ଦିଗପହଣ୍ଡି,୩୦|୭(ଅଶେଷ ନାଥ ମିଶ୍ର) : ଗଞ୍ଜାମ ଜିଲା ଦିଗପହଣ୍ଡି ସ୍ଥିତ ମିଶନ ଶକ୍ତି ସମ୍ମିଳନୀ କକ୍ଷରେ ଗୁରୁବାର ଦିଗପହଣ୍ଡି ବ୍ଲକସ୍ତରୀୟ ଏମଜିଏନଆରଇଜିଏ ଯୋଜନାର ସାମାଜିକ ସମୀକ୍ଷା ଜନଶୁଣାଣି ଅନୁଷ୍ଠିତ ହୋଇଯାଇଛି। ତେବେ ଏହି ଜନଶୁଣାଣି ସମୟରେ ବଡ଼ଡୁମ୍ବୁଳା ପଞ୍ଚାୟତର କ୍ଷେତପୋଖରୀ ନିର୍ମାଣରେ ହୋଇଥିବା ବ୍ୟାପକ ଅନିୟମିତତାକୁ ନେଇ ସରପଞ୍ଚ ଓ ସମିତିସଭ୍ୟ ମୁହାଁମୁହିଁ ହେବା ସହ ପ୍ରବଳ ହଟ୍ଟଗୋଳ ସୃଷ୍ଟି ହୋଇଥିଲା। ପରିସ୍ଥିତି ଅସମ୍ଭାଳ ହେବାରୁ ଉପଜିଲାପାଳ ସଭାସ୍ଥଳରୁ ଉଠି ଚାଲିଯାଇଥିବା ଦେଖିବାକୁ ମିଳିଛି।
ବ୍ରହ୍ମପୁର ଉପଜିଲାପାଳ ଅବିନାଶ କୁମାରଙ୍କ ସଭାପତିତ୍ୱରେ ଅନୁଷ୍ଠିତ ଏହି ବୈଠକରେ ବିଡ଼ିଓ ଅନାମିକା ପାଣ୍ଡେ, ଜିଲା ସାମାଜିକ ସମୀକ୍ଷକ ରବୀନ୍ଦ୍ର ମଲାଣ, ସହକାରୀ ନିର୍ବାହୀ ଯନ୍ତ୍ରୀ ଇ. ଅଶୋକ କୁମାର ଶତପଥୀ ଏବଂ ଫରେଷ୍ଟର ସନ୍ତୋଷ ବିଷୋୟୀ ପ୍ରମୁଖ ମଞ୍ଚାସୀନ ଥିଲେ। ବ୍ଲକ ପ୍ରଗତି ସହାୟକ ସନ୍ତୋଷ ସାହୁ ସ୍ୱାଗତ ଅଭିଭାଷଣ ଦେବା ସହ ବ୍ଲକର ୨୫ଟି ପଞ୍ଚାୟତରେ ଗତ ୨୦୨୫ ଅକ୍ଟୋବର ୧ ଠାରୁ ୨୦୨୬ ମାର୍ଚ୍ଚ ୩୧ ପର୍ଯ୍ୟନ୍ତ ହୋଇଥିବା ବିଭିନ୍ନ ପ୍ରକଳ୍ପର ବିବରଣୀ ପାଠ କରିଥିଲେ।
ସମୀକ୍ଷା ସମୟରେ ବ୍ଲକ ସାମାଜିକ ସମୀକ୍ଷକ ଶଙ୍କର ମିଶ୍ର ଅଡିଟ୍ ରିପୋର୍ଟ ଉପସ୍ଥାପନ କରି କହିଥିଲେ ଯେ, ବଡ଼ଡୁମ୍ବୁଳା ଗ୍ରାମର ସନ୍ତୋଷିନୀ ଜାନୀଙ୍କ ନାମରେ ଥିବା କ୍ଷେତପୋଖରୀ ଖନନ ପାଇଁ ୨ ଲକ୍ଷ ୧୪ ହଜାର ଟଙ୍କା ଧାର୍ଯ୍ୟ ହୋଇଥିଲା। ମାତ୍ର ବାସ୍ତବରେ କୌଣସି ପୋଖରୀ ଖନନ ନକରି କେବଳ ୩୩୧ ଶ୍ରମ ଦିବସ ସୃଷ୍ଟି ଦର୍ଶାଇ ୪୯ ହଜାର ୪୯ ଟଙ୍କା ଆତ୍ମସାତ୍ କରାଯାଇଛି। ଆଶ୍ଚର୍ଯ୍ୟର କଥା ହେଲା, କୌଣସି କାମ ନ ହୋଇଥିଲେ ମଧ୍ୟ ଚଳିତବର୍ଷ ପୁଣି ଥରେ ଉକ୍ତ ପ୍ରକଳ୍ପ ପାଇଁ ଅନୁଦାନ ମଞ୍ଜୁର କରାଯାଇଛି।
ଏହି ରିପୋର୍ଟ ଉପରେ ବଡ଼ଡୁମ୍ବୁଳା ସମିତିସଭ୍ୟ ରମେଶ ଚନ୍ଦ୍ର ପାଢ଼ୀ ପୋଖରୀ ନିର୍ମାଣରେ କୌଣସି ଅନିୟମିତତା ହୋଇନଥିବା ଦାବି କରିଥିଲେ। ମାତ୍ର ସରପଞ୍ଚ ଗୀତାଞ୍ଜଳି ଜାନୀ ଏହାର ତୀବ୍ର ପ୍ରତିବାଦ କରି କହିଥିଲେ ଯେ, ତାଙ୍କର ଅଜ୍ଞାତରେ ଏହି ଦୁର୍ନୀତି ହୋଇଛି ଏବଂ ସେ ଏହାର ତଦନ୍ତ ଦାବି କରୁଛନ୍ତି।
ଅନ୍ୟପକ୍ଷରେ ଜିଲା ପରିଷଦ ସଦସ୍ୟ ତଥା ପୂର୍ବତନ ବ୍ଲକ ଅଧ୍ୟକ୍ଷ ବିପିନ ଚନ୍ଦ୍ର ପ୍ରଧାନ ସରପଞ୍ଚଙ୍କ ଅଭିଯୋଗକୁ ମିଥ୍ୟା ଓ ନିରାଧାର କହିବା ସହ ସାମାଜିକ ସମୀକ୍ଷକ କିଛି ମୁଷ୍ଟିମେୟ ବ୍ୟକ୍ତିଙ୍କ ପ୍ରରୋଚନାରେ ଭୁଲ୍ ରିପୋର୍ଟ ଦେଇଛନ୍ତି ବୋଲି ଅଭିଯୋଗ କରିଥିଲେ। ଜିଲା ପରିଷଦ ସଦସ୍ୟ କାହିଁକି ଏଥିରେ ମୁଣ୍ଡ ଖେଳାଉଛନ୍ତି ବୋଲି ପ୍ରଶ୍ନ କରି ସରପଞ୍ଚ ପାଟିତୁଣ୍ଡ କରିବାରୁ ସଭାରେ ପ୍ରବଳ ହଟ୍ଟଗୋଳ ସୃଷ୍ଟି ହୋଇଥିଲା। ପରିସ୍ଥିତି ଅଣାୟତ୍ତ ହେବାରୁ ଉପଜିଲାପାଳ ନିଜ ଆସନରୁ ଉଠି ପଳାଇଥିଲେ।
ଏହାଛଡ଼ା ଜନଶୁଣାଣି ସମ୍ପର୍କରେ ପୂର୍ବରୁ ପଞ୍ଚାୟତଗୁଡ଼ିକରେ କୌଣସି ପ୍ରଚାର ପ୍ରସାର କରାଯାଇନଥିବା ଅଭିଯୋଗ କରି ବ୍ରହ୍ମପୁର ଏମପିଙ୍କ ବ୍ଲକ ପ୍ରତିନିଧି କେ. ହରିବନ୍ଧୁ ରେଡ୍ଡୀ ଏବଂ ସରପଞ୍ଚ ଫଣୀନ୍ଦ୍ର ଚନ୍ଦ୍ର ଗୋସ୍ୱାମୀଙ୍କ ସମେତ ମାତ୍ର ୩ ଜଣ ସରପଞ୍ଚ ଏହି ବୈଠକରେ ଉପସ୍ଥିତ ଥିଲେ।
