ଗତବର୍ଷ ନିକୋଲ ମେକ୍ଟିକଙ୍କ ସହିତ ଅଷ୍ଟ୍ରେଲିଆନ ଓପନ୍ ଟାଇଟଲ ହାସଲ କରିଥିଲେ। ସେ ମଧ୍ୟ ଶୁକ୍ରବାର ନିଜ ଦେଶର କାଟେରିନା ସିନିଆକୋଭାଙ୍କ ସହ ମହିଳା ଡବଲ୍ସ ଫାଇନାଲରେ ପ୍ରବେଶ କରିଥିଲେ ଓ ଏଲିସ୍ ମେର୍ଟେନ୍ସ ଏବଂ ଅରିନା ସାବାଲେଙ୍କାଙ୍କଠାରୁ ପରାସ୍ତ ହୋଇ ରନର୍ସ ଅପ୍ ହୋଇଥିଲେ।
