ଭଞ୍ଜନଗର,୨୧୨ା୧୧(ଡି.ଏନ.ଏ.): ରାଜ୍ୟର ସମସ୍ତ ଘରକୁ ୨୦୨୪ ଡିସେମ୍ବର ସୁଦ୍ଧା ପାଇପ ଯୋଗେ ବିଶୁଦ୍ଧ ପାଣି ଯୋଗାଇ ଦେବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଲକ୍ଷ୍ୟ ରଖିଛନ୍ତି । ଏହି କ୍ରମରେ ଗଞ୍ଜାମ ଜିଲା ଭଞ୍ଜନଗର ଗ୍ରାମ୍ୟ ପାଇପ ଜଳ ଯୋଗାଣ ବିଭାଗ ପକ୍ଷରୁ ୧୧ଟି ବ୍ଲକ ଏବଂ ୨ଟି ଏନଏସିକୁ ମେଗା ପ୍ରକଳ୍ପ ମାଧ୍ୟମରେ ପାଣି ଯୋଗାଣ କରାଯିବ। ନୟାଗଡ଼ ଜିଲା ଗଣିଆ ନିକଟସ୍ଥ ମହାନଦୀରୁ ପାଇପ ଯୋଗେ ପାଣି ଆଣିବା ଯୋଜନା ଅଛି।
ପ୍ରଥମେ ଗତ ମେ ୧୧ରେ ୧୧ଟି ବ୍ଲକ ପାଇଁ ୧୮୦୭ କୋଟି ୪ଲକ୍ଷ ୩୦ ହଜାର ୩୦୬ ଟଙ୍କା ଅନୁମୋଦନ ହୋଇଥିଲା। କିନ୍ତୁ ବୁଗୁଡ଼ା ଓ ବେଲଗୁଣ୍ଠା ଏନଏସି ସମେତ ପୂର୍ବରୁ ବାଦ୍ ଦିଆଯାଇଥିବା କବିସୂର୍ଯ୍ୟନଗର ବ୍ଲକର କିଛି ଅଂଶ, ବେଗୁନିଆପଡ଼ା ବ୍ଲକର ଆଉ କିଛି ଅଶଂକୁ ଉକ୍ତ ଯୋଜନାରେ ସାମିଲ କରାଯିବା ପରେ ପ୍ରକଳ୍ପ ଖର୍ଚ୍ଚ ୧୯ଶହ ୭୩ କୋଟି ୮ ଲକ୍ଷ ୪୮ ହଜାର ୭୯୧ ଟଙ୍କା ୪୦ ପଇସାକୁ ବୃଦ୍ଧି ପାଇଛି। ଇତିମଧ୍ୟରେ ଉକ୍ତ ପ୍ରକଳ୍ପ ପାଇଁ ଖର୍ଚ୍ଚ ହେବାକୁ ଥିବା ୧୬ଶହ ୭୭ କୋଟି ୬୮ଲକ୍ଷ ଟଙ୍କାର ଟେଣ୍ଡର ଆହ୍ବାନ କରାଯାଇଛି । ବଳକା ଅର୍ଥ ଜମି ଅଧିଗ୍ରହଣ ସମେତ ଅନ୍ୟାନ୍ୟ ବାବଦକୁ ଖର୍ଚ୍ଚ ହେବା ଅନୁମାନ କରାଯାଉଛି । ବର୍ତ୍ତମାନ ଅନଲାଇନ ମାଧ୍ୟମରେ ଟେଣ୍ଡର ପେପର ପକାଇବା ବ୍ୟବସ୍ଥା ଚାଲିଛି। ଟେଣ୍ଡର ପ୍ରକ୍ରିୟା ସରିବା ପରେ କାମ ଆରମ୍ଭ ହେବ। ଠିକାଦାର ୫ବର୍ଷ ପର୍ଯ୍ୟନ୍ତ ଉକ୍ତ ପ୍ରକଳ୍ପର ତଦାରଖ କରିବେ। ଉକ୍ତ ମେଗା ପ୍ରକଳ୍ପର ସୁବିଧା ଭଞ୍ଜନଗର ବ୍ଲକ, ବେଲଗୁଣ୍ଠା ବ୍ଲକ ଓ ଏନଏସି, ସୋରଡ଼ା, ବୁଗୁଡ଼ା ବ୍ଲକ ଓ ଏନଏସି, ଜଗନ୍ନାଥପ୍ରସାଦ, ଆସିକା, ବେଗୁନିଆପଡ଼ା, ପୁରୁଷୋତ୍ତମପୁର, କବିସୂର୍ଯ୍ୟନଗର, ପୋଲସରା