ନୂଆଦିଲ୍ଲୀ, ୨୧।୭(ପି.ଟି.)- ମେମୋଲ ରକି ଭାରତୀୟ ମହିଳା ଫୁଟ୍ବଲ ଦଳର କୋଚ୍ ପଦ ଛାଡ଼ିଛନ୍ତି। ଗତ ୪ ବର୍ଷ ଧରି ଜାତୀୟ ଦଳ ଦାୟିତ୍ୱରେ ଥିବା ମେମୋଲ ବ୍ୟକ୍ତିଗତ କାରଣ ଦର୍ଶାଇ ଓହରି ଯାଇଛନ୍ତି। ପୂର୍ବରୁ ସହକାରୀ କୋଚ୍ ଥିବା ରକି ୨୦୧୭ରୁ ଦଳର ମୁଖ୍ୟ କୋଚ୍ ପଦରେ ରହିଥିଲେ। ତାଙ୍କ ପ୍ରଶିକ୍ଷଣରେ ଭାରତୀୟ ଦଳ ଅନ୍ତର୍ଜାତୀୟ ସ୍ତରରେ ଅନେକ ସଫଳତା ପାଇଥିଲା। ତାଙ୍କ ଉପରେ ବିଶ୍ୱାସ ରଖିଥିବାରୁ ସେ ସର୍ବଭାରତୀୟ ଫୁଟ୍ବଲ ଫେଡେରେଶନ (ଏଆଇଏଫ୍ଏଫ୍)କୁ ଧନ୍ୟବାଦ ଜଣାଇଛନ୍ତି। ”ଗତ କିଛିବର୍ଷ ଧରି ଦଳର ଅଗ୍ରଗତିରେ ମୁଁ ବହୁତ ଖୁସି। ଆମକୁ ମିଳିଥିବା ସୁବିଧା ସୁଯୋଗ ବହୁତ ବଢ଼ିଆ ଥିଲା। ଏଆଇଏଫ୍ଏଫ୍, ଭାରତୀୟ କ୍ରୀଡ଼ା ପ୍ରାଧିକରଣ (ସାଇ) ଏବଂ ଓଡ଼ିଶା ସରକାରଙ୍କ ସମର୍ଥନ ଆମ ସଫଳତାର ଅନ୍ୟତମ କାରଣ“ ବୋଲି ରକି କହିଛନ୍ତି। ମେମୋଲ ବ୍ୟକ୍ତିଗତ କାରଣ ଦର୍ଶାଇ ମୁଖ୍ୟ କୋଚ୍ ପଦ ବଜାୟ ରଖିବାନେଇ ଅସାମର୍ଥ୍ୟ ପ୍ରକାଶ କରିଥିବା ଏଆଇଏଫ୍ଏଫ୍ ସମ୍ପାଦକ କୁଶାଲ ଦାସ ସ୍ପଷ୍ଟ କରିଛନ୍ତି। ଆମେ ତାଙ୍କ ନିଷ୍ପତ୍ତିକୁ ଗ୍ରହଣ କରୁଛୁ ଏବଂ ଭାରତୀୟ ଫୁଟ୍ବଲ ପ୍ରତି ତାଙ୍କ ଅବଦାନ ପାଇଁ ଧନ୍ୟବାଦ ଜଣାଉଛୁ ବୋଲି କୁଶାଲ କହିଛନ୍ତି।
ଭାରତର ପୂର୍ବତନ ଅନ୍ତର୍ଜାତୀୟ ଖେଳାଳି ରକିଙ୍କ କାର୍ଯ୍ୟକାଳ ଅବସରରେ ଦଳଗତ ଭିତ୍ତିରେ ଭାରତର ପ୍ରଦର୍ଶନ ଭଲ ରହିଥିଲା। ୨୦୧୮ ନଭେମ୍ବରରେ ଭାରତୀୟ ମହିଳା ଫୁଟବଲ ଦଳ ପ୍ରଥମଥର ପାଇଁ ଅଲିମ୍ପିକ୍ କ୍ୱାଲିଫାୟର୍ସର ଦ୍ୱିତୀୟ ରାଉଣ୍ଡରେ ପ୍ରବେଶ କରି ଇତିହାସ ସୃଷ୍ଟି କରିଥିଲା। ୨୦୧୯ରେ ଭାରତ ସାଫ୍ ମହିଳା ଫୁଟବଲ ଚାମ୍ପିୟନଶିପ୍ ଟାଇଟଲ ଜିତିଥିଲା। ନେପାଳ ସାଉଥ୍ ଏସିଆନ ଗେମ୍ସରେ ଦଳ ସ୍ବର୍ଣ୍ଣ ପଦକ ପାଇଥିଲା। ଭାରତ ପ୍ରଥମଥର ପାଇଁ ଆସନ୍ତାବର୍ଷ ଏଏଫ୍ସି ମହିଳା ଏସିଆନ କପ୍ ଆୟୋଜନ କରୁଥିବାରୁ ଜାତୀୟ ଦଳକୁ ରକି ଶୁଭେଚ୍ଛା ଜଣାଇଛନ୍ତି।
