ବଲାଙ୍ଗୀର ଅଫିସ,୧୭ା୨: ବଲାଙ୍ଗୀର ସହରରେ ଅପରାଧ ନିୟନ୍ତ୍ରଣ ପାଇଁ ପୋଲିସ ଏବେ ଏକ ନୂଆ ପ୍ରୟୋଗ ଆରମ୍ଭ କରିଛି। ଅଭ୍ୟାସଗତ ଅପରାଧୀଙ୍କୁ ସାବାଡ଼ କରିବା ପାଇଁ ପୋଲିସ ଚଳାଇଛି ମିଶନ୍ ବୁଲଡୋଜର। ଗୁରୁବାର ଚତୁର୍ଥଦିନରେ ପୋଲିସ ଅଭିଯୁକ୍ତ ଶ୍ରୀପତି ସିଂଙ୍କ ରାଜୀବନଗରପଡା ସ୍ଥିତ ଘରେ ବୁଲଡୋଜର ଚଢ଼ାଉ ଭାଙ୍ଗି ଦେଇଛି। ଏସ୍ପି ନୀତିନ କୁଶଲକରଙ୍କ ନିର୍ଦ୍ଦେଶକ୍ରମେ ଆଡିସନାଲ ଏସ୍ପି ସୁରେଶ ନାଏକ, ଏସ୍ଡିପିଓ ତୋଫାନ ବାଗ, ଟାଉନ୍ ଥାନା ଆଇଆଇସି ପ୍ରିୟଙ୍କା ରାଉତରାୟ ଓ ପୋଲିସ ଟିମ୍ ରାଜୀବନଗରରେ ପହଞ୍ଚତ୍ଥିଲେ। ମାଜିଷ୍ଟ୍ରେଟ୍ ଦାୟିତ୍ୱରେ ତହସିଲଦାର ପୁଷ୍ପାଞ୍ଜଳି ପଣ୍ଡା ସ୍ଥିତି ତଦାରଖ କରିଥିଲେ। ବୁଧବାର ମାଲଗୋଦାମପଡାଠାରେ ତେଜରାଜ ନନ୍ଦ, ନିରୋଜ ହରପାଲ ଏବଂ ସଞ୍ଜୟ ତାଣ୍ଡିଙ୍କ ଘରକୁ ଉଚ୍ଛେଦ କରାଯାଇଥିଲା। ମଙ୍ଗଳବାର ଅଭିଯୁକ୍ତ ବବ୍ଲୁ ମହାନନ୍ଦଙ୍କ ବେଆଇନ ଆଡ୍ଡାସ୍ଥଳୀ ସହର ଉପକଣ୍ଠ ଧୁମମରା ବଲାଙ୍ଗୀର-ପାଟଣାଗଡ ୪୨ ନମ୍ବର ରାଜ୍ୟ ରାଜପଥ କଡରେ ଥିବା ହୋଟେଲ ଗଜପତି ଷ୍ଟଲ ଉପରେ ଏବଂ ସୋମବାର ଆରଟିଓ ଅଫିସ ଛକରେ ଅଭିଯୁକ୍ତ ଶ୍ରୀପତି ସିଂ ଅପରାଧିକ ଆଡ୍ଡାସ୍ଥଳୀକୁ ପୋଲିସ ଓ ପ୍ରଶାସନିକ ଟିମ୍ ଭାଙ୍ଗି ଦେଇଛି। ଏସ୍ପି କୁଶଲକର କହିଛନ୍ତି ଯେ, ଅପରାଧିମାନେ ଅପରାଧ ନ ଛାଡିବା ପର୍ଯ୍ୟନ୍ତ ଏହି ଅଭିଯାନ ଜାରି ରହିବ। ବଲାଙ୍ଗୀର ସହରରେ ଆଇନ ଶୃଙ୍ଖଳା ପରିସ୍ଥିତି ସୃଷ୍ଟି କରୁଥିବା କୌଣସି ଅଭିଯୁକ୍ତଙ୍କୁ ଛଡାଯିବନାହିଁ ବୋଲି ସେ କହିଛନ୍ତି। ବଲାଙ୍ଗୀର ସହରରେ କିଛିମାସ ଭିତରେ ଆପରାଧିକ କାର୍ଯ୍ୟକଳାପ ବୃଦ୍ଧିକୁ ନେଇ ଜନଅସନ୍ତୋଷ ତୀବ୍ର ହୋଇଥିଲା। ପୋଲିସର ଦକ୍ଷତା ଉପରେ ଲୋକେ ପ୍ରଶ୍ନ କରିବା ଆରମ୍ଭ କରିଥିଲେ।
