ତାସ୍କେଣ୍ଟ, ୧୮ା୪ (ପି.ଟି.)- ପୂର୍ବତନ ବିଶ୍ୱ ଚାମ୍ପିୟନ ମୀରାବାଈ ଚାନୁ ଭାରୋତ୍ତୋଳନକୁ ଜବରଦସ୍ତ ପ୍ରତ୍ୟାବର୍ତ୍ତନ କରିଛନ୍ତି। ଏଠାରେ ଚାଲିଥିବା ଏସିଆନ ଚାମ୍ପିୟନଶିପ୍ରେ ସେ କ୍ଲିନ ଆଣ୍ଡ୍ ଜର୍କରେ ନୂଆ ବିଶ୍ୱ ରେକର୍ଡ କରିଛନ୍ତି। ବ୍ରୋଞ୍ଜ ପଦକ ହାସଲ କରିଥିଲେ ମଧ୍ୟ ସେ ନିଜ ଜାତୀୟ ରେକର୍ଡକୁ ମଧ୍ୟ ଭଙ୍ଗ କରିଛନ୍ତି। ଏହାଛଡ଼ା ୬ଟି ବାଧ୍ୟତାମୂଳକ କ୍ୱାଲିଫାଇଂ ଇଭେଣ୍ଟରେ ଅଂଶଗ୍ରହଣ କରି ସେ ଟୋକିଓ ଅଲିମ୍ପିକ୍ସ ପାଇଁ ଯୋଗ୍ୟତା ଅର୍ଜନ କରିଛନ୍ତି। ୨୬ ବର୍ଷୀୟା ଭାରତୀୟ ଭାରୋତ୍ତୋଳିକା ସ୍ନାଚ୍ରେ ୮୬କେଜି ଉତ୍ତୋଳନ କରିଥିବାବେଳେ କ୍ଲିନ୍ ଆଣ୍ଡ୍ ଜର୍କରେ ୧୧୯କେଜି ଉଠାଇ ଏକ ବିଶ୍ୱ ରେକର୍ଡ କରିଛନ୍ତି। ସେ ଟୋଟାଲ ୨୦୫ କେଜି ଉତ୍ତୋଳନ କରିଥିଲେ। ପୂର୍ବରୁ କ୍ଲିନ ଆଣ୍ଡ ଜର୍କରେ ବିଶ୍ୱ ରେକର୍ଡ ୧୧୮ କେଜି ରହିଥିଲା। ଗତବର୍ଷ ଫେବୃୟାରୀରେ ଅନୁଷ୍ଠିତ ଜାତୀୟ ଚାମ୍ପିୟନଶିପ୍ରେ ୪୯କେଜିରେ ଚାନୁଙ୍କ ବ୍ୟକ୍ତିଗତ ଶ୍ରେଷ୍ଠ ଟୋଟାଲ ୨୦୩କେଜି (୮୮କେଜି+୧୧୫କେଜି) ରହିଥିଲା। ସ୍ବର୍ଣ୍ଣପଦକ ହାସଲ କରିଥିବା ଚାଇନାର ହୋଉ ଝିହୁଇ ସ୍ନାଚ୍ରେ ନୂଆ ବିଶ୍ୱ ରେକର୍ଡ ସହ ଟୋଟାଲ ୨୧୩କେଜି(୯୬କେଜି+୧୧୭କେଜି) ଉତ୍ତୋଳନ କରିଥିଲେ। ଚାଇନାର ଜିଆଙ୍ଗ ହୁଇହୁଆ ରୌପ୍ୟ ପଦକ ପାଇଥିଲେ। ସେ ୨୦୭କେଜି (୮୯କେଜି+୧୧୮କେଜି) ଉତ୍ତୋଳନ କରିଥିଲେ। ଅନ୍ୟପକ୍ଷରେ ଝିଲି ଦଳବେହେରା ୪୫ କାଟେଗୋରିରେ ଅତିକମ୍ରେ ଏକ ରୌପ୍ୟ ଜିତିବା ନିଶ୍ଚିତ କରିଛନ୍ତି। ରବିବାର ସେ ଫିଲିପାଇନ୍ସର ମେରୀ ଫ୍ଲୋର ଡିଆଜ୍ଙ୍କ ସହିତ ମୁକାବଲା କରିବେ।
