ଶିବାମୋଗା,୮।୯: କର୍ନାଟକର ଶିବାମୋଗା ଜିଲାରେ କିଛି ଦୁର୍ବୃତ୍ତ ୧୫୦ କୁକୁରଙ୍କୁ ଜିଅନ୍ତା ପୋତିଦେଇଛନ୍ତି। ସେପ୍ଟେମ୍ବର ୪ରେ ଭଦ୍ରାବତୀ ସହର ନିକଟ ରଙ୍ଗନାଥପୁରାରେ ଏଭଳି ଘଟଣା ଘଟିଥିବା ପୋଲିସ କହିଛି। ଜଙ୍ଗଲ ମଧ୍ୟରେ କୁକୁରମାନଙ୍କ ଭୋକିବା ଶବ୍ଦ ଶୁଭୁବା ହଠାତ୍ ବନ୍ଦ ହୋଇଯିବାରୁ ସ୍ଥାନୀୟ ଲୋକେ ସନ୍ଦେହ କରିଥିଲେ। ଏହି ସମ୍ପର୍କରେ ସେମାନେ ସ୍ଥାନୀୟ ପ୍ରାଣୀ ଅଧିକାରଙ୍କୁ ଜଣାଇଥିଲେ। ପ୍ରାଣୀ ଅଧିକାରୀ ଘଟଣାର ତଦନ୍ତ କରି କୁକୁରଗୁଡ଼ିକୁ ପୋତି ଦିଆଯାଇଥିବା ଜାଣିବାକୁ ପାଇଥିଲେ। ଏନେଇ ଭଦ୍ରାବତୀ ଗ୍ରାମାଞ୍ଚଳ ଥାନାରେ ଅଭିଯୋଗ ହୋଇଥିଲା। ହେଲେ କୁକୁରଗୁଡ଼ିକୁ ଜୀଅନ୍ତା ପୋତିବାର କାରଣ ଜଣାପଡ଼ିନାହିଁ।
କୁକୁର ବଂଶବୃଦ୍ଧି ରୋକିବା ପାଇଁ ଜଣେ ଠିକାଦାରଙ୍କୁ ଅସ୍ତ୍ରୋପଚାର ଦାୟିତ୍ୱ ଦିଆଯାଇଥିଲା। ସେ ପଇସା ବଞ୍ଚାଇବା ପାଇଁ କୁକୁରକୁ ପୋତି ଦେଇଥିବା ସନ୍ଦେହ କରାଯାଉଛି। ଗତ ମାସରେ କର୍ନାଟକର ହାସନ ଜିଲାର ଏକ ଗ୍ରାମରୁ ମାଙ୍କଡ ଧରାଯାଇଥିଲା। ସେଗୁଡ଼ିକୁ ଅଖାରେ ଭର୍ତ୍ତି କରି ଜଙ୍ଗଲରେ ଛାଡ଼ିବା ପାଇଁ ନିଆଯାଉଥିଲା ବେଳେ ଶ୍ୱାସରୁଦ୍ଧ ହୋଇ ୩୮ ମାଙ୍କଡ ମରିଯାଇଥିଲେ। ଉକ୍ତ ଘଟଣାରେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ ଲାଗି ରାଜ୍ୟ ସରକାରଙ୍କୁ କର୍ନାଟକ ହାଇକୋର୍ଟ ନିର୍ଦ୍ଦେଶ ଦେବା ପରେ ପୋଲିସ ୭ ଜଣଙ୍କୁ ଗିରଫ କରିଛି।