ଓ ଧରାକୋଟ ବ୍ଲକ ଅଚଂଳ ବାସିନ୍ଦା ପାଇବେ। ଉକ୍ତ ୧୧ ବ୍ଲକରେ ୭୦୩ଟି ଗ୍ରାମ ଥିବା ବେଳେ ସେଥିମଧ୍ୟରେ ୩ଲକ୍ଷ ୨୮ ହଜାର ୫୭୨ ଘର ଅଛି। ବର୍ତ୍ତ୍ମାନ ୧ଲକ୍ଷ ୬୦ ହଜାର ୫୨୯ ଘରକୁ ପାଇପ ଯୋଗେ ପାଣି ଯୋଗାଣ ହେଉଛି । ମେଗା ପ୍ରକଳ୍ପରେ ସମସ୍ତ ଘରକୁ ପାଣି ଯୋଗାଣ ହେବ । ଯେଉଁ ଅଞ୍ଚଳରେ ବିଦ୍ୟୁତ୍ ସେବା ନାହିଁ ସେଠାରେ ସୋଲାର ମାଧ୍ୟମରେ ପାଣି ଯୋଗାଣ ହେବ। ଦୁଇ ଏନଏସିର ସମସ୍ତ ଘରକୁ ବର୍ତମାନ ପାନୀୟ ଜଳ ଯୋଗାଣ କାର୍ଯ୍ୟ ସରିଛି । କିନ୍ତୁ ଉକ୍ତ ଦୁଇ ଏନଏସିରେ ପାଣିର ଉସତ୍ ଠିକ୍ ନଥିବା ଯୋଗୁ ଆଗାମୀ ଦିନରେ ମେଗା ପ୍ରକଳ୍ପ ମାଧ୍ୟମରେ ପାଣି ଯୋଗାଣ ହେବ । ବେଲଗୁଣ୍ଠା ବ୍ଲକ ବଜ୍ରଗଡ଼, ପଥରା ଭଳି ଅନେକ ଗ୍ରାମରେ ବର୍ତ୍ତମାନ ପାନୀୟ ଜଳ ସମସ୍ୟା ରହିଛି । ଏହାର ବିକଳ୍ପ ବ୍ୟବସ୍ଥା ବିଭାଗ କରିପାରୁନାହିଁ। ମେଗା ପାନୀୟ ଜଳ ପ୍ରକଳ୍ପ କାର୍ଯ୍ୟ କିଭଳି ତ୍ୱରାନ୍ବିତ ହୋଇପାରିବ, ସେଥିପାଇଁ ବାଚସ୍ପତି ବିକ୍ରମ କେଶରୀ ଆରୁଖ ମଧ୍ୟ ବିଭାଗୀୟ ଅଧିକାରୀମାନଙ୍କୁ ଡ଼ାକି ବାରମ୍ବାର ଆଲୋଚନା କରିଛନ୍ତି। ଅପରପକ୍ଷେ ଗଣିଆର ଯେଉଁ ସ୍ଥାନରୁ ପାଣି ଆଣିବା ଯୋଜନା ଥିଲା ଉକ୍ତ ଅଞ୍ଚଳରେ କୁମ୍ଭୀର ବାସ କରନ୍ତି । ସେଠାରୁ ପାଣି ଆଣିଲେ ପମ୍ପ ଶବ୍ଦରେ କୁମ୍ଭୀର ବିପଦରେ ପଡ଼ିବା ଆଶଙ୍କା ରହିଛି । ଫଳରେ ଜାତୀୟ ଗ୍ରୀନ୍ ଟ୍ରିବ୍ୟୁନାଲ (ଏନଜିଟି) ଆପତ୍ତି ଅଭିଯୋଗ କରିବାର ସମ୍ଭାବନା ଥିଲା । ତେଣୁ ନୂତନ ସ୍ଥାନ ଚିହ୍ନଟ ପାଇଁ ପୁଣି ସମୟ ଲାଗିଥିଲା। ଅଧିକ୍ଷଣଯନ୍ତ୍ରୀ ସରୋଜ କୁମାର କର, ବନ ବିଭାଗ ଏବଂ ଜଳ ସମ୍ପଦ ବିଭାଗ ଅଧିକାରୀ ବାରମ୍ବାର ଗଣିଆ ଅଚଂଳ ପରିଦର୍ଶନ କରି ପାଣି ଉଠାଇବାର ନୁତନ ସ୍ଥାନ ଚିହ୍ନଟ କରାଯାଇଥିଲା । ପୁର୍ବରୁ କବିସୁର୍ଯ୍ୟନଗର ଏବଂ ବେଗୁନିଆପଡ଼ାର କିଛି ଅଚଂଳକୁ ମେଗା ପ୍ରକଳ୍ପରୁ ବାଦ୍ ଦିଆଯାଇଥିଲା । ଉକ୍ତ ଅଚଂଳକୁ ସାଳିଆ ଡ଼୍ୟାମରୁ ପାଣି ଆଣି ଦେବାର ଯୋଜନା ଥିଲା । କିନ୍ତୁ ସାଳିଆ ଡ଼୍ୟାମରୁ ଖୋର୍ଦ୍ଧା ଜିଲା ସମେତ ଖଲିକୋଟ ଅଚଂଳକୁ ପାଣି ଯୋଗାଣ ହେଉଛି । ତେଣୁ ସେଠାରେ ପାଣି ଭବିଷ୍ୟତରେ ଅଭାବ ପଡ଼ିପାରେ । ଏହାକୁ ଆଖି ଆଗରେ ରଖି ଭଞ୍ଜନଗର ମେଗା ପ୍ରକଳ୍ପରେ ଉକ୍ତ ଦୁଇ ବ୍ଳକର ବଳକା ଅଞ୍ଚଳକୁ ମଧ୍ୟ ସାମିଲ କରାଯାଇଥିଲା । ତେଣୁ ଟେଣ୍ଡର ଆହ୍ବାନରେ ବିଳମ୍ବ ସହ ଖର୍ଚ୍ଚ ପରିମାଣ ବଢ଼ିଥିଲା । ଗଣିଆର ମୁଖ୍ୟ ପମ୍ପ ହାଇସ, କ୍ୱାଟର ସମେତ ପ୍ରମୁଖ ବାବଦକୁ ୩୧୪ କୋଟି ୩୧ଲକ୍ଷ ୮୩ ହଜାର ୮୪୨ଟଙ୍କା ଖର୍ଚ୍ଚ ଯୋଜନା ଅଛି । ଏଥିସହ ୱାଟର ଟ୍ରିଟମେଟ୍ ପ୍ଲାଟ୍ଂ ବାବଦକୁ ୧୧୭ କୋଟି ୬ଲକ୍ଷ ୩୮ ହଜାର ୪୭୬ ଟଙ୍କା, ପାଇପ ବିଛା ବାବଦକୁ ୯୫୬ କୋଟି ୧୨ଲକ୍ଷ ୯୨ ହଜାର ୨୭ଟଙ୍କା, ପାଣି ଟାଙ୍କି (ଇଏସ୍ଆର) ପାଇଁ ୧୨୮ କୋଟି ୪୭ ଳକ୍ଷ ୨୫ ହଜାର ୨୨୫ଟଙ୍କା, ବିଦ୍ୟୁତ୍ ପାଇଁ ୩୯୮ କୋଟି ୨୦ଲକ୍ଷ ୯୬୭ଟଙ୍କା, ଘରୋଇ ପାଇପ ସଂଯୋଗ ପାଇଁ ୩୧ କୋଟି ୪୨ଲକ୍ଷ ୨୮ ହଜାର ୨ଶହ ଟଙ୍କା, ୫ବର୍ଷ ପରିଚାଳନା ପାଇଁ ୧୦୪ କୋଟି ୫୬ଲକ୍ଷ ୫୪ହଜାର ୮୪୫ଟଙ୍କା, ଜମି ଅଧିଗ୍ରହଣ ପାଇଁ ୨୫ କୋଟି, ସୋଲାର ପାୱାର ପ୍ଲାଣ୍ଟ ପାଇଁ ୧୩ କୋଟି ୨୭ଲକ୍ଷ ୭୮ ହଜାର ୨ଶହ ଟଙ୍କା ଖର୍ଚ୍ଚ ଆକଳନ କରାଯାଇଛି । ଏନେଇ ଭଞ୍ଜନଗର ଗ୍ରାମ୍ୟ ପାଇପ ଜଳ ଯୋଗାଣ ବିଭାଗ ଅଧିକ୍ଷଣଯନ୍ତ୍ରୀ ସରୋଜ କୁମାର କରଙ୍କୁ ଯୋଗାଯୋଗ କରିବାରେ, ବର୍ତ୍ତମାନ ମେଗା ପ୍ରକଳ୍ପ ପାଇଁ ଟେଣ୍ଡର ପ୍ରକ୍ରିୟା ଚାଲିଛି । ସରକାରଙ୍କ ଯୋଜନା ଲୋକଙ୍କ ପାଖରେ କିଭଳି ତୁରନ୍ତ ପହଞ୍ଚିପାରିବ ସେଥିପାଇଁ ପଦକ୍ଷେପ ନିଆଯାଉଛି ।
