ପଟ୍ଟାମୁଣ୍ଡାଇ,୧୨ା୧ (କଳ୍ପତରୁ ନାୟକ): ସହରାଞ୍ଚଳ, ଗ୍ରାମାଞ୍ଚଳ ଏସ୍ଏଚ୍ଜି ମହିଳାଙ୍କୁ ସ୍ବାବଲମ୍ବୀ କରିବା ଏବଂ ଦୂରଦୂରାନ୍ତରୁ ଆସୁଥିବା ଲୋକଙ୍କୁ ସୁସ୍ବାଦୁ ଖାଦ୍ୟ ଯୋଗାଇ ଦେବା ଲକ୍ଷ୍ୟରେ କେନ୍ଦ୍ରାପଡ଼ା ଜିଲା ପ୍ରଶାସନ ପଟ୍ଟାମୁଣ୍ଡାଇ ବ୍ଲକ ଭିତରେ ୩ବର୍ଷ ତଳେ ମିଶନ ଶକ୍ତି କାଫେ ଖୋଲିଥିଲେ। ଏହାର ପରିଚାଳନା ଦାୟିତ୍ୱ ସ୍ବୟଂ ସହାୟକ ଗୋଷ୍ଠୀର ମହିଳାମାନଙ୍କୁ ଦେଇଥିଲେ। ମାତ୍ର ଏହି କାଫେ କିଛିଦିନ ଚାଲିଲା ପରେ ଏବେ ବନ୍ଦ ହୋଇ ପଡ଼ିଥିବାରୁ ଏହା ଉପରୁ ଜନସାଧାରଣଙ୍କ ଆସ୍ଥା ତୁଟୁଛି।
ପଟ୍ଟାମୁଣ୍ଡାଇ ବ୍ଲକ ପରିସରରେ ମିଶନ ଶକ୍ତି କାଫେ ଖୋଲିବାକୁ ଜିଲା ପ୍ରଶାସନ ନିଷ୍ପତ୍ତି ନେବା ପରେ ବ୍ଲକରେ ଥିବା ଷ୍ଟୋର ଘରକୁ ନବୀକରଣ କରାଯାଇ ୨୦୨୧ ଅଗଷ୍ଟ ୩୧ରେ ଅନୁଷ୍ଠାନିକ ଭାବେ ଉଦ୍ଘାଟନ କରାଯାଇଥିଲା। ଏହାର ପରିଚାଳନା ଦାୟିତ୍ୱ ପଟ୍ଟାମୁଣ୍ଡାଇ ମହିଳା ବିଏଲ୍ଏ ମହାସଂଘକୁ ଦିଆଯାଇଥିଲା। ସଭାପତି ସୁପ୍ରଭା ଦାସଙ୍କ ନେତୃତ୍ୱରେ ସଂଘ ମହିଳାମାନେ ଏହି କାଫେ ପରିଚାଳନା କରୁଥିଲେ। ପରବର୍ତ୍ତୀ ସମୟରେ ଉକ୍ତ ସଂଘ ଏଥିରୁ ଓହରି ଭଡ଼ା ସୂତ୍ରରେ ଏକ ହୋଟେଲ ମାଲିକଙ୍କୁ ହସ୍ତାନ୍ତର କରାଇଥିଲେ। ସେ ମଧ୍ୟ କିଛିଦିନ ଚଳାଇବା ପରେ ଛାଡ଼ି ଚାଲିଯାଇଥିଲେ। ଏହିଭଳି ଭାବେ ୨ରୁ ୩ ଜଣ ହୋଟେଲ ମାଲିକ ଏହି କାଫେକୁ ପରିଚାଳନା କରି ନ ପାରି ଚାଲିଯିବାରୁ ସମ୍ପ୍ରତି ଏହି କାଫେଟି ଅବ୍ୟବହୃତ ହୋଇ ପଡ଼ିରହିଛି। ଏହାର ଲାଇଟ, ଆକ୍ୱାଗାର୍ଡ ଖରାପ ହୋଇ ପଡ଼ିଥିବା ବେଳେ ସୌନ୍ଦର୍ଯ୍ୟକରଣ ସାମଗ୍ରୀଗୁଡ଼ିକ ଏଣେତେଣେ ପଡ଼ିରହିଛି। ଦୂରଦୂରାନ୍ତରୁ ବ୍ଲକ ଓ କୋର୍ଟକୁ ଆସୁଥିବା ଲୋକେ ମିଶନ ଶକ୍ତିରୁ ପ୍ରସ୍ତୁତ ସୁସ୍ବାଦୁ ଖାଦ୍ୟ ମିଳିପାରୁନାହିଁ ବୋଲି ମତ ଦେଇଛନ୍ତି। ଏବେ ଉକ୍ତ କାଫେ ପରିଚାଳନା କରିବାକୁ କେହି ରାଜି ହେଉନାହାନ୍ତି। ଏ ବାବଦରେ ମିଶନ ଶକ୍ତି ଡିପିସି ପ୍ରଭୁ ଧବଳେଶ୍ୱର ବରାଳଙ୍କୁ ପଚାରିବାରେ ଉକ୍ତ କାଫେ ପାଇଁ ଅନ୍ୟ ଏକ ଏସ୍ଏଚ୍ଜିକୁ ମନୋନୀତ କରାଯାଇଛି। ପରିଚାଳନାଗତ ପ୍ରକ୍ରିୟା ଜାରି ରହିଛି। ପରେ ଏହାର ଦାୟିତ୍ୱ ଯୋଗ୍ୟ ଏସ୍ଏଚ୍ଜିକୁ ହସ୍ତାନ୍ତର କରାଯିବ ବୋଲି ସେ କହିଛନ୍ତି।
