ଚଟୋଗ୍ରାମ,୫।୨: ଏଠାରେ ଚାଲିଥିବା ଓ୍ବେଷ୍ଟଇଣ୍ଡିଜ ବିପକ୍ଷ ପ୍ରଥମ ଟେଷ୍ଟ ମ୍ୟାଚ୍ରେ ଘରୋଇ ବାଂଲାଦେଶ ଟେଲଏଣ୍ଡର ମେହିଦି ହାସନ ମିରାଜଙ୍କ ଶତକ ସହାୟତାରେ ପ୍ରଥମ ଇନିଂସରେ ବିଶାଳ ସ୍କୋର ହାସଲ କରିଛି। ଟସ୍ ଜିତି ବାଂଲାଦେଶ ପ୍ରଥମେ ବ୍ୟାଟିଂ କରି ୧୫୦.୨ ଓଭରରେ ୪୩୦ ରନ କରି ଅଲ୍ଆଉଟ ହୋଇଛି। ଜବାବରେ ପ୍ରଥମ ଇନିଂସ ଆରମ୍ଭ କରି ଓ୍ବେଷ୍ଟଇଣ୍ଡିଜ ଗୁରୁବାର ଦ୍ୱିତୀୟ ଦିବସ ଖେଳ ଶେଷ ସୁଦ୍ଧା ୨୯ ଓଭରରେ ୨ ଉଇକେଟ ହରାଇ ୭୫ ରନ ସଂଗ୍ରହ କରିଛି। ଫଳରେ ୮ ଉଇକେଟ ହାତରେ ରଖି ଓ୍ବେଷ୍ଟଇଣ୍ଡିଜ୍ ଏବେ ୩୫୫ ରନ ପଛରେ ପଡିଛି। ଷ୍ଟମ୍ପ ଅପସାରଣ ବେଳକୁ ଓପନର ତଥା ଅଧିନାୟକ କ୍ରେଗ୍ ବ୍ରାଥ୍ଓ୍ବେଟ ୪୯ ଓ ଏନ୍କ୍ରୁମା ବୋନର ୧୭ ରନ କରି ଅପରାଜିତ ରହିଛନ୍ତି। ଆରମ୍ଭରୁ ୨ ଉଇକେଟ ହରାଇ ଓ୍ବେଷ୍ଟଇଣ୍ଡିଜ ଝଟକା ଖାଇଥିଲା। ଓପନର ଜନ୍ କ୍ୟାମ୍ପବେଲ ୩ ଓ ଶାନେ ମୋସଲେ ୨ ରନ କରି ଦ୍ରୁତ ବୋଲର ମୁସ୍ତାଫିଜୁର ରହମାନଙ୍କ ଦ୍ୱାରା ଏଲ୍ବିଡବ୍ଲ୍ୟୁ ହୋଇ ପ୍ୟାଭିଲିୟନ ଫେରିଥିଲେ।
ଅସମାପ୍ତ ପ୍ରଥମ ଇନିଂସ ସ୍କୋର ୨୪୨/୫ରୁ ବାଂଲାଦେଶ ଖେଳ ଆରମ୍ଭ କରି ଗୁରୁବାର ଅଲ୍ଆଉଟ ହୋଇଥିଲା। ଓଭରନାଇଟ୍ ବ୍ୟାଟ୍ସମ୍ୟାନ ସାକିବ ଅଲ ହାସନ ୩୯ରୁ ଖେଳ ଆରମ୍ଭ କରି ୬୮ ଓ ଲିଟନ ଦାସ ୩୪ରୁ ଖେଳ ଆରମ୍ଭ କରି ୩୮ ରନ୍ କରି ପ୍ୟାଭିଲିୟନ ଫେରିଥିଲେ। ଏହାପରେ ମିରାଜ ୧୦୩ ରନର ଶତକୀୟ ଇନିଂସ ଖେଳି ଦଳକୁ ବିଶାଳ ସ୍କୋର ପ୍ରଦାନ କରିଥିଲେ। ଅନ୍ୟମାନଙ୍କ ମଧ୍ୟରେ ତାଇଜୁଲ ଇସ୍ଲାମ ୧୮ ଓ ନୟିମ ହାସନ ୨୪ ରନ ସଂଗ୍ରହ କରିଥିବା ବେଳେ ମୁସ୍ତାଫିଜୁର ୩ ରନ୍ କରି ଅପରାଜିତ ରହିଥିଲେ। ପୂର୍ବରୁ ଓପନର ଶଦମାନ ଇସ୍ଲାମ ୫୯ ରନର ଅର୍ଦ୍ଧଶତକୀୟ ଇନିଂସ ଖେଳିଥିଲେ। ବୋଲିଂରେ ଓ୍ବେଷ୍ଟଇଣ୍ଡିଜ ତରଫରୁ ଜୋମେଲ ଓ୍ବାରିକାନ ସର୍ବାଧିକ ୪, କେମର ରୋଚ, ଶାନନ ଗାବ୍ରିଏଲ ଓ ଏନ୍କ୍ରୁମା ବୋନର ଗୋଟିଏ ଲେଖାଏ ଉଇକେଟ ଅକ୍ତିଆର କରିଥିଲେ।
ସଂକ୍ଷିପ୍ତ ସ୍କୋର:
ବାଂଲାଦେଶ ପ୍ରଥମ ଇନିଂସ- ୧୫୦.୨ ଓଭରରେ ୪୩୦ ଅଲଆଉଟ୍
(ମିରାଜ- ୧୦୩, ସାକିବ- ୬୮, ଓ୍ବାରିକାନ- ୪/ ୧୩୩)।
ଓ୍ବେଷ୍ଟଇଣ୍ଡିଜ ପ୍ରଥମ ଇନିଂସ- ୨୯ ଓଭରରେ ୭୫/୨
(ବ୍ରାଥଓ୍ବେଟ- ୪୯*, ମୁସ୍ତାଫିଜୁର- ୨/୧୮)।
