ମାଡ୍ରିଡ୍, ୭।୬: ସ୍ପେନ୍ ମାଟିରେ ପୁଣି ଥରେ ଦେଖିବାକୁ ମିଳିଛି ଲିଓନେଲ ମେସିଙ୍କ ଚମକ। ଆର୍ଜେଣ୍ଟିନା ଷ୍ଟ୍ରାଇକର ରବିବାର ଇଷ୍ଟୋନିଆ ବିପକ୍ଷ ଏକ ବନ୍ଧୁତ୍ୱପୂର୍ଣ୍ଣ ଅନ୍ତର୍ଜାତୀୟ ମ୍ୟାଚ୍ରେ ୫ ଗୋଲ ସ୍କୋର କରିଛନ୍ତି। ଆର୍ଜେଣ୍ଟିନାକୁ ୫-୦ର ବୃହତ୍ ବିଜୟ ଦେବା ସହ ସର୍ବାଧିକ ଅନ୍ତର୍ଜାତୀୟ ଗୋଲ ସ୍କୋରରଙ୍କ ତାଲିକାରେ ହଙ୍ଗେରୀର ଫେରେଙ୍କ ପୁସ୍କାସଙ୍କୁ ସେ ପଛରେ ପକାଇଛନ୍ତି। ପାମ୍ପାଲୋନା ସହରର ଏଲ୍ ସାଡାର ଷ୍ଟାଡିୟମରେ ମ୍ୟାଚ୍ର ୮ମ ମିନିଟ୍ରେ ଏକ ପେନାଲ୍ଟି କିକ୍ ଜରିଆରେ ଆର୍ଜେଣ୍ଟିନା ପାଇଁ ଖାତା ଖୋଲିଥିଲେ। ୩୪ ବର୍ଷୀୟ ମେସି ପ୍ରଥମାର୍ଦ୍ଧର ଅନ୍ତିମ ମିନିଟ୍ରେ ଦ୍ୱିତୀୟ ଗୋଲ ଦେଇଥିଲେ। ଦ୍ୱିତୀୟାର୍ଦ୍ଧରେ ୪୭, ୭୧ ଓ ୭୬ତମ ମିନିଟ୍ରେ ଗୋଟିଏ ଲେଖାଏ ଗୋଲ ସ୍କୋର କରି ମେସି ୫ ଗୋଲ ପୂରଣ କରିଥିଲେ। ଏଥିସହିତ ପ୍ୟାରିସ୍ ସେଣ୍ଟ ଜର୍ମେନ ଫରଓ୍ବାର୍ଡ ପ୍ରଥମ ଖେଳାଳି ଭାବେ ଚାମ୍ପିୟନ୍ ଲିଗ୍ ଏବଂ ସିନିୟର ଅନ୍ତର୍ଜାତୀୟ ମ୍ୟାଚ୍ରେ ୫ ଗୋଲ କରିଛନ୍ତି। ସେ ଅନ୍ତିମ ଥର ୧୦ ବର୍ଷ ତଳେ ବାର୍ସିଲୋନା ପାଇଁ ବାୟର ଲେଭରକୁସେନ ବିପକ୍ଷ ଚାମ୍ପିୟନ୍ସ ଲିଗ୍ ପ୍ରିକ୍ୱାର୍ଟର ଫାଇନାଲରେ ଏହି ସଫଳତା ପାଇଥିଲେ। ଏହି ମ୍ୟାଚ୍କୁ ବାର୍ସିଲୋନା ୭-୧ରେ ଜିତିଥିଲା। ମେସି ଏବେ ବି ସର୍ବାଧିକ ଅନ୍ତର୍ଜାତୀୟ ଗୋଲ ସ୍କୋରରଙ୍କ ତାଲିକାର ୩ୟ ସ୍ଥାନରେ ଥିବା ମାଲେସିଆ ଫରଓ୍ବାର୍ଡ ମୋଖତାର ଦାହାରିଙ୍କଠାରୁ ୩ ଗୋଲ ପଛରେ ଅଛନ୍ତି। ଏହି ତାଲିକାରେ ଇରାନର ଅଲି ଦାଇ (୧୦୯)ଦ୍ୱିତୀୟ ସ୍ଥାନରେ ଥିବା ବେଳେ ଶୀର୍ଷରେ ଅଛନ୍ତି ପର୍ତ୍ତୁଗାଲର କ୍ରିଷ୍ଟିଆନୋ ରୋନାଲ୍ଡୋ(୧୧୭ ଗୋଲ)।
