ଭଞ୍ଜନଗର,୩୦ା୬(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ଶ୍ରୀ ଅରବିନ୍ଦ ଶକ୍ତିପୀଠର ବର୍ତ୍ତମାନର ଟ୍ରଷ୍ଟି, ଶ୍ରୀ ଅରବିନ୍ଦ ପାଠଚକ୍ର ଭଞ୍ଜନଗର ଅଞ୍ଚଳ ସଂଗଠକ ରଘୁନାଥ ପଣ୍ଡା (୮୯) ସୋମବାର ମଧ୍ୟାହ୍ନରେ ଭୁବନେଶ୍ୱରର ଏକ ଘରୋଇ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ପରଲୋକ ଗମନ କରିଛନ୍ତି। ଏଥିସହ ପଣ୍ଡା ଶ୍ରୀଅରବିନ୍ଦ ସଂଗଠନର ରାଜ୍ୟର ବିଭିନ୍ନ କର୍ମକର୍ତ୍ତା ଦାୟିତ୍ୱରେ ମଧ୍ୟ ଅନେକ ସମୟ ଥିଲେ। ତାଙ୍କ ପ୍ରଚେଷ୍ଟାରେ ଗଞ୍ଜାମ ସମେତ ରାଜ୍ୟର ଅନେକ ସ୍ଥାନରେ ଶ୍ରୀଅରବିନ୍ଦ ପୂର୍ଣ୍ଣାଙ୍ଗ ଶିକ୍ଷାକେନ୍ଦ୍ର, ପାଠଚକ୍ର ସମେତ ଅନେକ ଧ୍ୟାନ ମନ୍ଦିର ସ୍ଥାପନ ହୋଇପାରିଥିଲା। ଭଞ୍ଜନଗର ଶ୍ରୀଅରବିନ୍ଦ ପୂର୍ଣ୍ଣାଙ୍ଗ ଶିକ୍ଷାକେନ୍ଦ୍ର, ଶ୍ରୀଅରବିନ୍ଦ ଶକ୍ତିପୀଠ ପ୍ରତିଷ୍ଠାରେ ତାଙ୍କର ପ୍ରମୁଖ ଭୂମିକା ଥିଲା। ଉକ୍ତ ଦୁଇ ଅନୁଷ୍ଠାନର ସଭାପତି ବହୁବର୍ଷ ଧରିଥିଲେ। ଶ୍ରୀମାଙ୍କ ବାଣୀ ସେ ରାଜ୍ୟ ସାରା ବୁଲି ବୁଲି ପ୍ରଚାର କରୁଥିଲେ।
ରାଜ୍ୟର ଜଣେ ଜଣାଶୁଣା ମାତୃପ୍ରେମୀ ଭାବେ ରଘୁନାଥ ଭାଇ ପରିଚିତ ଥିଲେ। ତାଙ୍କର ବିୟୋଗରେ ମାତୃ ପ୍ରେମୀଙ୍କ ମଧ୍ୟରେ ଶୋକର ଛାୟା ଖେଳିଯାଇଛି। ସନ୍ଧ୍ୟାରେ ଭଞ୍ଜନଗରରେ ତାଙ୍କ ମରଶରୀର ପହଞ୍ଚିବା ପରେ ସ୍ଥାନୀୟ ଶ୍ରୀ ଅରବିନ୍ଦ ଶକ୍ତିପୀଠରେ ସର୍ବସାଧାରଣଙ୍କ ଦର୍ଶନ ପାଇଁ କିଛି ସମୟ ରଖାଯିବ ବୋଲି ତାଙ୍କ ବଡ଼ ପୁଅ ତଥା ଘୁମୁସର ଆବାସିକ ମହାବିଦ୍ୟାଳୟର ସମ୍ପାଦକ ତ୍ରୈଲୋକ୍ୟ ପଣ୍ଡା ଏଠାରେ ସୂଚନା ଦେଇଛନ୍ତି।
ସୂଚନାଯୋଗ୍ୟ, ସ୍ବର୍ଗତ ପଣ୍ଡା ଡହ ଜଳସେଚନ ବିଭାଗର ଏସ୍ଡିଓ ଥିଲେ। ତାଙ୍କରି ସମୟରେ ଡହ ଜଳଭଣ୍ଡାର ପ୍ରକଳ୍ପ କାର୍ଯ୍ୟ ହୋଇଥିଲା। ସେ ଭଞ୍ଜନଗର ସହରତଳି ଲଣ୍ଡେଇସାହି ଗାୟତ୍ରୀ ନଗରରେ ବାସିନ୍ଦା ଅଟନ୍ତି।
